"Сылнылык тӱня" рубрик, 2017 ий, Сӱрем тылзын 21-ше кечыже

Палыме лийза – Вероника Соловьёва

Статьян авторжо Анастасия Эманова

Вконтакте соцсетьыште у марий мурым колышташ лиеш. Тудым самырык ӱдыр Вероника Соловьёва мура. «Тиде коронывожышто» мурын мутшым шке возкен, а семым – В.Кульшетов.

соловьеваВероника Шернур район Купсола ялеш шочын. 11 ий Марисола кыдалаш школышто шинчымашым поген. Изинек мурылан кумылан лийын. Амалжат уло – тудын аваж ден коваже пашам ыштыме годымат, кутырен шинчыме годымат муреныт. Школышто тунеммыж годым шуко мероприятийыште шке мастарлыкшым ончыктен, районысо, республикысе конкурслаште вийжым терген. 11-ше классыш вончымекыже, музык изишлан шеҥгелан кодын. Чылан тыге ойленыт: муро оксам ок кондо, ӱсмӱртрак (серьезныйрак) пашалан пижман. Школ деч вара Марий кугыжаныш университетысе юридический факультетыш тунемаш пурен, но 3 ий тунеммеке, тиде мыйын огыл манын умылен. Тыге университетым коден каен да Москвасе Щепкин лӱмеш театральный институтыш тунемаш пурен. «Илышем музык алан дене кылдем шонышым, но икмыняр жап гыч чонем ок шупш манын адак умылышым. А театрым мый моткоч йӧратенам да кызытат йӧратем»,  — шарналта мурызо. Тыге театральный институтымат коден кайыш. Да илышыжым лончыла, кушто пиалан лиям шонкала.

Жап эртымеке, И.С.Палантай лӱмеш тӱвыра да сымыктыш колледжыште эстрадный отделенийыште тунемаш тӱҥалеш. Кугу таум пелашыжын полшымыжлан, кӱлешан ойым пуымыжлан ойла. Колледжыште вокал дене туныктышыжо Л.В.Кренева ӱдырым мураш кумылаҥден, шуко шинчымашым пуэн.  «Поснак таум Валерий Дмитриевич Кульшетовлан ойлем. Тудо пырля тунемме йолташем-влакым поктен шуаш полшен, молан манаш гын мый экстерн дене экзаменым кученам да 1-ше курс гыч 3-шо курсыш шинчынам».

«Тиде корнывожеш» мурым В.Кульшетов дене пырля государственный экзаменлан возеныт улмаш. В.Соловьева эше школышко коштмыж годымак почеламутым возгален, но молылан ончыктен огыл. Валерий Дмитриевич талантан ӱдырлан ӱшанен, мурылан мутым возен ончаш ойлен. Вероника самырык чоным вургыжтарыше йӧратымаш нерген почеламутым возен, тудым шуко гана тӧрлаташ пернен. Колледжым тунем пытарен, а муро ик ий киен, вара веле ош тӱням ужын.

«Дипломым налмеке, пелашем дене вигак Казаньыш илаш кусненна, спа-салоным почынна да тудым кӱшкӧ нӧлташ тыршенна. А мураш кумылем йомын огыл, тӱҥ паша деч посна вокал дене репетиторлан тыршенам. Адак пелашем пеш полшен, йӱкым возымо пошкудо студийым шке ӱмбакше налын. Май тылзыште ме «Кремлевская» лӱман студийым почынна. Пашашке йӱк режиссёрым налынна. Тудын дене каҥашен налмеке, марий мурым возаш кутырен келшышна. Тыге муро тачысе кечынат йоҥга. Тыгак репертуарыштем руш муро-влакат улыт».

Вероника Соловьева эше у мурым ямдыла, уло кумылын вучена. Тек творческий пашаже тӱвыргӧ да лектышан лиеш.

Авторжо — Христина Александрова.

 

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: