"Ӱшанем... Вучем..." рубрик, 2017 ий, Пеледыш тылзын 2-шо кечыже

АССОЦИАТИВНЫЙ ТЕСТ «Йӧратыме еҥ деке корно»

Статьян авторжо Татьяна Айтова

1.Йӧратыме еҥ деке корно дене  ошкылыда. Шинчаончылно кок корно: кӱчык да кужу. Кӱчык корно йокрок, а кужу весела. Кудыжым ойыреда?

2. Корнышто  йошкар да ош роза вондерлам ужыда. 15 пеледышан аршашым погаш кӱлеш. Могай тӱсан розам утларак налыда?

3. Йӧратыме еҥын суртышкыжо толын шуыда. Омсам родыжо почеш. Таҥдам ӱжаш йодыда але, саламлалтмек, тудым пºлемышкыже кычал пуреда?

4. Пӧлемыш пуреда, а тудо пуста. Аршашдам вакшышыш але окна воктеке пыштеда?

5. Вес пӧлемыште йӱдлан малаш кодыда. Эрдене таҥдан пӧлемышкыже ошкылыда. Тудым помыжалтеда але мален кынелмыжым вучеда?

Вашмут.

1.Корно — йӧратымаш. Кӱчык корным ойыреда гын, куштылгын да вашке йӧратен шындеда. Кужу корно дене каеда гын,  таҥым шекланен, эскерен ойыреда.

2.Йошкар тӱсан розам утларак кӱрыда — йӧратымашлан уло вийдам, чондам пуэда, ош розам – вес еҥын йӧратымыжым вучеда.

3.Нелылык годым шкем кузе кучымым ончыкта. Ӱжаш йодыда гын, нелылык деч лӱдыда, тудым сеҥаш огыда вашке. Вигак пӧлемыш каеда – нимогай чарак деч огыда лӱд, шке вийлан ӱшанеда.

4.Йӧратыме еҥлан мыняр жапым ойырымым ончыкта. Аршашым вакшышыш пыштеда гын, уло яра жапдам пуаш ямде улыда, окнаш – жапын-жапын икте-весе деч канаш уто огыл манын шонеда.

5.Йӧратыме еҥ деке отношенийым  ончыкта. Помыжалтеда гын, тудын койыш- шоктышыжым вашталташ шонеда, кынелмыжым вучеда – уто-сите койышыжым ончыде йӧратеда.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: