"Рубрик деч посна", 2017 ий, Пеледыш тылзын 23-шо кечыже

Национальный йылме-влак дене 14 газет савыкталтеш

Статьян авторжо Светлана Кушакова

Кодшо арнян, кугарнян, мемнан газет редакцийыш Дагестан Республик гыч уна, журналист, «Молодежь Дагестана» газетын тӱҥ редакторжо, межэтнический журналистике гильдийын еҥже Рамазан Раджабов толын ыле. Мыланна «Кугарня» газет гаяк Дагестаныште самырык-влаклан газет кузе ила, газет лаштыклаште могай темым тарватат, савыктыш кузе вияҥын толеш, пален налаш оҥай лийын. Национальный йодышымат тарватыме.

раджабов«Молодежь Дагестана» газет кажне арнян ик гана лектеш. Тиражше – кум тӱжем наре экземпляр. Рамазан Раджабов кумшо тылзе тудым вуйлата. Тылеч ончыч Дагестаныште эн шуко тиражан – 17 тӱжем — «Новое дело» мер-политике газет редакцийыште кум ий пашам ыштен, политике шотышто пӧлкан редакторжо лийын. Тӱҥ редакторын алмаштышыже марте кушкын. А такшым Рамазан журналистике сферыш йӧршын вучыдымын логалын. Тудо Дагестанысе кугыжаныш университетын историй факультетшым тунем пытарен, религиоведений дене специалист лийын. Историй науко кандидат. Тиде теме денак икмыняр изданийын йодмыж почеш статьялам возаш тӱҥалын, вара газет пашаш ӱжыныт.

«Эн ончыч мыйын ончылнем газетым лудшо-влакым «самырыкештараш» задаче шоген. Тидлан интернетыште тудым утларак вияҥдаш кӱлын. У сайтым ыштыме, газетын кагазан версийжын дизайнжым вашталтыме. Коллективым тидын шотыш налын шелаш логалын, иктышт электрон, весышт кагазан версийлаште пашам ыштат. Сайтыште да газетыште статья-влак ойыртемалтын кертыт. Газетыштына самырык-влаклан утларак келшыше темым тарватена. Дагестаныште спорт сайын вияҥше. Кучедалмашын тӱрлӧ видше дене ятыр спортсмен сай результатым эреак ончыктат. «Анжи» футбол команде уло. Спортсмен-влак дене палдарена, проблемышт нерген каласкалена.У технологий, тӱвыра, аналитике сынан статья-влак поснак самырык-влаклан поснак келшат. Лудшына-влак сайтыште утларак ешаралтыныт», - ойла самырык редактор.

Дагестан Республикыште 33 национальностян калык ила: авар, даргин, кумык, табасаран, азербайджан, ногай, цахур, чечен-акин да молат. Нине йылмыла дене книга, газет савыкталтыт, радио, телевидений пашам ыштат. А моло калыкын йылмыже-влак возыктыш деч посна улшылан шотлалтыт. Дагестаныште национальный йылме-влак дене 14 газет лектеш. Нуно республикысе национальный политике да информаций министерствын полшымыж дене савыкталтыт.

Рамазан Раджабов Марий кундемыш тылеч ончычат толын коштын улмаш. Икмыняр ий ончыч Курыкмарий районышто Козьмодемьянск олаште лийын. Мемнамат шке шочмо кундемыкыже пагален, унала ӱжӧ.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: