"Рубрик деч посна", 2017 ий, Сорла тылзын 25-ше кечыже

Кушкаш да эреак ончылно лияш шона

Статьян авторжо Светлана Кушакова

Тений Килемар районысо Арда селаште эртыше самырыктукым слет ятыр чолга ӱдыр-рвезе-влакым поген. Тушто кажныже шке мастарлыкшым ончыктен, нуно тӱрлӧ могырым кушкыныт. Теве Ольга Ягодарова почеламут-влакым марла возаш кумылаҥын. «Снеге там» лӱман кокымшо лужалан пӧлеклалтше «Ме ик еш улына» мутсаскаже шкешотан гимныш савырнен, манаш лиеш.

ягодароваОльга Ягодарова Шернур район Кугушен ялеш шочын. 2012 ийыште Оршанке поселкысо И.К.Глушков лӱмеш педагогический колледжым йошкар диплом дене тунем пытарен, вара Марий кугыжаныш университетыште заочно тунемын. Тыгодымак школышто пашам ыштен.

«Оршанке педагогический колледжым тунем пытарымеке, Советский поселкысо 3-шо №-ан кыдалаш школыш пашаш пурышым. Тӱҥалтыш класслам туныктем. Изинек туныктышо лияш шоненам. Йолташ ӱдыр-влак дене эреак школла модына ыле. Шукыж годым тункытышыжо мый лийынам. Нуным парт коклаш пуйто шындем, тӱрлым каласкалем, возкалыктем. Ойырен налме профессием куаным конда. Тидыжак мыйым пиаланым ышта. Коллектив пеш сай, опытан туныктышо-влак полшен шогат. Йоча-влакат весела, поро кумылан улыт. Ваш-ваш келшен илена», — манеш Ольга.

Кызыт йоча-влакым тунемаш кумылаҥден моштыман. Тидлан самырык туныктышо тӱрлӧ йӧным кучылтеш. Урок оҥайын эртыже манын, шкежат чот ямдылалтеш, утларакше информационный технологийлан эҥертен, шке урокшым чоҥа. Тидыже йоча-влаклан келша. Модыш семын эртарыме урок йоча-влакым тунемаш кумылаҥда.

«Икшыве-влак теме почеш тӱрлӧ йодышым пуат, туныктышо дене мутланат гын, тидыже урок оҥайын эртымым ончыкта. Чынжымак, кызытсе йоча-влак ойыртемалтше улыт, садлан южгунам кажныж дене посна пашам ышташ логалеш. Тидлан шкалан эре тунемман, у методике-влакым кычалман. Кугу полышым тӱрлӧ конкурслаште таҥасыме пуэн шога. Тушто шке мастарлыкым ончыктымо дене пырля моло туныктышо-влакын пашаштым, опытыштым ужат, шке пашаште кучылтат. Оршанке колледжысе, тыгак Марий кугыжаныш университетысе преподаватель-влаклан кугу таум каласыме шуэш », — ойла О.Ягодарова.

Ольга — Советский районын чолга самырык еҥже-влак кокла гыч иктыже. Тудо чыла яра жапшым мер пашалан ойыра. Ӱдыр — самырык-влак парламентын еҥже, «Союз добровольцев России» Россий мер организацийын Советский районысо пӧлкажым вуйлата. Организацийын еҥже-влак обществылан пайдам кондышо тӱрлӧ акцийым, мероприятийым эртарат, шоҥгыеҥ-влаклан полшат. «Вконакте» социальный сетьыште нунын шкеныштын группышт уло. Пашашт нерген https://vk.com/sdr12 сайтыште пален налаш лиеш. Ольга тыгак «Азбука Памяти» федеральный проектым мемнан республикыште шыҥдара. Проект 2014 ий годсек пашам ышта. Тудо историй да культур могырым социокультурный поянлыкым ончыктышо объект-влакым арален да ачален шогымо дене кылдалтын. Ты проект почеш ятыр паша ышталтеш. Тудын нерген https://vk.com/mariazbuka ссылке почеш пален налаш лиеш.

«Самырык тукым слет нерген каласыде огеш лий. Мый тений тушто кокымшо гана лийынам. Слетын кажне кечыже ала-мо дене гынат шарнымашеш кодын. Экскурсий, модыш, конкурс, таҥасымаш-влак, тӱрлӧ проектым возымаш – чылажат уым пален налаш полшен. Йолташ-влак ешаралтыныт. Ончыкылык пашаште кучылташ келшен толшо ятыр шонымаш лектын. А эн тӱҥжӧ — марла сайынрак кутыраш тӱҥалынам. Почеламут-влакым возаш кумылаҥынам», — мучашлан каласыш самырык еҥ.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: