"Рубрик деч посна", 2017 ий, Сорла тылзын 25-ше кечыже

Образованийыште — вашталтыш

Статьян авторжо Светлана Кушакова

Образований сферыште ятыр вашталтышым вучыман. Россий образований министр О.Васильеван палемдымыж почеш, тидлан бюджет гыч молгунамсе жап дене таҥастарымаште оксам утларак ойырымо.

Ешартыш образований

2020 ий марте 75 процент тунемшым ешартыш образованийым налаш кумылаҥдаш палемдыме. Тӱҥ тӱткыш технический да естественнонаучный направленийлан ойыралтеш. Тунемме тӧнежлаште визыт деч шагал огыл шахмат, спорт, литератур, музыкальный, научно-технический кружок ден секций-влак пашам ыштышаш улыт.

ЕГЭ деч мом вучыман?

Выпускник-влаклан сай огыл увер – кумшо обязательный предметым пуртымаш. 9-ше классыште тунемше-влак 2020 ий гыч йот йылме дене ЕГЭ-м кучаш тӱҥалыт, 2022 ий гыч 11-ше классат ушна. ЕГЭ-м удан кучымо огыл гын, ик обязательный предметше дене ешартыш жапыште экзаменым угыч сдатлаш лиеш. ЕГЭ-ште тест сынан пашам кораҥдынешт. Шонкален моштымым, творчествым ончыктымо ужаш-влакым ешарат.

Школлаште — у предмет

1 сентябрь гыч расписанийыште у предмет «Астрономий» ешаралтеш.Тудым туныкташ 35 шагат ойыралтеш. Южо вере икымше четверть гычак туныкташ тӱҥалыт.«Основы религиозных культур и светской этики» факультатив сынан предмет пура, садлан тудым тунемаш ача-аван келшышамашышт лийшаш.

Инклюзивный образований

Начар тазалыкан йоча-влаклан тунемме у стандартым шыҥдарыме паша умбакыже кая. Ача-ава-влак тыгай йочам специализированный але тыглай школышто туныкташ але укем шке ойырен кертыт. Чыла школ тыгай еҥ-влаклан условийым ыштышаш. Пандус гыч тӱҥалын Брайль шрифтан книга марте лийшаш. Тункытышо-влакат тыгай йочам туныктымо опытан лийшаш улыт.

Икымше смене гына кодшаш

Россий школ-влак эркын икымше сменыш куснышаш улыт. Кокымшо сменыште тунемме йоча организмлан эҥгекым конда манын эксперт-влак каласат.

Электрон курс-влак ешаралтыт

Образований министерствын тӱҥ проектше — «Современная цифровая образовательная среда». Тудын почеш кеч-могай ийготан еҥ онлайн-курс полшымо дене шке шинчымашыжым келгемден кертеш. Тидлан кугу кӱкшытан, лицензиян курс-влакым Интернетыште почыт. Ик ият пеле гыч «Российская электронная школа» проект илышыш пурталтеш. Тыште туныктышо-влаклан урокым ямдылаш да эртараш полыш пуалтеш.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: