"Рубрик деч посна", 2017 ий, Сӱрем тылзын 14-ше кечыже

Статьян авторжо Эльвира Терентьева

Мечым перкалышна, тоям, паҥгам кышкылтна…

Марий самырык тукымын слётышкыжо 70 наре ӱдыр-рвезе-влак погыненыт. Нуно тӱҥ шотышто уш-акылым пойдарат: проектым возаш тунемыт, уш-акылым пудыратыше моло пашам шуктат. Эсогыл канашат огыт ярсе гай чучо.

IMG_3551

Тений игечыжат келесырлана, слётчик-влаклан ны йӱштылаш, ны моло вере миен толаш… Туге гынат 7 июльышто ме, кугарнязе-влак, сай игече лиеш манын ӱшаненак, Килемар район Арде кундемыш тарванышна. Программе почеш палемдыме «Модыш, модыш» манме мероприятий жаплан йӱр пыл кораҥ кайыш. Очыни, слётыш толшо да «Кугарня» газетын пашаеҥже-влакын кумылышт ден кечан игечым йодмышт полшыш.

А ӱдыр-рвезе-влаклан модыш-влакым умылтараш Кужэҥер район Коҥганур школышто физкультур дене туныктышо Евгений Иванович Быковым ӱжынна ыле. Тудо куштылго атлетике дене спорт мастер, Российын первенствын вич гана чемпионжоIMG_3554 , самырык-влаклан сай пример.

Эн ончыч 1-ше ден 2-шо лужа лапта дене модо. Тыгодым 1-ше лужа весыжым 10:5 счёт дене сеҥыш. Вара 3-шо ден 4-ше лужа таҥасышт. Тыште 4-ше лужа сеҥышыш лекте. Ты модышым нуно вашке тунемыч, да азарт манмышкет веле пурен шуктышт, а модыш пытенат кайыш. Сандене вес модышлашкат чулымын ушнышт.

«Ямде лий» газетын пашаеҥже Наталья Семёнова «Калып» марий калык модыш дене модыктен. Тыгодым ӱдыр-рвезе-влак йыр шогалыныт да икте-весе дене чак лийыныт. Ӱдыр-рвезе кидышт дене саде «калыпым» икте-весылан колтат. Икте кычалше лиеш. Огеш му гын, мура, кушта але вес музыкальный номерым ончыкта.

Вара ме ӱдыр-рвезе-влак дене пырля волейболла модна. Тале улыт улмаш. Слётышто спорт мероприятийын ситыдымашыже шижалте. Эсогыл «Кугарня» командынам тӱрыс ышт модыкто, шкештат ты модышым шукертсек вученыт да куанен гына модыч. Тыште кӧ да мыняр очколан сеҥалтмымат шотыш налман огыл, шонем. Вет тӱҥжӧ – келшымаш да вашла куаным кондымаш.

Ты жапыште ӱдыр-рвезе-влак «Городки», «Кулай-кулай» але «12 паҥга» дене йывыртен модыныт. Тыгак икте-весым кид дене шке могырыш шупшын модыч. Тудым «Ош вӱльыла» манын лӱмденыт. Слётыш толшо-влакым куанен ончышна. Жапым тыге веселан эртарыме деч мо сайже уло, ала?

Эльвира Терентьева.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: