"Сылнылык тӱня" рубрик, 2017 ий, Сӱрем тылзын 21-ше кечыже

Артист калыкым искусствылан шӱмаҥдышаш

Статьян авторжо Анастасия Эманова

Пашам ышташ йӧратыше, мастарлыкшым эре нӧлтышӧ, талантшым пайдалын кучылтын моштышо. Тыге ойлаш лиеш самырык артист, ГИТИС-ын выпускникше Виктор Апталиков нерген.

Тудо лым лийде эре ала-мом уым кычалеш, творчествышкыже у шӱлышым пурташ тырша. Кызыт лекше кок у мурыжо: «Кычалам моторем», «Йӧратымаш ила» —  ончычсыж деч ойыртемалтыт. Поснак самырык-влак нуным йӧратен колыштыт, шонем.

z_645e5cf6 - Виктор, кызыт тый Aptalik лӱм дене калык ончыко лектат. Псевдонимым налмын амалже могай?

- Соцсетьлаште мый Апталик лӱм дене улам. Ик ялыште лиймем годым кова мый декем толын да палемыс тыйжым, Апталик улат вет манын ойлен. Тунам фамилием кӱчыкемден, муро-влакым у лӱм дене возаш кӱлеш шоналтенам.

- Палем, звукозапись студийым почаш шонымашет лийын. Кузерак тидын шотышто пашат кая?

- Посна пӧлемым ом айле. Мӧҥгыштӧ йӱкым возышо чыла оборудованием уло. Мурем-влакым шкемын студийыштак возенам. Кызытеш чылаже ныл муро ямде. Кокытшым эше калыклан палдарен омыл.

- Самырык возкалыше Христина Александрова дене пырля пашам ыштет. Кунам тудын дене вашлийынат? Мо дене тудын творчествыже молын деч ойыртемалтеш?

- Христина дене идалык ончыч палыме лийынам. Мутланыме годым шукылан шонымашнан, илыш умылымашнан, творчествылан шинчаончалтышнан икгайлыкыштым умыленна. Тылеч вара мурым пырля возаш кутырен келшенна. Такшым марла почеламутым возышо-влак шукын улыт. А сайжым- укежым ойлаш тиде вес йодыш. Палыме поэт-влакын пашаштым йӧратен лудам. Нуно шуко ужшо, илышым палыше, опытан улыт. Но мыланем самырык еҥ денак пашам ыштыме шуын. Кызытсе самырык тукым марла содыки вес семын кутыра, кызытсе саманлан келшышын манам гын, йоҥылыш ом лий шонем. Шекланенда, ятыр мурышто эре ик мутак, эсогыл предложений йоҥгат. Мый тидын деч кораҥаш тыршем. Калыкым пытартыш жапыште у муро дене от ӧрыктаре. Кызыт утларакшым сай качестве верч огыл тыршат, а шукырак да шукырак лукташ. Мыйын шонымаште, муро молан-гынат туныктышаш, иктаж-могай гынат шижмашым лукшаш да шарнымашеш кодшаш. Саман дене тӧр ошкылман, садлан муро ойыртемалтше, тыгодым калыклан умылаш лийшашлык. Марий йылме, чаманен каласыман, огеш вияҥ да огеш уэм. У шомак-влакым кучылташ лӱдман огыл. Неологизм кажне йылмыште уло, но мемнан ала-молан тиддеч кораҥаш тыршат. Мутлан, IT-технологий нерген марла сайын кузе умылтараш лиеш? Тиде пеш неле. Садлан кызытсе пагытлан келшыше мутым кучылтын, йылме огеш лавырге, мӧҥгешла, пойдаралтеш веле, шонем. Мурыштем руш мутымат кучылтам, тидын дене тудым колышташ марийланат, рушланат, татарланат оҥай, адакшым вес национальностян еҥ-влакын марий йылмым тунемаш кумылышт лектын кертеш. А тыгай мурым самырык возкалыше дене веле возаш лиеш. Христинан творчествыже оҥай да шкешотан. Тудын дене пырля возымо мурына-влакым сайлан шотлем. Мый йӧратем экспериментым ышташ. Тӱрлӧ жанрым пырля ушымаште нимо удам ом уж. «Йӧратымаш ила» мурышто лирический музык да рэп сайын йоҥгат, шонем. Жап вашталтме дене чыла аланыштат у ончалтыш лийшаш. Тиддеч лӱдман огыл.

- Критике лийын?

- Профессионал-влак деч уке. Артист йӧраш тӧчышаш огыл. Мый шке пашамым йӧратен, чоным пыштен ыштем. Икмыняр еҥ мыйым колыштеш гынат, тугеже паша лектышем сай. Ме, артист-влак, творчествына гоч калыкын шӱм-чонжым пойдараш, искусствылан шӱмаҥдышаш улына.

- Тыйым эн ончыч академический йӱкан мурызо семын палена. Йоҥгалтарыме муро-влак кокла гыч «Кузе мый тыйым йӧратем» (тудым эн ончыч Василий Павлов мурен), очыни, калыкыште ик эн йӧратыме. Тыгай сынан лирический муро репертуарыштет кунам ешаралтеш?

- Ӱшанем, тений тиде лиеш. Тудым такшым возымо, калык ончыко лекташ шке жапшым вуча. Шомакше – Геннадий Сабанцевын, семым Валерий Кульшетов келыштарен.

- «Юмынӱдыр» мюзиклыште, «Ял ӱмбалне мужыр йӱксӧ» фильмыште тӱҥ роль-влакым модынат. Эше могай спектакль лийын?

- Йоча да самырык-влаклан театр-рӱдерыште «Синяя птица» спектакльыште модынам. Шкетан лӱмеш театрын коллективше дене кыл сай. Тушто эртарыме тӱрлӧ концертыште мураш чӱчкыдын ӱжыт.

- Могай у проект дене эше калыкым куандараш шонет?

- Шонымаш моткоч шуко. Жап да ӱнар веле ситышт. Чылажым ойлаш ом тошт, но ончыкшым дуэт дене мураш келшыше мурым возаш шонем.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: