"Рубрик деч посна", 2017 ий, Сорла тылзын 25-ше кечыже

«Ястребыште» — самырык психолог

Статьян авторжо Светлана Кушакова

Август тӱҥалтыш гыч наказанийым шуктышо федеральный службын республикысе управленийыштыже самырык психолог Елена Кокорина пашам ышта. Тудо тений Россий ФСИН-ын Рязаньысе право да управлений академийжым тунем пытарен.

кокоринаЛена Йошкар-Олаште шочын-кушкын. Ешыштыже ачажат-аважат правам аралыме органлаште пашам ыштат. Аваже Татьяна Викторовна управленийын 6-шо колонийыштыже тырша. Ачаже Игорь Кокорин — МВД-н пашаеҥже. Садлан Лена ончыкылык профессийым ойырен налме шотышто шуко шонен огыл.

«Ачам шке направленийже дене тунемаш колтынеже ыле гын, авам шкеж деке шупшын. Россий МВД-н Волгоградысе академийышкыже судебный экспертлан тунемаш пураш шонымаш лийын, но психолог — утларак ӱдырамашлан келшен толшо паша, садлан Россий ФСИН-ын Рязаньысе академийышкыже тунемаш пурышым. Эн ончыч, мутат уке, ача-ава, шочмо кундем деч тораште илаш неле лийын. Тунемаш пурымо деч ончыч кугу отборым эрташ логалын. Тазалык пеҥгыде, физический подготовко сай лийшаш. Ик тылзе казармыште илыме, самырык боецын курсшым эртыме. Шукынжо ты этапыште коден каеныт, физический нагрузкым чытен кертын огытыл», — каласкала Лена.

А кушеч латкандаш ияш ӱдырын вийже лектын? «Цельым шынден, тушко шуашак тыршет гын веле шонымашет шукталтеш. Тунемаш пураш школыштак ямдылалташ тӱҥалынам. Спортлан шӱман улам, но садак утларак заниматлаш кӱлмым умыленам. Пел ий наре ачам дене куд шагат эрдене кынелын куржаталаш тӱҥалынам, комплексно-силовой упражнений-влаклан тӱткышым ойырымо. Тунам, шарнем, йолташем-влак дене вашлияш жап нимыняр лийын огыл. Тыге физический нагрузкым чыташ писын тунемынам. Садлан самырык боец курсым нелылык деч посна эртенам. Ончычмӧҥгӧ велке чон шупшын, канышлан, пайремлан чӱчкыдын кудалыштынам. Родо-тукымым, ача-авам ужаш куга пиал лийын. Вара академийыште йолташ-влакым муынам, оламат эркын пален налынам, куштылгырак лийын. Моло специальность дене таҥастарымаште мемнан группыштына ӱдыр ден рвезе-влак икнаре лийыныт, 14 ӱдыр да 12 рвезе тений тунем пытаренна», — каласкала ӱдыр. — Психологий — моткоч оҥай науко. Кажне еҥ шкешотан, икте-весе деч ойыртемалтше. Вузышто пашалан мемнам сайын ямдыленыт. Наказанийым шуктымо федеральный службын психологшо эрык деч посна кодымо еҥ-влак дене пашам ышта. Тудо тыгай еҥын илыш-корныжым пален налаш, уда действийжым, поступкыжым умылаш, ты шотышто чын корныш шогалаш полшышаш. Лена икымше гана практикыш кумшо курсышто тунеммыж годым толын. 6-шо ден 4-ше №-ан колонийлаште эртен. Шкенжым сай могырым ончыктен. Практике годымак тӱрлӧ еҥ дене тӱкнаш логалын. Южыжо тыйым сырен, шӧрын онча, южыжо, чынжымак, тыланет чонжым почнеже. Икымше гана, мутат уке, нунын деч шкеже лӱдат, мом ойлаш, шкем кузе кучаш от пале. Тыгай еҥ-влак дене пашам ышташ ӱдыр-влаклан эшеат нелырак. Тӱҥжӧ — мутланыме годым шке шижмашым ончыктыман огыл, но тыгодымак ӱшаныш пурен моштыман».

Лена ведомствын специальный назначениян «Ястреб» отрядыште пашам ышта. Практике годым шкенжым сайын ончыктымыжлан кӧра тудым 4-ше №-ан колонийыште, уголовно-исполнительный инспекцийыште пашаш вученыт. Но самырык психолог паша верлан спецназ отрядым ойырен налын. « Мый спортым йӧратем. Куржталаш, тӧрштылаш, тӱҥжӧ — верыште шинчаш огыл – тидыже мыланем келша. А отрядыште психолог — тыгаяк боец. Тудо нормативым сдатлышаш, кажне мероприятийыш, тренировкыш пырля лекшаш. Эсогыл боец-влак дене служебный командировкыш кайышаш. Тидланат мый ямде улам. Отрядыш ӱдыръеҥ толмо пеҥгыде, виян, серьезный пӧръеҥ-влакым шкем кучен мошташ тарата. Нуно тӱжвал сыныштым, мом чийымыштым эскерат, мутланыме годым кӱлдымӧ мутым огыт кучылт. Порырак, веселарак лийыныт, коллективыште южшак вашталтын», — палемдыш Л.Кокорина.

Лена спорт дене пеҥгыде кылым куча, эн йӧратыме спортын видше — юж акробатике. Йошкар-Олаште тудо сайын вияҥше огыл. Рязаньыште тунеммыж годым ты спортлан шӱмаҥын. Акробатике физический формым кучаш полша, койыш-шоктышым вияҥда.

Кок арня пашам ыштыме жапыште самырык психолог нормативный документым тунемын, отряд дене палыме лийын. Кажне боец шотышто психологический портретым ыштен, кажныж шотышто шке шонымашыже шочын. Специальный назначениян отряд психолог тыгак психологический службым вуйлатышылан полшен шога.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: