"Ӱшанем... Вучем..." рубрик, 2017 ий, Ага тылзын 5-ше кечыже

Кӧ титакан?

Статьян авторжо Татьяна Айтова

Салам лийже, «Ӱшанем… Вучем…» лаштыкым лудшо ӱдырамаш ден ӱдыр-влак. Ты серышым лач тыланда возем. Шукерте гына огыл «Ой, йӧратымаш…» лаштыкыште Советский район гыч Валентинан серышыжым лудым. Тудо мыйым шонкалаш таратыш.
Валентина пелашыж ӱмбак вуйым шиеш. Сӱан деч ончыч тудо йӧршеш весе лийын манын воза. А вара тудын його да шоя улмыжым пален налын.
Тыгай проблеме шагал огыл ӱдырамашым тургыжландара. Сӱан деч вара айдеме трукышто вашталт огеш керт, шонем. Шукыж годым ме, ӱдырамаш-влак, шкежат титакан улына. Эн ондак воктене улшо пӧръеҥым пагалаш да аклаш тунемаш темлем. Вет поро мут кеч-кунамат куандара. Вурседылше, кычалтылше еҥ пелен кӧн лиймыже шуэш?
Тылеч посна пелашлан ӱшанаш кӱлеш. Ятыр ӱдырамаш пӧръеҥ пашам шкак ышта. Тыге писынрак лиеш манын, шкем лыпландара. Тиде кугу йоҥылыш. Икмыняр гана тыге ыштымек, пелашдан полшаш кумылжо йомеш. Тыге тудо йогыш савырна. Кеч-могай пашам пырля каҥашен ыштыман. Йышт ыштыме сомыл шукыж годым умылыдымашым луктеш.
Пелашдам чӱчкыдынрак мокташ тыршыза. Вет кажне айдемын уда да сай койышыжо уло. Могай могыржым утларак ойлет, тудо утларак вияҥеш.
Теве ик палымем икымше ешыштыже його, уда койыш-шоктышан пºръеҥлан шотлалтын. Кокымшо гана ешан лиймекыже, чылт вашталтын. Молан тыге лиймым тыге умылтарен: «Кызытсе ватем мыйым умыла да пагала. Тудо мыйым калык ончылно нигунам огеш намысле. Нелылык годым икте-весым огына титакле, а пырля каҥашаш тыршена».
Ешыште тума лектын гын, икте гына титакан лийын огеш керт, шонем. Вурседылме олмеш шинчын шоналтыза, можыч, шкежат титакан улыда.
Богдана.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: