"Увер" рубрик, 2017 ий, Сорла тылзын 21-ше кечыже

Студент еш чумыргыш пырля уэш

Статьян авторжо редактор

Кеҥеж вашлиймаш

Кеҥеж пагыт тӱрлӧ вашлиймашлан поян. Август тӱҥалтыште шоныдымын-вучыдымын Марий кугыжаныш университетыште тунемме йолташем-влак пырля погынаш кумыл улмо нерген шижтарышт. Лӱмгече идалык огыл гынат, икте-весым ужмо шуэш, маньыч. Мӱндыр эрвел кундемыште илыше студент йолташна-влакланат мылам увертараш каласышт. Мый — тыманмеш. Тыге ныл-вич кече коклаште 2000-ше ийысе МарГУ-н выпускникше-влак — марий филолог-влак — Йошкар-Олан ик эн чапле марий рестораныштыже погынышна.
Тиде кас кажнынан чонешыже волгыдо, поро шарнымашым коден, садлан кидыш ручкам налде шым чыте.
Мӱндыр Пошкырт кундем Краснокам районысо йолташна-влакын весела, кожмак кумылышт эрвелмарий вургемым чиен толаш таратен. «Марий сийгудын» ӱстелтӧрыштыжӧ шинчымына годым сылне чиеман, пеледыш тӱрлеман кум эрвел «лыве» мелна терке, Башкирийысе чак-чак дене кава гыч волымыла калык ончыко лектын шогале. Вот тиде койыш чылаштым ӧрыктарыш да чот куандарыш!
Чесле костенечым тамлымек, икте-весе дене чон почын кутырен, икте-весе нерген утларак пален налмек, «ший кандырам» «пунаш» рӱж тарванышна. Залыште улшо моло уна-влакат тыманмеш пырляшке ушнышт. «- Туге мо? – Садыге шол!» — гына йоҥгалтеш, сем почеш йол шкеак кая, таган корштымеш тавалташ ок ӧркане!
Икте-весынан чонышто куан кумыл, ваш кугешнымаш, шокшо келшымаш тул шижалтын. Латшым ий тунем пытарымыланна: ешым чумырымо, пашам ыштыме пагыт самырык жап деч ятырлан тораш наҥгаен. Садлан шинча ончылно тӱшкагудо илыш, тунемме тат киносӱретла уэш шарналтын, мӧҥгвстреча выпускн-2017еш эртыше пагытыш пӧртылмӧ шуын.
Пагалыме туныктышына-влакымат – З.В.Учаевым, И.Г.Ивановым, Ю.В.Андугановым, И.С.Ивановым, С.С.Сабитовым, Л.И.Барцевам, О.А.Сергеевым да молымат – порын да тауштен шарналтышна. Нуно мемнан нӧрӧ ушешна, чонешна шочмо марий калыкна, кундемна, йылмына дек пагалымаш да йӧратымаш «нӧшмым» ӱденыт. Тидын дене ме кугешныде она керт!
Кызыт мый колледжыште марий йылмым туныктымо паша амал дене туныктышем-влак деке тӱрлӧ йодыш дене миен савырнем. Тӱрлӧ кундем гыч тунемаш толшо йоча-влакын койышыштым, палыме кугыеҥ-влакым эскерен, тыгай иктешлымаш шочеш: ӧрдыжтӧ илымеке марий-влак путырак марий чонан кодыт, шочмо йылмым, тӱвырам утларак аклаш тыршымышт шижалтеш, тудым аралыме верч шогат. Чылалан тыланыме шуэш: калыкнан чон поянлыкшым шот дене ончыкташ, марла пелештен колташ вожылман огыл. Тидлан южгунамже ончычсо йолташ дене тыглай вашлиймашат полша, шӱкалтышым ышта, ешартыш вийым пуа. Тау чылалан, тыгай вашлиймашым эртараш темлымылан.
С.Смолина.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: