"Кидмастар" рубрик, 2017 ий, Пеледыш тылзын 23-шо кечыже

Сылне арвержым Европышто, Америкыште налыт

Статьян авторжо Анастасия Эманова

Кажне кидмастар пашаже сылне, шкешотан лийже манын, тыглай огыл материалым кучылташ тырша. Тыгай куэмлан фоамираным шотлаш лиеш. Фоамиран, але вес семынже пластичный замше, у материаллан шотлалтеш. Тудым Российыш утларакшым Иран да южгунам Китай гыч кондат. Звенигово район Красногорский посёлкышто илыше марий кидмастар Олеся Кошкина фоамиран нерген чыла пала. Тудын пашаже-влак сылне, чатка да таҥастараш лийдыме улыт.

l2RJoIbYsdYВолжский район Яльчик посёлкын шочшыжо фоамиран гыч тӱрлым ышташ кок ий утла ончыч кумылаҥын. «Йоча дене шинчыме годым кидпашам ыштыме шуын. Эн ончыч канзаши технике дене пеледыш-влакым ыштен онченам. Но шуко огыл, ты пашам шуэнам. Налме материал-влак идалык утла яра киеныт. Вара интернетыште фоамиран гыч пеледышым ыштыме шотышто мастер-классым ужынам. Пеш келшыш. Роза пеледышым ыштен онченам. Но икымше «мелнам» куаным конден огыл да адакат кидпашам ыштымым чарненам. Тунам мый шке гыч шовыным шолтымо пашалан кумылаҥынам. Икмыняр жап гыч эше ик гана фоамиран куэм гыч пеледышым ышташ шинчынам. Ынде идалык утла лач ты куэм гыч моторлыкым шочыктем. Реалистичный флористике дене заниматлем. Фоамиран гыч ик пеледышым ышташ эн шагалже кок шагат кӱлеш. Паша кугу чытышым йодеш. Кажне пеледыш лышташым посна шулман (выкроить), пӱчкедыман, кӱлеш семын чиялтыман. Ончыч акрил чиям кучылтынам гын, кызыт кукшо  да ӱян пастель дене чиялтем, тыге пеледыш утларак сылнын да илыше гай коеш. Вара тудлан утюг дене термообработкым ыштем да парня дене, шукыж годым вӱдотыза налмеш, туржам. Ыштыме пашамым пӧлеклаш ом вожыл, палем: тудо сае», - каласыш Олеся.

0jX2mGnbqw4Кидмастар фоамиран куэмым шукыж годым интернет гоч заказатла. Кевытлаште ты материалым шагал годым муаш лиеш. «Фоамиран – шулдакан куэм, но кеч-могай пашам ыштыме годым тӱрлӧ фурнитурым, чиям кучылтам. А нуно шергакан улыт. Но чон-кумыл пашамлан оксам ом чамане. Эркын-эркын сӱан флористикыш куснем. Марлан кайышашлык ӱдыр-влаклан сӱан пеледыш аршашым ыштем. Тудо огеш лывыжге, йӱран игечыштат шке формыжым куча да шуко жап аралалтеш. Ик сӱан аршашым ышташ кок арнярак жап кая. Но мыйын рекордем – вич кече. Кочде-йӱде манме гаяк, кечеш кандаш шагат пашам ыштенам», — палдарыш О.Кошкина.

sXSXKF74jxsОлеся экономический образованиян ӱдыр. Творчествылан тудо йоча годсек шӱман. Мураш-кушташ йӧрата, Приволжский посёлкысо фортепиано класс дене музыкальный школым тунем пытарен. Изиж годым курчак-влаклан тувырым шкеак урген. «Ешыштына кидмастар-влак шукын лийыныт да улыт. Кугезе ковам, ковам, кокам-влак тӱрлызӧ лийыныт, ачам сайын сӱретен. Женя акам марий тӱран тувырым пидеш, урга, национальный сӧрастарыме ӱзгар-влакым ышта. 

DOnsA7e6ZTEМый мастарлыкем нӧлташ кажне кечын тыршем, тидлан эре улан тунемам. Пеледышым ыштыме шотышто чыла техникым палем манын кертам. Фоамиран деч посна тудым полимерный шун, атлас тасма, порсын куэм гыч ыштат. Но фоамиран паша-влак чонемлан утларак келшат. Тыгай пеледыш гыч пуракым  лапчык дене ӱштын налаш да фенысе йӱштӧ юж дене кошташ лиеш. Мӧҥгыштем шкемын илыше ик пеледышат уке, лач пелашемын вич фиалкыже уло. Йодмо почеш интерьерный пеледыш-влакым ыштем. Шукыж годым – орхидейым. Fi23UrZ-F00Ӱмаште латвич орхидейым ышташ йодыныт. Кокла чот дене тудо илыше пеледыш гаяк тӱжем теҥгем шога. Заказ-влак ситат. Каче-влак ӱдырыштлан пеледышым ышташ йодыт. Тидыже моткоч кумылым нӧлта. Пеледыш аршаш деч посна тӱрлӧ ободокым, заколкым, брошкым да моло сӧрастарыме ӱзгарым фоамиран гыч ыштем. Нуным йотэллашкат колтедем. Пашам-влакым Вконтакте, Инстаграм, Фейсбук, Одноклассники соцсетьлаште ужаш лиеш. Интернетыштее йот ярмиҥга площадкыш лектам. Утларакшым Европышто илыше еҥ-влак налыт. Тушко вашкерак миен шуэш. Америка гыч заказ шагалрак, туге гынат южгунам тушечат йодыт. Мутлан, шукерте огыл gDZCIWXhkfIСанта-Барбара олаш брошьым колтенам.   

9 ияш эргым да 2,5 ияш ӱдыремат кидпашамым ончаш йӧратат. Эргымже южгунам полша. Тудын дене пырля тений У ийлан фоамиран гыч агытаным ыштенна да республикысе  йоча кидпаша конкурсышто кокымшо верым сеҥен налынна.o5JdugnXWSs

Кодшо ий годсек мастер-классым эртарем. Кутырен келшен, мый декем але мый нунын деке лектын, занятийым эртарем. Пеледышым ныл ӱдырлан ышташ туныктенам. Коктынжо сай йолташ лийыныт да нуно келшымышт лӱмеш орхидейым ыштыме шотышто мастер-классым эртараш йодыныт», - ойла кидмастар.

Олеся пашалан чон шокшыжым пуа. Тудын ыштыме пеледыш, сӧрастарыме ӱзгар-влак чатка улыт. Тидыже тӱрлӧ конкурслаште пеҥгыдемдалтын.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: