"Рубрик деч посна", 2017 ий, Сӱрем тылзын 14-ше кечыже

Буймо ӱдыр, Ныргындыш шешке

Статьян авторжо Эльвира Терентьева

IMG_9257

«Мо оҥайже: мыйын ковам Одо кундемысе Карагӧл район Ныргындыш ял гыч Татарстан Республикысе Агрыз район Шуар ялыш марлан миен. Авам — Шуар марий ӱдырамаш, Буймо ял пӧръеҥлан марлан лектын. Агрыз районышто Буймо, Кӧлегеш, Кӱанэҥер, Шуар марий ял-влак улыт. А мый мӧҥгеш коваемын шочмо кундемышкыже, Ныргындыш ялыш, марлан миенам. Пелашем – строитель. Пошкудо коттедж посёлкыш да моло вереат чоҥымо пашам ышташ коштеш», — тӱҥале шкеж нерген каласкалаш Анжелика Самарина.

Анжелика дене Марий самырык тукымын IX слётыштыжо палыме лийым. Ныргындыш школышто педагог-организаторлан пашам ышта. Удмурт кугыжаныш университетысе йот йылме да литератур факультетшым тунем пытарен. Шушаш тунемме идалык гыч тунемше-влаклан англичан йылмым туныкташ тӱҥалшаш. А кызыт школыштышт йоча-влак немыч йылмым тунемыт.

Слётышко йолташ ӱдыржӧ Надежда Ильина дене пырля толыныт. Тений Ныргындыш ялыште 17 июньышто Сабантуйышто кумытын: Анжела, Надя да Юлия Белоусова – мурым муреныт.

IMG_9255

«Мыланем сценыште мураш келшыш. Шукертсек иктаж марий мероприятийыште лияш шоненам, тидлан йӧнем лийын огыл. Теве ынде эргына изиш кушкын, куд ийым темен. Ты слётыш логалмемлан моткоч куаненам. Кызыт «Ныргындыш сем» ансамбльышке кошташ кумылем шочын. Шекланенам: Буймышто илыме годым марла моторынрак ойлымела чучеш, вет Ныргындыш ялыште шукынжо рушла кутырат. Ижевск олаш каят да ик ял гыч улыт гынат, икте-весышт дене марла огыт мутлане, мондат. Марий ача-аван йочаштат рушла веле ойлат. Мый Буймо школышто марий йылме ден литературым тунемынам, а тыште ик урок — марий литератур веле. Йоча-влакым тидлан Лидия Афанасьевна Иудова шӱмаҥда. Чумыр ончымаште марий йылме мондалтеш, кеч йочасадыште шукерте огыл марий концертым эртараш тӱҥалыныт. Мыйынат эргым рушла веле ойла. Ме чыланат: кова-кочай, ача-ава — мӧҥгыштӧ марла кутырена. Борис йочасадыш кайыш, рушла ойлаш тӱҥале. Марла йодам гынат, рушла пелешта. Южгунам «Авай» манешат, умбакыже рушла йодеш. Акцентшат уло», — каласыш Анжела.

Ныргындыш школ национальный школлан шотлалтеш веле, а педсоветшат, моло мероприятийжат рушла эртаралтыт. Марий йылмым, мурым ты кундемыште февральыште «Ший кандыра» фестивальым да апрельыште Марий талешке кечым эртарыме годым веле колыныт. Ӱмаште школышто Марий талешке кечым кугу концерт да тӱрлӧ презентаций дене палемденыт, а тений тиде теме дене классный шагатыште мутланеныт.

Марла кушташ икшыве-влакым йочасадыште туныктат. Ты сомылым марий кумылан туныктышо Надежда Михайловна Иванова шукта. А школышто тыгай кружокшо укеат. Но школын шке йӱлаже уло: кажне ийын декабрьыште йоча-влак калыклан концертым ямдылат. Тушто марла мурымо, куштымо номер-влак эре улыт. Руш икшыве-влакат тывырдыкым куштат, нунылан тиде келша. Вара ты окса дене йоча-влаклан У ий пӧлекым налыт.

2016-2017 тунемме ийыште Ныргындыш школышто 75 икшыве тунемын. Тӱҥалтыш класслаште кок классым ик туныктышо туныкта, 1-ше ден 4-ше да 2-шо ден 3-шо пырля улыт.

А.Самарина тыгак Ныргындыш тӱвыра пӧртын пашаеҥже-влакын шке пашаштым тыршен шуктымышт нерген каласкалыш. Тушто йоча-влаклан «Висвис», а кугыеҥ-влаклан «Ныргындыш сем» ансамбльыште шке мастарлыкыштым ончыкташ йӧн уло. Тӱвыра пӧртым Жанна Ивановна Якимова вуйлата. А ансамбль-влакын художественный вуйлатышышт – марий писатель Илья Ломберскийын шешкыже Надежда Васильевна Токмурзина. Чыла тидын нерген Анжелика Самарина ден Надежда Ильина слётлан шочмо кундемышт нерген ямдылен кондымо презентацийыштышт каласкалат.

Эльвира Терентьева.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: