"Рубрик деч посна", 2017 ий, Идым тылзын 22-шо кечыже

Губернаторын стипендиаткыже

Статьян авторжо Эльвира Терентьева

 

Ӱмаште апрельыште Свердловск кундем Арти район Кӱркеде школышто лийме годым ик куанен увертарышт: «Ик чолга тунемшына, Александра Каптиева (шола гыч икымше шога), ты кечылаште Артекышке канаш каен». Сандене туддене вашлияш йӧн ыш лек.

икыше шолаште

Туныктышыжо-влак ты ӱдырын ятыр сеҥымашыж нерген каласкалышт. Шонен ӧрат: кузе Саша чыла тидым шукта! «Визытанлан» гына тунемеш да тӱрлӧ мероприятийлаште участвоватла. Визымше класс гычак «Культура моего народа» кружокыш коштеш. Тыште йоча-влакым историко-краеведческий пашам шукташ туныктат. Тидлан историйым туныктышо Марина Викторовна Шалкиева кумылаҥда. Ты кружокышто тыршен пашам ыштымаш Сашенькалан ятыр конкурсышто сеҥаш полшен. 2014 ийыште «Школа музейного актива» районысо конкурсышто ойыртемалтын. Районысо, областьысе краеведений конкурслаштат Кӱркеде школын тунемшыже-влак дене пырля А.Каптиева шкепашажым ончыктен. Икшыве-влак «Ага-Пайрам – йоча пайрем», «Шорыкйол – телымсе йоча пайрем», «Марий кумалтыш мут – Юмо деч полышым йодмаш» теме-влак дене материалым погеныт.

Вара самырык ӱдырым соцсетьлаште кычал муым. Тыге Александра дене палыме лийна, серыш-влакым возкалышна. Марий чонан улмыжым, Кӱркеде тӱвыра пӧрт пеленысе «Муро памаш» ансамбльыш куанен коштмыжым умылышым. Тенийысе «Ага-Пайрем» областной фестивальыште ансамбльын кандаш ӱдыржӧ сценыш лектын да Урал марий куштымашым тавалтен ончыктен. Историйым шымлыме пашамат ӧрдыжкӧ шӱкалын огыл, кызыт тунемше Йыван Кырля нерген материал-влакым чумыра, «Кинематографийыште — икымше марий еҥ» шымлымаш пашам воза.

Историйым да обществознанийым йӧратымыжым олимпиадылаште сеҥымаш денат пеҥгыдемден. Самырык лудшо-влакын «Живая классика» конкурсыштат шке мастарлыкшым ончыктен. Александра школын спорт мероприятийлашкыжат кумылын коштеш, баскетбол, волейбол да ече дене районысо таҥасымашлаште участвоватла.

«Мый моткочак историйым йӧратем, сандене тений «Артек» йоча лагерьыште «Земля – наш общий дом» сменыште каныме годым эн оҥай да пайдале жаплан экскурсий-влакым шотлем. Симферополь, Севастополь, Ялта, Балаклава ола-влак келшышт. Тунам Воронцовский ден Ливадийский дворец-влакым ужынам. А такшым мый 9-ше класс деч вара Екатеринбургысо железнодорожный транспорт колледжыш тунемаш пурынем. Варажым тушто налме профессием дене тӱрлӧ верым ончен кошташ йӧн лектеш, шонем», — каласыш А.Каптиева.

А теве кодшо кечылаште тудын сеҥымашыжлан адак куанышым: Кӱркеде школын 9-ше классыштыже тунемше Александра Каптиевалан Свердловск областьын губернаторжын стипендиаткыже! Губернатор Евгений Куйвашев лауреат лӱм дене саламлен, 1 сентябрьыште 49 лауреат дене пырля Сашенькаланат медальым кучыктен. Тушко ӱдыр туныктышыжо М.В.Шалкиева дене пырля миен коштын. Марий ӱдырым ты награде дене саламлена да илыш корныштыжо ятыр кӱлешан да пайдале пашам тыланена.

каптиева молодецтуныктышыж дене

Эльвира Терентьева.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: