"Рубрик деч посна", 2017 ий, Сорла тылзын 4-ше кечыже

Экономикым вияҥдаш чыла йӧн уло

Статьян авторжо Светлана Кушакова

1 августышто Марий Эл республикым вуйлатыше А.Евстифеев Россий премьер-министр Д.Медведев дене вашлийын. Ялозанлык да социально-экономический вияҥмаш йодыш-влак тӱҥ верыште лийыныт. А.Евстифеев Д.Медведевлан кум тылзе утла жапысе пашаж нерген каласкален, бюджет сфере пашаеҥ-влак ончылно парымым петырен кертмым палемден. Туныктышо-влаклан отпускнойым канаш кайымышт годым тӱлымӧ. Пытартыш жапыште тыгайже лийынат огыл.

Республикым вуйлатыше ятыр йодышым решатлаш премьер-министрын полшымыжлан тауштен. Тидыже икмыняр социальный нелылыкым кораҥдаш полшен.

А.Евстифеев тазалыкым аралыме сферыште, промышленный производствышто сай могырыш вашталтыш лийме нерген ойлен, поснак — ялозанлык вияҥме нерген. Республикыште ыштен лукмо продукций экологически яндар, тугеже качестве могырым чыла йодмаш шукталтеш. Шыл продукций шуко ямдылалтеш, тушеч 2/3 наре ужашыже вес регионлашке ужалаш колталт кертеш. Республик каза шӧрым ыштен налмаште чыла регион кокла гыч эн ончылно. «Звениговский» шыл комбинатын, тусо агрохолдингын пашаштым палемден. Юл кундем федеральный округышто «Звениговский» шыл комбинатын 530 ужалыме точкыжо уло. Тыште 1,5 тӱжем паша верым ыштыме. Республикын бюджетышкыже 1,2 млрд теҥге налог тӱлалтеш. Продукций качестве могырымат ик эн сайлан шотлалтеш. Республикыште ыштен лукмо продукцийым Россий рынкыш «Марийский продукт» бренд дене лукташ палемдалтеш.

Республикыште ялозанлык пытартыш жапыште писын вияҥеш. Тидыже кугыжаныш полышлан кӧра. Премьер-министр умбакыжат ты пашашке вийым пышташ тыланен. У ялозанлык предприятий-влакым ыштымын кӱлешлыкшым палемден. Премьер-министрат, Марий Элым вуйлатышат республикын экономике могырым вияҥме корныжым ялозанлыкыште ужыт.

Ялозанлык сферыште у инвестиций проект-влакым шыҥдаралтыт. Оршанке районышто «Шойбулакский» ЗАО комбикорма заводым чоҥа. Проектын акше — 200 миллион теҥге.

Шернур районысо «Лукоз» сырзавод кок проектым шыҥдара. Иктыже — каза шӧр негызеш йоча кочкышым ыштыме завод, весыже – каза-влакым ешарыме шотышто проект. Тидлан 700 миллион теҥге кӱлеш.

Вес ийын лӱштымӧ ушкалым тӱжем вуйлан ешараш шонат. А тений производитель-влак лӱштышым 5700-5750 литр марте шуктышт. Тылеч посна «Звениговский» агрохолдинг кум ий жапыште лӱштымӧ ушкал-влакым 6-9 тӱжем марте ешараш шона.

Республикыште яра кийыше ялозанлык мландым озанлык-влаклан пӧртылтымӧ да курал-ӱдаш тӱҥалме шотышто паша ышталтеш.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: