"Рубрик деч посна", 2017 ий, Сорла тылзын 24-ше кечыже

Кандаш ешлан — у пачер

Статьян авторжо Светлана Кушакова

Лишыл жапыште Медведево посёлкысо Чавайн уремыште чоҥымо кум пачашан, 22 пачеран у пӧртыш «Персеселение граждан из аварийного жилищного фонда на 2013-2017 годы» программе почеш 8 еш илаш пура. Республикым вуйлатыше А.Евстифеев 14 августышто ты пӧртым ончалаш миен коштын. У пӧртын качествыжым, планировкыжым, отделкыжым сай могырым палемден.

Вашлиймаш годым илаш пурышо еҥ-влак чоҥышо-влаклан тау мутым каласеныт. Пӧрт тӱжвал сынже дене мотор, кудывечым сайын тӱзатыме, воктенак — йочасад, школ, лишнак черке, стадион, «Витязь» спорт комплекс верланеныт.

«Ме 1989 ий годсек баракыште иленна, у пачерым шукертсек вученна. Марием колен. Ты пачерыште кумытын: ӱдырем да веҥым дене — илаш тӱҥалына. Тыште чыла условий уло. Пачер кугу, волгыдо да кумда. Чоҥымо паша кузе кайымым терген шогенна», — ойла Е.Короткова.

Тичмашын ончалмаште, чот тоштемше илыме вер гыч кусарыме кугыжаныш программе вич ий жапыште сайын шукталт толын. Верысе кучем Россий президентын палемдымыж семынак чыла ышта, пӧрт чапле лийже манын эскера.

«Программе илышыш пурталтеш. Вашке 2012 ий 1 январьыште аварийныйлан шотлымо пӧртла гыч кусарен шуктыман. Тидлан республикылан 3,5 млрд теҥгем ойырымо.1 сентябрь марте кызыт 229 пачерыште илыше 610 еҥым кусарен шуктышаш улына», — каласен республикым вуйлатыше.

Программын пытартыш этапше сентябрьыште пыта, но Марий Эл Республикын чоҥымо паша, архитектур да ЖКХ министерствыже вес этап лиймымат палемда.

Тиде программе калыклан моткоч кӱлешан. Тушко мемнан республикыште илыше 7 тӱжем наре еҥ логалын. 2012 ий 1 январьлан 102 тӱжем квадрат метр тошто илыме фондым пытараш да 2680 пачерым чоҥаш кӱлын.

Медведево районым ончалаш гын, программым илышыш пуртымо вич ий жапыште шуко пачеран 22 пӧртым чоҥымо. Тидыже — чылаже 22,4 тӱжем квадрат метр, але 517 пачер.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: