"Рубрик деч посна", 2017 ий, Ага тылзын 18-ше кечыже

А тый пионер лийынат?

Статьян авторжо Эльвира Терентьева

19 май — Пионерийын кечыже. Тений Пионерийлан 95 ий темеш.

А Те пионер лийында мо? Тидын нерген мом каласен кертыда? Галстукдам кызытат араледа мо? Пионер организацийыште але классыште могай пашам шуктенда (мутлан, мый эре редколлегийын еҥже семын пырдыжгазетым лукмылан мутым кученам)? Пионер организаций тыланда молан да кузе полшен?

Валентин Зайцев:зайцевы

- Мый пионер, дружинын знаменосецше да отрядын вожатыйже лийынам. А вара Марий Турек район Марий Пыламарий школышто старший пионервожатыйлан, районысо пионер организацийын советшын председательжылан кум ий шогенам. Пелашемат старший пионервожатый ыле. Республикыште тыгай ешыже икте гына лийын, мемнам Зайцевмытын вожатский ешыже маныныт. Мый йоча-влакым «Артекыш» коштыктенам гын, Венера Галляметдиновна — «Орлёнокыш». Тыгак пелашем Марий кундем гыч шкетын Москошто эртыше Всесоюзный пионер организацийын конференцийыштыже участвоватлен. Пионер галстукым, пионер значок-влакым еш реликвийлан шотлен аралена.

Вера Горохова:вера

- Чаманем, но мый пионер радамыш логалын шуктен омыл.Эсогыл октябрёнокат лияш верештын огыл. Мыйын тунемме жапыште вес организаций-влак лекташ тӱҥалыныт ыле. «ЭрВий» йоча организацийын членже лийынам. А теве акам ден изам-влакым чылаштым пионерыш пуртеныт. Йошкар галстукышт тачат уло. А фотошто могай моторын койын шогат! Мыйын шонымаште, лач пионер-влак эн ушан-шотан, муткучышан да дисциплинированный лийыныт. Тачысе жап да икшыве-влак дене тидым йӧршеш таҥастараш ок лий.

Зоя Дудина:160

- Пионерке лийме шижмашем тачат саклем. Лач тунам Шочмо эл, порыс, ар, сай-осал, чын-шоя, ӱшанле йолташ да ужалалтше чужгаеҥ нерген умылымаш-влак шочыныт. Мый ты шижмаш дене тачат илем. Осалым ом арале, шоялан ом ӱшане, чужгаеҥым ом пагале. Галстукемым шольо-шӱжаремлан пижыктенам. Мый чолга пионерке лийынам. Эре пионер ушемын каҥашыштыже, Шкетан манмыла, шолынам. Шернур район Марисола школыштемат, «Орлёнок» пионер лагерьыштат. Пионерий шотан айдеме лияш полшен да полша.

саша иванов

Александр Иванов:

— Мемнан тукым годсо моло тунемше-влак семынак мыят пионер радамыште лийынам. Мыланемат классыште редколлегий пашам шукташ логалын. А школышто — совет отрядын председательже. Пионер галстукем ынде кушто кия ом шарне, но «Старший пионер», «Комсомолец», «За активную работу» значокем-влак кызытат аралалтыт. Пионерий, комсомол але партий кушкын шогышо тукымым сай могыр гыч гына шуарен шоген. Ответственныйракым ыштен. Ончыч школышто мом-гына ыштыме огыл: макулатурым, пӱгыльмым, пареҥгым погымо, пуым шелыштме, вольыкым ончымо, йошкарушемым лукмо, шоҥгыеҥ-влакын суртышкышт сурткомылкам ышташ коштмо. А кузе чон вургыж вучет ыле «Зарница» модышым, пионер тулотым! Чыла тиде пионерийын кышаже да пашаже! Ончычсо жапым шарналтет да чонланат йокрок…

Людмила Мусихина (шола гыч кумшо):мусихина погын годым

- Мый Свердловск кундем Красноуфимск район Руш Тавра школышто тунемынам. Классыштына коло кудытын лийынна. Сайын тунемше да чолга йоча-влак шукын ыльыч. Тунам ме, пионер-влак, Пионерий кечылан поход дене йӱдлан каена ыле. Чӱчкыдынак Урал ден Пошкырт кундемла кокласе чек воктенысе сылне вер-шӧрыштӧ каненна. Ай да моло эҥер вӱдым ончен юарленна. Эн ончак школна гыч тунемше-влакым Степкан кӱ воктене строитлен шогалтат ыле. Ме курык йымалне ужар шудо лоҥгаште модынна, таҥасенна, тулото воктен мурым муренна.

мамаев

— Кумшо классыште тунеммына годым, 1968 ийыште, мемнам, уло классым, пионерыш пуртеныт. Тидлан мемнам туныктышына Пелагея Григорьевна да пионервожатый Елена Егоровна ончылгочак ямдыленыт: пионер-влакын законыштым умылтареныт, торжественный обещанийым наизусть туныктеныт, Кугу Отечественный сар годсо герой-пионер-влак нерген каласкаленыт, тыгак школ библиотек гыч тиде але вес книгам налын лудаш темленыт. 22 апрельыште, Ленинын шочмо кечынже, чумыр пионер дружина ончылан торжественный обещанийым хор дене ойленна да кугурак пионер-влак мыланна йошкар галстукым кылден пуэныт. Вара школ директор, пионервожатый да эше ала-ко»-влак мемнам пионерыш пурымо дене шокшын саламленыт да шуко сай тыланымашым ойленыт. Ынде ме але марте могай лийынна да кузе тунемынна, тылеч вараже эшеат сай да тыршен тунемшаш, кугурак-влакым пагалышаш, изирак-влаклан полшышаш улына товатленна.

Пионерыште лийме да тӱрлӧ класслаште тунемме жапыште звеньевой, культмассовик, редколлегий член (пионервожатыйын йодмыж почеш 19 майлан келшыше почеламутым возенам ыле, варажым тудо школысо пырдыжгазетеш вераҥдалтын, тыгак пионер тулото ончылан лудынам ыле) да отряд командират лийынам. Пионер сборлаште туныктышын полшымыж дене уда койышым ончыктышо, начарын тунемше, школыш кечым коден коштшо-влакым каҥашенна. Тыгак концертлаште выступатленна (пионер нерген тугодсо ятыр мурым тачат шарнем), сарын ветеранже-влаклан пакчам кӱнчаш, пареҥгым шындаш да моло сомылым шукташ полшенна. Теле каныш годым ял мучко имне дене ломыжым, тыгак тошто кагазым погенна. Но галстукем аралалт кодын огыл. А йоча жап — ӱмырешлан ушеш кодшо волгыдо пагыт.

Елена Зайцева:Лена Зайцева

- Школышто икмыняр ий дружинын советшын председательже лийынам. Тыгак пионер-влакын республикысе слётышкышт миен толаш чап ыле. Мемнан районысо (Марий Турек – Авт.) деогацийыште шукынжо рвезе-влак да ме кок ӱдыр-влак ыльна. А командынам чолга пионервожатый Валентин Викторович Зайцев вуйлатен.

Валентина Ягодарова:Валентина

- Мый пионер лийынам да ту годсо жап шотышто моткоч йокрокланем. Тачысе кече марте мемнам пионерыш пуртымым сайын шарнем. А вара ме шкежат подшефный класснам пионерыш пуртышна. Мыланем Келшымаш тулото-влак моткоч келшат ыле. Тушто кум республикын: Марий Элын, Татарстанын да Киров областьын — пионерышт вашлийыныт. Ме икана Малмыж районыш миенна ыле. Тушто Киров областьысе пионер-влак дене келшен шична. Варажым ятыр жап икте-весе дене серышым возгаленна. А классыште мый отрядын председательже лийынам. А отрядна Марат Казейын лӱмжым нумалын.

Анатолий Зарецких:Зарецких

- Мыят пионер лийынам! Сайын тунемынам! Мыйым «Артек» пионер лагерьыш колтеныт! Ой, ой, могай чапле вер!

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: