"Сылнылык тӱня" рубрик, 2017 ий, Ага тылзын 5-ше кечыже

Кӱслезын кӱслеже чонан, мурыжо шулдыран

Статьян авторжо Анастасия Эманова

Ятыр йомакыште, былиныште, ойлымашыште кӱслен вийже нерген ойлалтеш. Кӱсле сем кумылым савыра. Садланак тӱняште кӱсле сем курым гыч курымыш йоҥгаш тӱҥалеш.

27 апрельыште Йошкар-Оласе Национальный президентский сымыктыш школышто «Кӱсле корно» чапле концерт лийын.

Школын фойештыже «Мелодия родного края» выставке ончыкталтын. Тушто Т.Евсеев лӱмеш Национальный тоштерын фондшо гыч марий калык семӱзгар-влакым чумырымо. Кумылан чыла еҥ тошто семӱзгар дене шоктен ончен кертын.Кусле8

Концертым «Марий кундем» калык семӱзгар оркестр «Волынка» произведений дене почын. Мероприятийыште кӱсле искусство дене кылдалтше могай фестиваль, концерт, конференций эртаралтме дене (мутлан, «Звените гусли над Кокшагой» фестиваль-конкурс, «Кылтиҥ, кылтиҥ кӱслеже» научно-практический конференций) палдареныт. Москосо «Купина» кӱслезе-влакын ансамбльыштын ончычсо вуйлатышыже Любовь Яковлевна Жукым шарналтеныт. Тудо ӱмаште колен. Ты уста еҥ Марий кундемын поро йолташыже лийын. Ӱмаште республикыштына кӱсле искусствым вияҥдыме шотышто советым ыштыме. Тышке Любовь Яковлевнат шке надыржым пыштен.

«Кӱсле корно» концертын унаже Российын да тӱнян тӱрлӧ конкурсыштын лауреатше, кӱслезе, мурызо, «Купина» ансамбльын солистше Дмитрий Волков лийын. Дмитрий Валерьевичым Марий Эл Правительстве председательын икымше алмаштышыже, тӱвыра, печать да калык-влакын пашашт шотышто министр М.Васютин Марий Эл Республикын заслуженный артистше кугыжаныш награде дене палемден. А Президентский сымыктыш школын директоржо Н.Смирнов артистлан, тек кӱсле сем эре шӱм пелен лийже манын ойлен да, кӱсен кӱслем пӧлеклен.

Кусле4Концертыште Д.Волков «Марий кундем» оркестр дене пырля выступатлен. Тылеч посна Курыкмарий, Звенигово районла, Козьмодемьянск ола гыч толшо, Йошкар-Оласе  кӱслезе-влак мастарлыкышт дене куандареныт. Поснак «Кӱсле» йоча ансамбль кумылым чот савырен моштен. Тудым сымыктыш школын самырык туныктышыжо, кӱслезе Татьяна Фоминых вуйлата. «Ансамбльыш кумшо да нылымше класслаште тунемше вич йоча  коштеш. Тыгай кугу концерт нунылан икымше. Ансамбльым тений январьыште чумырымо. Йоча-влак кӱсле дене шокташ йӧратат, шке идейышт нергенат ойлаш огыт ӧр. Ты концертыште ансамбльын участникше-влак кӱсле дене шоктымо деч посна марла мурым муреныт. Такшым ансамбльыш марият, рушат, татар йоча-влакат коштыт. Нуно ваш келшен, умылен, ӱчашен-ӱчашен тунемыт. Тидыже сай паша лектышым пуа», - ойла Т.Фоминых.

Чынжымак ойлат улмаш: кӱслезын кӱслеже чонан, мурыжо шулдыран. Тидым концерт сайын пеҥгыдемден.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: