"Улам мый Рве-зы-лык!" рубрик, 2017 ий, Пеледыш тылзын 30-шо кечыже

Марий куштымаш кумылжым савырен

Статьян авторжо Анастасия Эманова

Куштызо куанжым, чон ойгыжым куштымаш гоч почын пуэн мошта. Кеч-могай куштымаште кажне движений мом-гынат ончыкта. Ожно куштымаш гоч Юмо деч йӱрым колташ, сай пакчасаскам шочыкташ, осал деч аралаш йодыныт. Кызытат тидыже южо калыкын аралалт кодын. Марий куштымаш шкешотан, сылне. Йӱксӧ гай капкылан ӱдыр-влакын да Онар патыр гай пӧръеҥ-шамычын куштымыштым ончен шер ок тем. Но чылан огыл, марий-влак коклаштат марла сайын куштен моштат, шонем. Тидлан изинек заниматлыман. Пошкырт кундем гыч самырык ӱдыр Светлана Макаева шым ияшак куштымаш секцийыш коштын.

макаеваЭн ончыч эрвел куштымаш-влакым тунемын, вара – тӱрлӧ калык-влакын куштымашыштым. Кызыт марла веле кушта.

Янаул район Атлегач ялын ӱдыржӧ кугу ешыште кушкын. Ешыште ныл икшыве уло, Света – эн изиже. «Шочмо ялысе школыш тунемаш кайымеке, вигак куштымаш секцийыш возалтынам. 6-шо класс марте тушко коштынам. 7-11-ше класслам Янаул оласе кыдалаш школышто тунемынам. Тушто кок ий «Ош пеледыш» ансамблыште куштенам,  тылеч вара районысо тӱвыра полат пеленысе «Ялкын» калык куштымаш ансамбльыш коштынам. Туштат кок ий куштенам. Ансамбльын репертуарже поян. Концертлаште руш, башкир, марий, удмурт, татар, чуваш куштымаш-влакым ончыктенна. Школ деч вара Екатеринбург оласе медколледжыш «Лечебное дело» пӧлкаш тунемаш пурымеке (кызыт кокымшо курсын студенткыже улам), Екатеринбург оласе марий-влакын «Урал кундем» мер организаций пеленысе «Яндар памаш» фольклорно-хореографический ансамбльыш кошташ тӱҥалынам. Ятыр куштымаш конкурслаште мастарлыкем ончыктенам. Шукерте огыл Ачит район Марий Карши ялыште эртыше марий калыкын «Ага-пайрем» областной фестивальыштыже участвоватленам. Да национальный традицийым арален шогымылан да мастарлыклан «Хореографий» номинацийыште дипломант лийынам. «Яндар памаш» ансамбль дене районлаш, тӱрлӧ кундемлаш гастроль дене коштам. Ӱмаште декабрьыште Марий Элыште   лийынам. Йошкар-Ола моткоч келшен. Пеш сылне ола», — палдарыш С.Макаева.

Света «молан хореографий огыл, а медицине корным ойырен налынат?» йодышмлан тыге вашештыш: «Рая ковам (авамын аваже) костоправ лийын. Тудын пашам ыштымыжым ончен, мыйынат медицине пашаеҥ лияш кумылем лектын».

Ӱдыр школышто тунеммыж годым тукымын историйжым шымлен. Индешымше тукым вож марте шымлен да пален налын: ачаже могырым кугезе кочаже Макай МурзабаевичМурзабаев граждан да Кугу Отечественный сар-влакым эртен да мӧҥгыжӧ пӧртылын. Кызыт Света утларак жапшым тунеммылан ойыра, но ончыкшым тукым вожшым келгынрак шымлаш шона.

С.Макаева яра жапше годым куржталеш, телым ече да коньки дене коштеш. Канымыла, диваныш шинчын, крючок але спице дене пидаш йӧрата. Тидлан тудым ӱдырын шым ияш улмыж годым Рая коваже туныктен. Светан пашаже-влак сылне улыт. Йодмо почешат пидеш, утларакшым йоча-влаклан ышташ йодыт манеш.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: