"Рубрик деч посна", 2017 ий, Пеледыш тылзын 20-шо кечыже

Югорскышто — марий сӱан

Статьян авторжо Эльвира Терентьева

Хант-Манси автономный округысо Югорск олаште марий-влак шукын илат. Сафаргалеевмыт ешыште кушшо Ренатам марий ӱдыр манаш лиеш. Ачаже суас гынат, тудо аваж, коча-коваж дене марла мутланаш тырша. Вет ятыр кеҥежым тудлан Марий Турек посёлкышто коча-коваж дене эртараш логалын. Марий кундемыште ӱдыр канаш моткоч йӧрата, шуко йолташыже тыште ила. Кызытат тудо пӱртӱс лоҥгашке толаш шона.

Р.Сафаргалеева тений Югорск оласе гимназийыште 8-ше классым тунем пытарен. Ача-аваже эше йочасадыш коштшо ӱдырым сӱретлаш йӧратымыжым ужыныт, садлан подготовительный группыш коштмыж годым художественный школыш колтеныт. Тушто Рената индеш ий тунемын. Кодшо кечылаште тудлан аттестатым кучыктеныт. А тушто — чыла предмет дене «визытан»! Тидлан кӧрак йоча сымыктыш школын директоржо лӱм дене Светлана Георгиевна ден Денис Юнисовичлан Тауштымашан грамотым пуэныт.

Аваже да сӱретше дене

Чынжымак, Ренатан сеҥымашыже ятыр лийын: «С днем рождения, художка» конкурсышто (2012) – 1-ше вер; «Мы будущее России» сӱрет конкурсышто (2012) – 2-шо вер, а баннерым ыштыме шотышто – 1-ше вер; «Терроризм-угроза обществу!» конкурсышто (2013) – 2-шо вер да молат.

Сӱретлаш тунемше-влакын классышт кугуак лийын огыл. Эн ончыч тушко 10 йоча толын, а выпускной класс марте куд ӱдыр тунемын. Тыште тӱрлӧ мероприятий эртаралтын, йоча-влак Петербургыш, Москош экскурсий дене миен коштыныт, лӱмлӧ художник-влакын мастер-классыштышт лийыныт. Классым Наталья Юрьевна Тарасова вуйлатен. Тудо «Рисунок», «Живопись», «Композиция», «Пленер», «Декоративная композиция» предмет-влакым туныктен.

Р.Сафаргалеева диплом пашажлан марий тӱнясе ик кугу событийым – марий сӱаным – ойырен налын да композицийжым «Ял покшелне сӱан» манын. Ренаталан тиде сӱретым возымаште класс вуйлатышыж деч посна землячкына, сӱретче Людмила Борисовна Михайлова полшен.

«Тыланет марий сӱан теме молан лишыл?» манын йодмемлан самырык сӱретче 2015 ийыште «Радуга» национальный культур фестивальыште сӱан йӱлам ончыктымаш путырак келшен мане. Тунам тудо марлан кайышаш ӱдырын образшым почын пуэн. Каласыман: Рената — Югорскышто марий мер организацийын чолга участницыже.

Мо оҥайже: дипломым аралыме кечын Рената 15 ийым темен. Шочмо кечышкыже унала толшо коча-коваже тудым эше художественный школым «визытанлан» гына тунем пытарыме дене саламленыт.

Кодшо ийын Сафаргалеевмыт «А у нас в семье традиция» конкурс-фестивальыште участвоватленыт. Тыгодым нуно «Мой край Марийский милый» презентаций пашам ончыктеныт.

А такшым Рената бортпроводнице профессий нерген шонкала. Тудлан канде кавам, ошалге-канде тӱсан пыл лапчык-влакым ончаш келша. Лач тыгае сӧраллыкым эскерен, ӱдыр вий-куатым налеш да илымыжла чучеш.

Эльвира Терентьева.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: