"Рубрик деч посна", 2017 ий, Сӱрем тылзын 13-шо кечыже

Кугезе мландыште вашлиймаш

Статьян авторжо Эльвира Терентьева

4-10 июльышто Килемар район Арда селаште Марий самырык тукымын IX слётшо эрта. Слётын ик шонымашыже – тӱрлӧ кундемыште илыше самырык ӱдыр-рвезе-влаклан марий калыкын илыме мландыштым ончыкташ. Сандене тенийысе слётын темыже тиддене кылдалтын: самырык тукым шочмо мландым кузе уэмдаш, вияҥдаш але шочмо верлан у шӱлышым пуртымо шотышто шонкала, тӱрлӧ пашам темла. А вараже илыме верлаштыже нине паша-влакым илышыш шыҥдараш тыршышаш. почмаш

Слётышто 70 наре еҥ участвоватла. Нуно Пермь, Свердловск, Киров областьла гыч, Ханты-Манси автономный округ, Пошкырт кундемысе Янаул, Калтаса да Мишкан районла гыч толыныт. Участник-влакым ныл лужалан пайлыме. Нуным Татьяна Япаева, Алина Макарова, Надежда Ильина, Эльза Александрова вуйлатат. Кажне еҥ могай корно дене пашам ышташ тӱҥалмым ойырен налын: иктышт – сылнымут ден возымо пашам, весышт – тӱвырам да молымат.

Икмынярже дене палыме лийым да шонымашыштым пален нальым.

Ирина Салтакова (Курыкмарий район):

- Мый МарГУ-што марий йылме да литератур дене туныктышылан тунемам. Тений кокымшо гана слётышко толынам, ӱмаште Оршанке районышто лийынам ыле. Ик кугу пайдаже – олыкмарла ойлаш тунемынам. Мемнан районышто слёт гаяк вес мероприятий — «Кравец» форум – эртаралтеш. Тудын ик организаторжо семын кызыт тушко 15-20 ияш ӱдыр-рвезе-влакым ӱжнем. Уверым «Вконтакте» соцсетьыште «Форум Кравец и Молодежная инициативная группа» группышто муаш лиеш. «Кравец» форум – слётын икшывыже. Ик ийын Марий самырык тукымын слётшо лачак Курыкмарий районышто эртыш. Тылеч вара «Кравец» эртаралтеш, тений нылымше гана лиеш. Форум Экологий идалыклан пӧлеклалтеш да тиддене кылдалтше проект-влакым возаш туныктена.

Валерий Михайлов (Свердловск кундем):

- Мый Ачит район Марий Карший ял гыч улам. Тений Уральский лесотехнический кугыжаныш университетым тунем пытаренам. Кодшо ийынат слётыш толынам ыле, сандене угыч кумылем лекте. Йолташ-влакым шуко муынам, сандене ончыкыжымат кылым кучаш шонем. Слёт деч вара Екатеринбургышто «Айста марла кушталтена» флешмобым эртарышна. Тыгак марий тӱвыра дене кылдалтше «Ага-Пайрем» фестивальыште лийынам. «Яндар памаш» ансамбльыш коштам.

Раисия Сунгурова (Хант-Манси автономный округ):

- Слётышко кокымшо гана толынам. Икымше гана икымше слётышто лийынам ыле. Лужавуй улам ыле. Шуко жап эртен. Тунамсе да кызытсе самырык тукымым таҥастаренат кертам.Кызыт нунын ончыкылыкышт нерген шонкалем: могай нуно лийыт, могай ӱшаным да пайдам кондат. Ӱдыр-рвезе-влакын толын пурымышт да кузе коймышт гычак рашемеш: нуно изиш вестӱрлырак улыт. 90-ше ийласе тукым уда манын ом ман, нуно тӱжваке шке шонымашыштым пеш огыт ончыкто, шке семынышт философ, аналитик улыт. Компьютер йӧным сайын палат. Тыгак мер илыш дене кылдалташ кумылан огытыл, шонем. Мыйын йыр сылнымутлан да марий йылмылан шӱман ӱдыр-рвезе-влак погынат. Нуно шкешт иктаж-могай мероприятийым темлат. А ме пырля шонаш тӱҥалына, мом ышташ лиеш, вара планышке пурташ. Мыйын тӱҥ пашам – ты пашам умылтараш, вӱдаш.

Игорь Смирнов (Параньга район):

- Ачам, Эрик Васильевич, гармонь дене шокта, мыят изиэм годымак эн ончыч модыш, вара чын гармонь дене шокташ тунемынам. Палантай лӱмеш тӱвыра да сымыктыш колледжын «Калык семӱзгар» пӧлкаштыже шинчымашым погем. Тыгак МарГУ-што ОБЖ туныктышылан тунемам. Кок вережат икымше курсым пытаренам. Матародо тӱвыра пӧртын «Поро кас» ансамбльже пеленысе «Поро эр» коллективыш коштынам. А кызыт «Марий мурсем» ансамбльыште мурем, куштем да гармоньым шоктем.

Полина Чермакова (Татарстан Республик):

- Мый Удмурт Республик Алнаш район Варале ялыште шочын-кушкынам. Шочмо ялыштем марий йоча-влак ынде Удмурт Гондырево школыш коштыт. Меже мӧҥгыштына эре марла кутыренна. Кызыт Менделеевск оласе 1-ше №-ан школышто историй ден обществоведенийым туныктем. Авам, кочам, Николай Иванович Ямаков туныктышо улыт, сандене нунын корныштым шуем. Тыгай слётыш икымше гана толынам. Мыйын илыме олаште марла шагалын ойлат, а тыште кажныже марла пелешта да пылышемланат сайын шокта, ракат чучеш.

Кристина Попова (Удмуртий):

- Киясово район Уськур ял гыч улам. Ижевскысе политехнический колледжыште документовед-архивоведлан тунемам. Ача-авам марий улыт, но мемнан дене (ме ешыште кумытын улына) марла кутырен огытыл, чыла умылем, но мутланен омыл. Слётыш каяш положенийым ужмеке, йодмашым возенам да толынам. Ындыжым тыште але слёт деч вара марий ӱдыр-рвезе-влак коклаште марла кутыраш тӱҥалам, кызыт эше изишак вожылам, акцентем уло, шонем. Марий ялыште илем, но пошкудо одо ялыш тунемаш коштына, сандене мемнам мӧҥгыштӧ рушла туныктеныт. Ондак «Достояние республики» форумышто, Келшымаш пӧртыштӧ икмыняр мероприятийыште участвоватленам.

Слётышто чылажат план почеш веселан да оҥайын эрта. Сай кумыл да поро шӱлыш шижалтыт. Шуко еҥ дене палыме лийым. Мыланем моткочак марла кушташ келша, тыгак марий тувырым чияш йӧратем.

Надежда Ильина (Удмуртий):

- Карагӧл район Ныргындыш ял гыч улам. Шкеже лапкызылан тунем лектынам, ондак ятыр вере пашам ыштышым, контролёрлан, фасовщицылан да моло профессий денат. А кызыт ялысе ик предприятийыште бухгалтерлан пашам ыштем. Индеш ияш ӱдыремым мураш коштыктем. Апрельыште Сарапулышто фестивальыш миенна ыле. Тӱрлӧ мероприятийыште шкетын але ӱдырем дене коктын мурена. Ансамбльыш монь ом кошт. Ялыштына «Ныргындыш сем» ден самырык-влакын «Висвис» ансамбльышт улыт. Тушко кошташ кумылем уло. Мылам утларакшым Полина Итальеван, Татьяна Денисован, Раисия Данилован да молынат тошто мурышт келшат.

Артём Баширов (Татарстан):

- Буймо ял гыч улам. Мый Ижевскыште нефтяной техникумышто бурильщикын полышкалышыжлан тунемам. Вара Йӱдвелышке пашам ышташ каяш шонем. Марла мураш, кушташ йӧратем. Буймо тӱвыра пӧрт пеленысе «Эр ӱжара» ансамбльыш 3-шо класс гыч коштынам. Ӱмаштат слётышто лийынам. Моткочак келшен, сандене йолташ-влакым муымо шонымаш дене угыч толынам. Ик ялыш экскурсий дене миенна, йӱштылаш коштмо ушешем кодын.

Александр Николин (Пермь кундем):

- Слётыш кокымшо гана толынам. Суксун район Кызганде ял гыч улам. Ачам, Владимир Савватеевич, банкыште пашам ышта. Авам, Анна Вениаминовна, школышто йот йылме-влакым туныкта. Тудо шочынжо Мишкан район Измар район гыч. Ончыч авам мыланем марий йылмым туныкташ ок кӱл шонен. Ковам деке Измар ял гыч мийымекем, марла кутыраш тунемынам. Иктаж 3-4 ий ынде марла мутланем. Слётышто чыла пашам кутырен да каҥашен ыштыме келшен. Марий тӱвыран ойыртемже, тӱрлӧ диалект нерген пален налынам. Тыште кажне еҥ тыланет йолташ. Тений вузым тунем пытаренам да магистратурышто тунемнем, тыгодымак пашаш пурынем.

Марий самырык тукымын слётшо-влак эртеныт:

I слёт – Морко район Октябрьскийыште

II слёт – Советский район Ӱшнурышто

III слёт – Курыкмарий район Эманыште

IV слёт – У Торъял район Токтарсолаште

V слёт — Волжский район Пӧтъялыште

VI слёт – Параньга район Олорышто

VII слёт – Провой кундем Чакмарийыште

VIII слёт — Оршанке район Кугу Ӧршаште

IX слёт – Килемар район Ардыште

X слёт Шернур район Марисола кундемыште лиеш!

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: