"Улам мый Рве-зы-лык!" рубрик, 2017 ий, Сӱрем тылзын 28-ше кечыже

Тӱнямбал конкурсыш кая

Статьян авторжо Анастасия Эманова

Worldskills – тӱнямбал коммерческий огыл движений. Тудын тӱҥ цельже – паша профессийын престижшым нӧлташ. Марий Эл гыч студент-влак «Молодые профессионалы» чемпионатыште шуко гана сай лектышым ончыктеныт. Тений октябрьыште Объединённый Арабский Эмиратыште WorldSkillsInternationalтӱнямбал конкурс лиеш. Российын сборныйышкыже Йошкар-Оласе строительный техникумын студентше Павел Казанцев логалын.

казанцевТений чемпионатыште 77 эл гыч (чылан Worldskillsдвиженийын участникше улыт) 1300 утла самырык специалист мастарлыкшым ончыкташ тӱҥалеш. Российын чапшым 26 регион гыч 58 участник арала. «Строительство», «IT-технологии», «Искусство и дизайн», «Промышленное производство», «Сфера услуг» да «Обслуживание гражданского транспорта» направленийлаште таҥасат. Павел Казанцев «Кирпичная кладка» компетенцийыште моштымыжым ончыкта. Палемдыман: ӱмаште декабрьыште тудо EuroSkillsЕвропысо чемпионатыште (Швецийыште эртен) шкенжым сай профессионал семын ончыктен.

Рвезе кызыт йӱдшӧ-кечыже манме гаяк Москошто архитектур, дизайн да реинжиниринг колледжысе WоrldSkills тунемме рӱдерыште чемпионатлан ямдылалтеш. Садлан тудын дене соцсетьыште мутланенна.

Павел Марий Турек район Косолоп селаште шочын-кушкын. Туштак 11 классым тунемын. Школ деч вара Йошкар-Оласе строительный техникумыш «Строительство и эксплуатация зданий и сооружений»  специальность дене тунемаш пурен.  «Кокымшо курсышто тунеммем годым мыйым армийыш наҥгаеныт. Вара угыч техникумыш пӧртылынам. Кызыт нылымше курсыш вонченам. Производственный практикыште мыйын пашам ыштымем ужыныт да тыгай таҥасымашке каяш темленыт. Техникумысо таҥасымаште кокымшо верым налынам, а тений «Молодые профессионалы» регионысо отборочный чемпионатыште шке компетенцийыште икымше лийынам. Мыйым тунам производственный обученийын мастерже Виктор Анатольевич Коровин ямдылен. Тудо — моткоч поро, сай да шке пашажым палыше тренер.

Кызыт эр гыч кас марте мастерскойышто мастарлыкем нӧлтем. Кермычым оптем, тӱрлӧ модульым ыштем. Тӱнямбал чемпионатыште медальым сулен налаш шонем. Ойырен налме профессием чонемлан келша. Ончыкшым ты специальность денак пашам ышташ шонем», - палдарыш П. Казанцев.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: