"Улам мый Рве-зы-лык!" рубрик, 2017 ий, Пеледыш тылзын 2-шо кечыже

Поян марий культурнам аклен мошта

Статьян авторжо Анастасия Эманова

Марий тӱням почын пуымо ик эн сай йӧн – калыкын куштымашыже. Марий куштымашым вӱд йогымо да тул йӱлымӧ семынак эре ончаш лиеш, шонем. Тудо кумылым савыра, чоным куандара. Морко район Токперде ялын шочшыжо Дмитрий Пайбулатов изинек кушташ йӧрата. Самырык рвезе — МарГУ-со «Марий мурсем» ансамбльын участникше. Тылеч посна тудо «Цармис» куштымаш театрыш коштеш.

пайбулатовДима 8-ше класс марте Шеҥше кыдалаш школышто тунемын, а вара Йошкар-Олаш политехнический лицей-интернатыштолын. «Школ пагытым порын шарналтем. Лишыл еҥем, ялысе йолташем-влак деч тораште лийынам. Лачак олаште тунемме годым марий йылме поянлыкым, тӱвыранам аклаш тӱҥалынам. Тидлан кӧра лицей деч вара МарГУ-ш марий йылмым да литературым туныктышылан тунемаш пуренам. Кызыт кокымшо курсын студентше улам. Тылеч посна англичан да финн йылме-влакым тунемам», — ойла Д.Пайбулатов.

Дима сценыште йоча годсек выступатла. Тудо огешат шарне, кунам кушташ тӱҥалын. Мӧҥгыштыжӧ фотографий уло, тушто тудо, але ньога веле, сценыште шога. «Марла кушташ чот йӧратем. Славик Михайлович Асмаевын вуйлатыме «Цармис» куштымаш театрыш кошташ тыршем. Коллектив репетицийым кечывал деч вара кок шагат годым эртара, садлан чылаж годым толын ом шукто, занятийыште улам. Театр коштшо ӱдыр-рвезе-влак моткоч чаткан да моторын куштат. Ончен  куанет. Мый тыге эше ом мошто. Нуно марла веле огыл, тыгак моло калык-влакын национальный куштымашыштым куштат. А «Марий мурсем» ансамбльын ик репетицийжымат ом кодо. Тудо кастене лиеш. Ансамбль дене февраль-апрельыште гастроль дене районлаш коштынам. Кужэҥер, Морко велыште лийынна. Эре сайын вашлийыныт. А шукерте огыл Йошкар-Олаште «Шома Бас» куштымаш  кокымшо тӱнямбал фестиваль-конкурс эртаралтын. Тушто коллективна кокымшо степенян лауреат лийын», — манеш Дима.

Студент тӱрлӧ шанче конференцийлаште участвоватла. Ӱмаште Чебоксарыште «Человек. Гражданин. Учёный» регион-влак кокласе науко фестивальыште лийын. Тушто тудо «Марий Википедий интернет-энциклопедийыш Макс Майнын творчествыже, ешыж нерген материаллам вераҥдымаш» теме дене докладым ыштен да тидлан кокымшо верым налын. Дима ӱмаштак Ханты-Мансийск олаш миен. Тушто тудо да Марий Эл гыч эше кум студент «Югра многоликая» многоязычный антологий негызеш «Марий сылнымут» лаштык сылнымут гостиныйыште мастарлыкшым ончыктен. «Изирак класслаште почеламутым возкаленам. Кызыт ом возо. «Югра многоликая» мероприятий мыйым куандарен. Тушто марий тувырым чиен, калыкнан мурымаш-куштымашыжым ончыктенна, вес национальностян еҥ-влакым марий йылмын поянлыкше, поэзийна дене палдаренна», — ойла рвезе.

Дима – ончылныжо цельым шынден моштышо рвезе. Тудо изинек пеҥгыде койыш-шоктышан кушкын. Рвезын тӱҥ эҥертышыже – аваже. Людмила Владимировна Йошкар-Оласе ик эмлымверыште медсестралан пашам ышта. Тудо шкетын икшывыжым йол ӱмбаке шогалтен, ушан да шотаным куштен моштен. Дима аважым йӧрата, перега да тудлан полшен шога. Тунемаш коштеш, мӧҥгысӧ сурт сомылкам ышта, а кеҥежым эше оксам ыштен налаш манын, пашам кычалеш. Ӱмаште, мутлан, кафеште ороллан ыштен. «Ялыш коштыда мо?» манын йодмемлан тудо тыге вашештыш: «Олаште ынде икмынярымше ий илена. Ялыште ковам вуча. Кертме семын туддеке эреак коштына».

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: