"Рубрик деч посна", 2017 ий, Пеледыш тылзын 8-ше кечыже

Куаным кондышо юзо пырче

Статьян авторжо Эльвира Терентьева

М.Шкетан лӱмеш Марий национальный театрыште Йошкар-Оласе 7-ше №-ан школышто тунемше да «Волшебная бисеринка» кружокыш коштшо йоча-влакын паша выставкышт кок тылзе шуйныш.

Юзо бисер дене пашам ыштыше кружоклан ынде лу ият темын. Тышке икшыве-влакым визымше класс гыч кумылаҥдат. Тудым директорын административно-художественный паша шотышто алмаштышыже Людмила Фёдоровна Николаева вуйлата.

Бисер дене сылне панном тошто руш технике почеш ыштат: тӱрлӧ тӱсан пырчым шӱртыш кередат да шочшо сӱретым лӱмын ямдылыме рамке дене пеҥгыдемдат. Сӱрет пайрем кумылым шочыкта, вий-куатым пуа, куаным конда да кугешнымашым луктеш.

- Тунемше-влак дене эн ончыч изирак кугытан паша-влакым ыштена, - ойла Людмила Фёдоровна. - Шукыж годым открытке кугытан але тиддечат изирак сӱретым ойырен налына. А вара мастарлыкышт кушкеш да 30 сантиметр лопкытан да тыгаяк кужытан панном да эшеат кугыракым ышташ тӱҥалыт. Тематикыже тӱрлӧ лиеш: пеледыш, янлык але иктаж пейзаж, ты але вес идалыкым ончыктышо кече.

Лу ийыште кружокышто ятыр йочан куанжым ужынам. Нунын дене тӱрлӧ выставкыште участвоватленна. Икмыняр тунемшем Российысе, Юл кундемысе, республикысе да оласе конкурслаште дипломант лийын.

Тиде выставкыш 11-ше классМАША Иыште тунемше Мария Иманаеван эн шуко пашажым ойырен налыныт. Чынжымак, тиде опытан ӱдырын пашаже ятыр да ойыртемалтше.

«Визымше классыште тунемаш тӱҥалмекем, бисер дене тӱрлымӧ кружок кабинет воктене увертарымашым ужынам. Тидын нерген сайынрак пален налаш манын, кабинетыш пуренам, — каласыш Маша. — А туштыжо кугу, мотор да чоным моткоч сымыстарыше ятыр сӱрет кечен! Сандене тыгай сӧраллыкым шочыкташ эше чот кумылаҥынам. Но тидым ышташ пеш куштылгыжак огыл улмаш».

Кружокым вуйлатыше Л.Ф.Николаева тӱҥалтыш занятийлаште тунемше-влаклан бисер дене тӱрлымӧ пашан техникыжым умылтара, а вара нуно лывырге кидышт дене келшыше сӱретым эркын гына шочыктат.

Мариям ынде уста кидмастар манаш лиеш. Тудын, изижге-кугужге шотлаш гын, 60 наре сӱретше погына. Икымше пашаже лыве лийын. Тудым Маша аважлан пӧлеклен.

Тылеч посна М.Иманаева крючок да спице дене пидеш, ырес дене тӱрла, фенечким пуна, куэмыште чия дене сӱретла. Тений ӱдыр школым тунем пытара, сандене пытартыш жапыште кидпашалан шагалрак жапым ойырен.

макиШошо

 «Кажне еҥын шке шонымашыже уло. Тушко шуаш тырша. Мылам  кызыт эн тӱҥжӧ — школым тунем лекташ, экзамен-влакым сайын кучаш, вузыш тунемаш пураш. Изиэм годым парикмахер лияш шоненам. Но илышыште кӱшыл шинчымаш кӱлешан, сандене математике але права дене кылдалтше профессий-влакым ойырен налнем», — ойла тенийысе выпускник.

Марий ӱдырлан кумда йолгорнышто шке пиалжым муаш да тӱрлӧ   шотышто мастарлыкшым нӧлташ тыланена.

пейзаж

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: