"Ӱшанем... Вучем..." рубрик, 2017 ий, Пеледыш тылзын 2-шо кечыже

Мо улыжым аклыза

Статьян авторжо Татьяна Айтова

Салам лийже, газетым лудшо йолташ-влак. Тыланда шке шонымашем возен колтем. Тудо пайдале лиеш манын ӱшанем.

Ятыр ӱдырамаш шке илышыжлан вуйым шиеш. Пелашыже уда, ава лийшыже осал, икшыве-влак  мутым колыштдымо улыт да тулеч молат. Чыла тидыже кумылым волта,  вийым пытара. Илышыште эре тыге: кӱжгӧ капкылан еҥ-влак каҥгешташ шонат, шоҥгыжо  самырык лийнеже, поянлан  эше утларак пояш кӱлеш.  Тыгодым мо улыжым аклен огына мошто. Таушташат огына вашке.

Теве ик палыме ӱдырамаш ятыр ий икшывым ыштен кертын огыл. Вара ЭКО йºн полшымо дене ӱдыр азам ыштен. Ик ий гыч шке мӱшкыраҥын. Кокымшыжат ӱдыр шочын. Но тудо эргым вучен, садлан кумылжо волен. Тынар ий орланымек, кок йочан ава лияш пиал огыл мо?

Кокымшо палымем  — кум шочшан ава. Но тудат шкенжым пиаланлан огеш шотло. Пашаш вашкерак лекташ, у должностьым налаш шонен коштеш. Таза икшыве, ӱшанле пелаш – тиде куан огыл мо?

Мыят теве пелашем дене тӱрлº кӱлеш-оккӱллан эре вурседылынна. А кок ий ончыч уке лиймекыже, йоҥылышем умыленам. Сурт-сомылкамат шкет вораҥдарем, шинчын мутланашат нигº дене. Чонлан моткоч йокрок.

Газетым лудшо йолташ-влаклан каласыме шуэш: кажне кечылан куанен илыза. Мо улыжым аклыза, лишыл еҥда-влаклан таушташ ида мондо. Пиалым сулен налаш кӱлеш.

Эльвира.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: