"Рубрик деч посна", 2017 ий, Сӱрем тылзын 13-шо кечыже

Сылнымут чинчым шавымеке…

Статьян авторжо Эльвира Терентьева

 

30 июньышто Морко район Кораксолаште республикысе Колумб лудмаш эртен

Ме уста марий поэт Валентин Колумбын лӱмжым кугешнен ойлена, ынде ятыр ий марий поэзий аршашым чапландарыше пайремым тудын лӱмеш эртарена. А тений тудо эше Марий АССР-ын калык писательже Никандр Лекайнын шочмыжлан 110 ий теммылан пӧлеклалтын ыле. Тидым шотыш налын, Колумб лудмаш Лекайнын шочмо ялыштыже эртаралте. Тудым «Сылнымут аршаш» Колумб поэзий пайрем манын лӱмдымӧ ыле.

Сылнымут мастар-влакын пайремыштым Морко районысо депутат-влак погынымашын председательже С.Иванова, Марий Эл Кугыжаныш Погын вуйлатышын алмаштышыже А.Н.Иванов, Марий Эл Республикын тӱвыра, печать да калык-влакын пашашт шотышто министрын алмаштышыже А.А.Иванов почыч.

М.Шкетан лӱмеш театрын директоржо М.И.Матвеев, саламлышыжла, организатор-влаклан марий тӱран солыкым да курчакым кучыктен. А ты театрын самырык артистше-влак Валентин Колумбын творчествыжлан пӧлеклалтше «Толза муро памашем воктеке» композицийым ончыктеныт.

А вара мут Россий писатель ушемын Марий Элысе пӧлкажым вуйлатыше С.Д.Архиповалан, В.М.Васильев лӱмеш МарНИИ-н директоржо Е.П.Кузьминлан пуалтын. Нуно усталык таҥӱчашымаште шкем тергаш да ончаш толшо калыкым саламленыт.

Пайремышке тыгак Никандр Лекайнын Нина ӱдыржӧ толын ыле. Тудо сценыште ачаж нерген каласкален. «Ачам мыйым, — ойлен тудо, – чодырашке пырля коштыктен, кайык-влакын йӱкыштым ойырен мошташ, поҥгым погаш туныктен. Тыште, Кораксолаште, клубым, футбол пасум да молымат шарнем. Ачам театрым пеш йӧратен. А икана ме, йоча-влак, кум шагатлан эрдене ялыштына Морко сӱаным ончен коштна. Ачамын книгам возымыжым ужынам. Тудо «Кугезе мланде» романым возаш тӱҥалын ыле, изишак лудынам да сюжетшым, Эчан ден Веруш дене мо умбакыже лиймым, пален налаш манын, йӱдым мыйым кынелташ йодынам. Южгунамже кынелтен, а кум шагат эрдене колым кучаш лектын кая ыле. Марий Элемлан да Морко кундемемлан мланде марте вуем савем».

Н.Лекайн прозышто усталыкшым ончыктен, калыкнан илышыжым почын пуышо произведенийлам возен. Тудо калык писатель лӱмым марий-влак кокла гыч икымше налын. Писательым шарналтен, уна-влак Кораксола тӱвыра пӧрт ваштареш шогышо мемориал стелыж воктеке пеледышым пыштеныт. Тылеч вара конкурс тӱҥалын. Участник-влак В. Колумб ден Н.Лекайнын произведенийлаштым, почеламутым наизусть да книга гыч йӱкын лудмо, тыгак мурым мурымо шотышто таҥасеныт.

Пайремыш 80 утла участник толын. Сценыш почеламутым сылнын да оҥайын каласкалыше-влак икте почеш весе лектыныт, мастар деч мастар мурызо-влакын мурышт торашке шергылтын. Чыла тидым ончаш да аклаш куштылгыжак лийын огыл. жюри полный составDSC04414 DSC04394 Андреев

УМБАКЫЖЕ — «Кугарня» газетын 2017 ий 7 июльысо номерыштыже лудса.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: