"Улам мый Рве-зы-лык!" рубрик, 2017 ий, Сӱрем тылзын 21-ше кечыже

Илыме условий экономике дене кылдалтын

Статьян авторжо Светлана Кушакова

13 июльышто Марий Эл Республикым вуйлатыше сомылым жаплан шуктышо А.Евстифеев дене вияш линий лийын. Тудо 19 шагатыште тӱҥалын. Республикыште илыше кажне еҥ тургыжландарыше йодышым пуэн кертын. Онлайн трансляций МедиаПоток, Мариамедиа сайтлаште каен, «ТВ Регион 12», «Россия 24» телеканаллаште прямой эфир лийын. Йодыш-влакым моло СМИ-влакат погеныт. Ленин лӱмеш тӱвыра полат воктене погынышо еҥ-влаклан шке йодыш дене вияш эфирыш лекташ йӧн ышталтын. Чылаже 2000 утла йодыш пурен.

Ик шагаташ эфир чыла йодышлан вашешташ ситен огыл. Йодыш-влакым шымлен лекташ гын, нуно тӱҥ шотышто экономике, корно, пашадар, тазалыкым аралыме, социальный теме дене кылдалтыныт.

Эн ончыч А.Евстифеев республикын экономический положенийже дене палдарен. Экономикын вияҥмыж дене калыкын илыме условийже чак кылдалтын. Кызытеш республикын коммерческий банк-влак ончылно 14 млрд. теҥге парымже уло. Тудым, мутат уке, петырыман, процентым тӱлыман. Тидым ышташ неле, молан манаш гын республикын бюджетше изи — 26 млрд. теҥге, тушеч пелыже — калык деч налме доход, молыжо — федеральный дотаций. 6 июльышто Россий Счётный палате терген лектын. Тыгодым парымын эшеат кугурак улмыжо рашемын.

Йоча-влакым школлашке шупшыктымо, «вашкеполыш» машина-влакым алмаштыме шотышто ятыр йодыш лийын. «Наливайке»-влак ваштареш кучедалме йодыш шукертсек шога. Тидын шотышто А.Евстифеев каласен: калыклан паша вер да сай пашадар лиеш гын, тыгай заведенийыш каяш шонымаш шагал годым шочеш.

Корным олмыктымо шотышто ятыр йодышым пуэныт, южыжо фотомат войзен колтен. Республикыште 98 процент корно пеҥгыдемдыме стандартлан келшен огеш тол. Чылажымат шотыш кондаш 52 млрд. теҥге окса кӱлеш, тидыже республикын идалыкаш бюджетше деч кок пачаш шукырак. Садлан ты проблемым иканаште решатлаш огеш лий. А пашам тӱҥалмеке, качествылан да роскот материаллан эн кугу тӱткышым ойырыман.

Республикын флагше шотышто йодышым нӧлталме. А.Евстифеев каласен: республикын кугыжаныш символикыжым вашталтыме йодыш кучем могырым веле огыл ончалтшаш, тиде пашам калык дене каҥашен ыштыман.

Пытартыш жапыште правительствыште кадр шотышто ятыр вашталтыш лийын. Вуйлатыше деч молан тудо кугу должностьлашке вес кундемла гыч толшо еҥ-влакым шогалта манын йодыныт. Евстифеев тидлан тыге вашештен, тӱҥ шотышто чыла у пашаеҥ Марий Эл дене чак кылдалтын, ончыч тыштак пашам ыштеныт. А тудо шкеже кугу шинчымашан, шке пашам палыше да шкем чыла шотыштат сайын ончыктышо еҥ-влакым акла да тидлан тӱткышым ойыра. А.Евстифеевын илышыж нерген пален налаш шонышо-влакат лийыныт.

Калык дене тыгай мутланымашым икымше гана эртарыме, тидым умбакыжат шуяш шонымаш уло.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: