"Улам мый Рве-зы-лык!" рубрик, 2017 ий, Сӱрем тылзын 12-шо кечыже

Поро пашам ыштен, калыклан куаным конда

Статьян авторжо Анастасия Эманова

Морко район Кокласола ӱдыр Татьяна Подбойкина МарГУ-со «Воскресение» поисковый отряд дене пырля тӱрлӧ олалаш экспедиций дене коштеш да Кугу Отечественный сарыште йомшо салтак-влакын лулегыштым кычалаш полша.

подбойкинаТаня физике да математике факультетыште тунемеш, кокымшо курсыш вончен. Университетын мер илышыштыже икымше кечын манме гаяк участвоватлаш тӱҥалын. Такшым ӱдыр изинек чолга. Кокласола лицейыште изирак класслаште тунеммыж годым «Ямде лий» газетыш почеламут-влакым возкален. 2014 ий годсек районысо Молодежный парламентын патриотический комитетшын председательже. «Йоча-влак патриотизм шӱлышеш кушкышт манын, ме,  парламентын членже-влак, тӱрлӧ мероприятийым, акцийым эртарена. Парламентыште ыштыме паша самырык еҥлан лидер семын кушкаш, ответственныйрак лияш полша», — ойла Таня.

Т.Подбойкина тунемме деч посна Пётр Иванович Бусыгинын вуйлатыме «Воскресение» поисковый отрядыш коштеш.  «Отрядыште утларакшым ӱдыр-влак улына. Тышке ушнаш мыйым ачам Валерий Александрович кумылаҥден. Тудо самырык-влак дене военно-патриотический пашам шуктен шогышо «Демос» поисковый отрядын участникше-влак дене пырля куд экспедицийыш миен коштын. Мыланем моткоч оҥай лийын. Садлан «Воскресенийын» ешышкыже пураш кумылем лекте. Тений шошым Ленинград областьысе Гайтолово ялыш экспедиций дене миенна. Тылеч ончыч самырык боецын курсшым эртенна. Картографийым, компас дене пашам ышташ тунемынна. Лӱдыкшыдымылык шотышто ятыр занятий лийын. Тыгай курсышто этике урок эртаралтеш, умылыман: ме тыглай огыл, а сӧй пасум кӱнчена. Кычалме паша ик шотшо дене оҥай. Йомшо салтакын лулегыжым муын, родыжо-влаклан тудым пӧртылтен кертына. Вет салтак пелен тӱрлӧ арвер: котелок, совла, кӱзӧ, вуйшерге да молат – кия. Южо арверыштыже салтак шке лӱмжым, ачалӱмжым возен коден. Но эн шерге ӱзгарже – медальон. Тудын полшымо дене салтак нерген, тудын кӧ улмыжым пален налаш лиеш. Конешне, тыгай медальон чылаштын уке. Вес шот дене кычалме паша неле. Салтак-влакын кийыме верыштышт сарын кышаже таче кечынат кодын. Южо снаряд пудешт кертеш. Садлан пеш тӱткӧ лийман. Гайтоловыште экспедиций годым (арня утла шуйнен) коло кум салтакын лулегыжым мумо», - палдарыш Таня.

Студентке кажне арнян каныш кечылан ача-аваж деке пашам ышташ полшаш  вашка. Моло самырык еҥ семынак ӱдыр университетым тунем пытарымеке, илышыште шке вержым мунеже да пашаж дене кундемжылан, калыкшылан пайдам кондаш шона.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: