"Рубрик деч посна", 2017 ий, Пеледыш тылзын 2-шо кечыже

Кагаз гыч «шочыныт»

Статьян авторжо Эльвира Терентьева

Паша-влак

Воспитатель-влак йоча-влакым изинек пашалан шӱмаҥдат. Марий Турек район Марий Купто ялыште шочшо да Оршанке педучилищым тунем пытарыше Валентина Ягодарова воспитательлан коло кокымшо  ий пашам ышта. Кӱшыл категориян специалист.

Эн ончыч шочмо ялысе йочасадыште, вара Йошкар-Оласе 90-ше №-ан «Крепыш» йочасадыште воспитательлан лу ий пашам ыштен. Тыгодымак икшыве-влакым кагаз гыч тӱрлӧ мотор наста-влакым ышташ туныкташ пижын. Тидым эше «модульное оригами» маныт. Икымше пашаже ош йӱксӧ лийын.

Тунам йочасад лӱм дене В.А.Ягодарован вуйлатымыж почеш ыштыме ош йӱксӧ нерген мультимедийный занятийым эртарыме шотышто видеом колтеныт. «Йӱксӧ» теме дене паша Российысе «Дарование» образовательный рӱдерын методический разработко-влак шотышто конкурсыштыжо 2-шо верым сулен. Тыгак «Арт-ёлка» пашат сеҥымашым фото Валиконден улмаш.

Валентина Аркадьевна ынде визымше ий Моско областьысе Дмитровский районышто 44-ше №-ан «Дружок» йочасадыште пашам ышта. Тыште «Умелые руки творят чудеса» творческий проектым возен. Йоча-влак дене тӱрлӧ конкурслаште участвоватлат. Теве кодшо ийын «Maam.ru» тӱнямбалсе образовательный порталын конкурсышкыжо «Кугече муно» пашам темленыт. Старший группо гыч Варя Кожбакован пашаже икымше верым сеҥен налын!

Такшым йоча-влак кажне гана кагаз-влакым пырля тодыштыт (тидым модуль маныт). А вара тудым Валентина Аркадьевна иктыш пога. А эн тыршыше йочам конкурсышко луктеш. Эртыше кеҥежым воспитанникше Маргарита Кириенко «Кугече муно» кидпаша дене ончыл верыш лектын ыле. Воспитательлан да Маргариталан дипломым кучыктеныт.

Регулировщик

А тений Моско областьыште эртыше «Древо талантов» конкурсышто старший группо гыч Костя Орлов дене пырля участвоватленыт. Кагаз «Регулировщик» адакат икымше вер дене аклалтын.

«Дружок» йочасадыш коштшо изи ӱдыр-рвезе-влак кидпашалан моткоч шӱмаҥыныт. Валентина Аркадьевна ынде кумшо ий «Умелые ручки» кружокым эртара.

Йӱксым ышташ тунемына

Тидлан кӱлыт: А-4 форматан ош кагаз-влак да ик йошкар кагаз (нерым ышташ), вашкӱзӧ. Эн ончычак модуль-влакым ямдылыза. Изирак йӱксылан 368 модуль кӱлеш.

Могай кугыт келша, тугай модульым ыштыза. Мутлан, ик А-4 форматан кагаз гыч 32 модуль лийын кертеш. Кугурак лиеш гын, тудым погаш куштылгырак. Йӱксыжат кугу лектеш.

Модуль-влакым ушыза. Икымше радамыште 30 модуль лийшаш. Икте-весышт дене икгай кужытышто верланышаш улыт. Уке гын, фигур тӧр огеш лий.

Йӱксын негызше шӱдыр семынрак коеш. Тидлан кум радамым ыштыза. Чылаже оҥго почеш шым радамым ыштен кӱзыза. Ты конструкций лиймеке, шулдырым ыштыза. Ик шулдырлан лу, весыжланат тынарак модульым налза. Тыге шӱй ден почшылан вич модуль дене кодеш.

йӱксӧ

Шулдырын икымше радамышкыже лу модульым вераҥдена, кокымшыш — индешым, вара – кандашым, тыге икте марте. Кок шулдыр-влак коклаште вич модуль пурыман вер кодшаш.

Шӱйым латвич модуль гыч ыштыза. Ик радамым ыштена да негызыш пижыктена. Нер мучашек ик йошкар модульым пижыктыза. Почым пирамиде принцип почеш вич модуль гыч келыштарыза. А вара, чыла пырля ушен, мотор йӱксым ужыда.

Эльвира Терентьева.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: