"Айдеме да закон" рубрик, 2017 ий, Пеледыш тылзын 23-шо кечыже

Угарман кундемыште моторлыкшым ончыкта

Статьян авторжо Светлана Кушакова

Кодшо арнян, 17 июньышто, Йошкар-Оласе Самырык-влакын полатыштышт «Мисс УИС» моторлык конкурс эртен. Наказанийым шуктышо федеральный службын республикысе управленийыштыже паша шкешотан гынат, тыште ятыр ӱдырамаш тырша. Мутат уке, пашаште нуно дисциплиным кучат, ответственный улмыштым ончыктат, пеҥгыде койыш-шоктышан да виян улыт. Но конкурс участнице-влакым икмыняр жаплан паша нерген мондыктен да шке моторлыкыштым, мастарлыкыштым, усталыкыштым ончыкташ йӧным пуэн.

Мисс УИС - Екатерина БарановаКонкурсышто уголовно-исполнительный системын тӱрлӧ подразделенийлаже гыч кандаш ӱдырамаш таҥасен: Ольга Петухова — 5-ше №-ан исправительный колонийын охране пӧлкажын изирак инспекторжо, Екатерина Злобина — 3-шо №-ан исправительный колонийын оперуполномоченныйже, Галина Исаева — 6-шо №-ан исправительный колонийын изирак инспекторжо, Олеся Еремеева — Йошкар-Оласе следственный изоляторын охране пӧлкажын операторжо, Ирина Моисеева — 4-ше №-ан исправительный колонийын социальный паша шотышто кугурак специалистше, Элеонора Смотрина — Россий ФСИН-ын 12-шо медико-санитарный частьшын военно-врачебный комиссийжым вуйлатыше, Екатерина Баранова — уголовно-исполнительный инспекцийын инспекторжо, Мария Сафина — 7-ше №-ан исправительный колонийын инспекторжо.

Участник-влак конкурсын икымше этапыштыже теорий, строй дене коштмаш, кучедалмаш, иймаш, лӱйкалымаш, физический подготовко дене зачётым сдатленыт. Тидын нерген кажныже видеороликым ямдылен. Но конкурсын творческий ужашыже утларак тургыжланаш таратен. Вет тыште ончышо-влакым савырен моштыман. Конкурсант-влак кажныже шке пашашт нерген каласкаленыт. Икте сценке, весе муро, кумшо куштымаш гоч тидым почын пуэныт. Екатерина Злобина«Опера» мурыж дене ончышо-влаклан поснак келшен.

Конкурсын чоным савырыше ужашыже – Марий кундемын историйжым каласкалымаш. Ӱдыр-влак марий тувырым чиеныт, марий калыкын патырже, национальный геройжо-влак нерген сылнын каласкаленыт. Акпарс, Онар, Акпатыр, Болтуш, Эпанай, Чумбылат, Овда, марий калык шочмо нерген легенде ден преданий-влак сценыште йоҥгеныт. «Тӱрлызӧ-влак» марий куштымашым куштен ончыктеныт. Тудым «Марий Эл» кугыжаныш куштышо ансамбль гыч Наталья Смирнова шындаш полшен.

Куштымаш дене кылдалтше эше вес номер-влак лийыныт. Конкурсантке-влак бурлеск да квикстеп гоч шке усталыкыштым почын пуэныт.

Мутат уке, моторлык конкурс дефиле деч посна огеш эрте. Ынде сценышке мотор тувыран ӱдыр-влак лектыныт.

Жюрилан, тудыжым Российын сулло, республикын калык артистше Юрий Синьковский вуйлатен, УИС миссым ойыраш куштылгак лийын огыл. Пел шагат каҥашымаш деч вара эн ончыч «Вице-Мисс УИС»-ым палемденыт. Ты лӱмым Мария Сафина сеҥен налын. Тудак интернет йӱклымаш годым эн шуко йӱкым поген да «Телемисс» лийын. Моло конкурсантке-влакат титул деч посна кодын огытыл. Ончышо-влакын кумылыштым савырыше мисслан Ольга Петухова шотлалтын. «Граций мисс» Екатерина Злобина, «Профессионализм мисс» Галина Исаева, «Очарований мисс» Олеся Еремеева, «Подиум мисс» Ирина Моисеева лийыныт. «Чолга ӱдыр» лӱм дене Элеонора Смотрина палемдалтын.

А сеҥыше да «Марий Элын УИС миссше» Екатерина Баранова лийын. Екатерина — элгӧргӧ службын кугурак лейтенантше. Тудо уголовно-исполнительный инспекцийыште улыжат ик тылзе пашам ышта, ФСИН-ын Пермь оласе юридический институтым тунем пытарен. Туге гынат тудлан инспекцийын чапшым аралаш ӱшаненыт. Катя нунын ӱшаныштым шуктен. Самырык ӱдырын чылажат эше ончылно. Ешым погаш, пашаште у кӱкшытыш шуаш. Яра жапше годым книгам лудаш йӧрата. М.Булгаковын «Мастер и Маргарита» романже келша. Кызыт ончылныжо эше вес паша – республикысе управленийын чапшым Юл кундем федеральный округышто тыгаяк конкурсышто аралаш. Тудо вашке Нижний Новгородышто лиеш.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: