"Айдеме да закон" рубрик, 2017 ий, Пеледыш тылзын 23-шо кечыже

Машина молан йӱла?

Статьян авторжо Светлана Кушакова

Тений автомашина йӱлымӧ индеш случайым пален налме. Тул пижме амал-влакым шымлаш гын, кум случайыште тулым лӱмын пижыктыме. Чӱчкыдын вашлиялтше вес амал – транспортный средстван механизмжын, системыжын локтылалтмышт.

«Йошкар-Ола» ола округын надзор пашам шуктышо пӧлкаже машина оза-влакым тӱткырак лияш да шке машинам технически сай состоянийыште кучаш, заводской инструкцийын йодмыж дене келшышын кучылташ да обслуживатлаш, тыгак пожар лӱдыкшӧ ынже лий манын, тидын шотышто правилым шукташ йодеш. Изи машиналаште лийше пожар-влак водитель-шамычын пожар ваштареш кучедалаш да тудым жапыштыже чактараш ямде огыл улмыштым ончыктат. Мутлан, машина двигатель йӱлаш тӱҥалмеке, машина капотым почаш огеш йӧрӧ, молан манаш гын пурышо кислород тулым утыр ылыжта. Тыгай годым капотым 3-4 см веле почман, тушко огнетушитель раструбым шӱшкын, тулым йӧртыман. Йӱлаш тӱҥалмым жапыштыже шекланыман . Тидым шарлыше бензин пуш, капот йымач лекше шикш пален налаш полшат.

Автотранспортысо пожар лийме вес амал – кӱчык замыканий. Тудо тӱҥ шотышто электрический нагрузкым ешарымылан кӧра лиеда. Мутлан, энергийым чот кучылтшо уто прибор-влак дене пайдаланыме тышке конден кертеш. Тыгай годым изоляций да контакт-влакын могай состоянийыште улмыштым шекланыман. Тидлан специалистым ӱжаш сайрак. Машинан электрический системышкыже уто устройствым пуртымым завод-изготовитель ончылгоч терген да палемден огыл. Садлан тидыжак кӱчык замыканийым луктын кертеш.

Весе — автомашинам ятыр жап кучылтмо годым топливо шланг локтылалтеш але кӱрлеш. Тыгай годым бензин пар тулойып улмо годым але двигатель, выхлопной коллектор ырен кайыме годым ылыжеш.

Палемдыман, машина 5-10 минутышто йӱлен пыта, садлан тулым пеш содор йӧртыман.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: