"Рубрик деч посна", 2017 ий, Сӱрем тылзын 14-ше кечыже

Пеледыш пайрем – Пермь кундемыште

Статьян авторжо Эльвира Терентьева

Марийцы г.Перми и Суксунского района Пермского края в д.Тляково

2017 ий сӱрем тылзын икымше кечынже Пермь кундем Октябрьский район Тляково ялыште икымше гана Пеледыш пайрем эртен.

Тляково — Руш Сарс ял шотан илемыш пурышо кум уреман да 67 пӧртан ял. Тудо преданий почеш ХVIII курымышто шочын, маныт. Тыште 2010 ийысе перепись годым 163 еҥым шотлымо.

Пермь кундемыште марий-влак кум вере йыгыре илат: Октябрьский район Баймурзино ден Чернушинский район Текловка яллаште, Сулий (Сылва) эҥер воктене — Суксун районысо куд марий яллаште) да Сарсу эҥер воктене — Октябрьский район Тляково ялыште.

Ондак икмыняр ий почела ты ялын шочшыжо Геннадий Савватеевич Аптаев Екатеринбург ола гыч поро пошкудыжо-влакым сагынен толмыж еда Тляково ялын пайремжым эртарен. А кодшо ийын тысе ик пӧръеҥ – Александр Семёнович Васяев – Октябрьский районышто Пеледыш пайремым эртарыме нерген йодмаш дене лектын.

Пеледыш пайрем кечын пайрем колонно дене погынышо калык ден уна-влак Тляково ял мучко ошкыл эртеныт. Тыгодым кум уремыште илыше кажне сурт гыч оза-шамыч национальный кочкыш дене вашлияш лектыныт. Варажым тудым кужу ӱстембаке шынденыт. Пайремым эртарыме верыште капкам ыштеныт. Тушто кажне еҥым марий вургеман ӱдырамаш-влак кинде-шинчал, пура да моло сий дене вашлийыныт.

Пеледыш пайрем д.Тляково

Пайремым Руш Сарс ял шотан илемым вуйлатыше В.А.Седухин, Октябрьский район вуйлатышын алмаштышыже Е.А.Ерохина да Пермь оласе марий тӱвыра рӱдерым вуйлатыше Р.Ш.Попова торжественно почыныт.

Пеледыш пайрем – шошо агам да идалыкаш сомылым иктешлыме мероприятий. Эн ончычак Тляково ялын эн кугу ийготан еҥжылан – Тляково ялыште илыше Акулина Николаевна Апонасовалан – пӧлекым кучыктеныт. Владислав Борисович Апонасовым ик эн уста кидмастар манын саламленыт. Тудо мебельым: пӱкеным, креслым, кроватьым дамолымат -шке ышта. Пайремыште тудын выставкыжымат ончыктымо.

А ӱдырамаш-влак коклаште кидмастар Елена Михайловна Усиковам палемденыт. Тудын пӧрткӧргыжӧ моторлык тоштерла веле коеш. Салфеткым, кӱпчыквалым, покрывалым крючок дене пидеш. Елена Михайловна курчак-влаклан марий вургемымат ямдылен чиктен. Чыла ыштыш-кучышыжомарий ватын чаткалыкым йӧратымыже да моторлыкым ужын моштымыж нерген ойла.

Слева направо Седухин В.А., Спиридонова Н.С., Трясцина Е.Ю. иПопова Р.Ш.

Ялжат изи веле, но шке сурт-оралтым сылнештарыше-влак ятырынак улыт. Эше майыштак Тляково ялыште «Эн сай сад-пакча» конкурсым увертарыме улмаш. Икымше верыш сӧрал пеледышан пакчаж дене Елена Михайловна Усикова лектын. Тыгак ойыртемалтше радамыште Оксана Павловна Акушева ден Антонина Дмитриевна Иванован ончен куштымо пеледышышт дене улыт.

Пайремыште пӧръеҥ-влаклан ятыр таҥасымаш лийын. Меҥге вуйыш кӱзымаште Олег Фёдорович Москин ойыртемалтын. Вӱд ӱмбалне пырня дене коштмаште Константин Александрович Тайкиев ден Надежда Николаевна Москина сеҥеныт.

Тляково ялыште кушташ-мураш мастар улыт. Сандене тыгай коллектив икте гына огыл. «Новое поколение» йоча ансамбль «Кечыйол» муро дене куандарен. Тыгак изи артист-влак вальсым куштеныт, сценыште лывыла веле койыныт. Кугыеҥ-влакын «Марий памаш» ансамбльыштат шке мастарлыкшым ончыктен. Нине кок ансамбльым Екатерина Леонидовна Апонасова вуйлата. Тыгак верысе «Кумыл» ансамбль (вуйлатышыже – В.Гафарова), Пермь гыч «Памаш» (вуйлатышыже — О.Романов), Суксун район гыч «Эр ӱжара» (Н.Спиридонова), Октябрьский посёлко гыч «Раздолье» (вуйлатышыже – Ф.Коньков) ансамбль-влак сценыш икте почеш весе лектыныт, муреныт, куштеныт, калыкым веселитленыт.

Йоча ден самырык-шамычлан посна площадке-влак пашам ыштеныт, кидпашалан ойырымо «Уста кид» вер лийын. Тушто марий мастар-влак шке пашаштым ужален кертыныт. Тыгак мастар ӱдырамаш-влак курчакым ышташ, салфетке гыч пеледышым ышташ да шарфикым ургаш туныктеныт.

Пеледыш пайрем вашеш Тляково ялыште илыше-влак шке кӱшешышт яллан стелым ыштеныт. Тудым Владислав Борисович Апонасов ден Олег Данилович Талетов пу гыч ямдыленыт.

Эльвира Терентьева.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: