"Илыш йогын" рубрик, 2017 ий, Ага тылзын 29-ше кечыже

Книгам лудаш кумылаҥдат

Статьян авторжо Анастасия Эманова

Кумдан палыме филолог Дмитрий Лихачёв ойлен: «Библиотеке университет деч кӱлешанрак». Тыште тӱрлӧ йодышлан вашмутым муаш лиеш. Могай гына книгам тудо шке леведышыж йымаке чумырен огыл.

библиотекариКораксола ялысе библиотеке кугу да книгалан поян. Фондышто кызыт 8687 экземпляр уло.  Библиотекым 1995 ий годсек Татьяна Ананьевна Кириллова (снимкыште шолаште) вуйлата. Тудым йоча-влак, йӧратен, Таняка манын ойлат.

«Библиотекым 1954 ийыште почмо. Эн ончыч пу пӧрт лийын, а 1992 ийыште, кугу кӱ зданийым чоҥымеке, библиотекым тушко кусарыме. 2014 ийыште Марий Кужер ялысе библиотекын филиалжым ушеныт. Кызыт тушто коктын: мый да Ираида Николаевна Кудряшова – пашам ыштена. Ончыч книгам шукынрак лудыныт. Кызыт интернетлан кӧра библиотекыш шуэнрак кошташ тӱҥалыныт. Туге гынат идалыкысе лектыш садыгак куандара. Ик ийыште латиндеш тӱжем наре книгам пуэнна. «Аргументы и факты», «Тысяча советов» газет-влакым налына, тыгак марий газет-влаклан подпискым эреак ыштена. «Кугарня», «Морко мланде», «Ямде лий» газет-влакым, «Ончыко», «Кече» журнал-влакым налына. «Кугарня» газетыште пеш шуко сай материал-влакым савыктат, библиотеке, туныктышо-влаклан поснак чот кӱлешан улыт. Кызыт, чаманен каласыман, у книга-влак шагал кондалтеш, марий художественный литератур огеш сите. Никандр Лекайнын книгаже-влакым эре лудыт, нуным уэш савыктыман», — каласыш библиотекарь.

Татьяна Ананьевна ден Ираида Николаевна тыршен пашам ыштат. Йоча-влаклан викториным, тӱрлӧ вашлиймашым эртарен, выставкым, презентацийым ончыктен, книгам лудаш кумылаҥдат. Кызытсе саман дене тӧр ошкылыт, библиотекын сайтшым вӱден шогат. Экологий идалыклан пӧлеклалтше виртуальный выставкым ямдылат. Сентябрьыште мучаш марте ыштен шукташ шонат.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: