"Улам мый Рве-зы-лык!" рубрик, 2017 ий, Идым тылзын 11-ше кечыже

Марий улмыж дене кугешна

Статьян авторжо Анастасия Эманова

Киров область Уржур районын шочшыжо Иван Сметанин тений Москосо марий землячествыш пурен. Тудо рӱдолаште лийше марий мероприятийлаш чӱчкыдын коштеш, Киров марий-влакын койышыштым ончыкта.

сметанинИван Шурмучаш ялеш шочын-кушкын. Школышто тунеммыж годым кусарыше лияш шонен. Вятский кугыжаныш университетыш ты специальностьлан тунемаш пураш ямдылалтын, но балл ситен огыл. Тӱҥалтыш класслам туныктышылан тунемын. Кызыт Ваня Моско олаште пашам ышта.

Рвезе 4-5-ше курслаште тунеммыж годым Станислав Шакировын мурыжым йӧратен колыштын. Лач тунам марий тӱвыра деке утларак лишыл лийын, манаш лиеш. Тудо йылмым тунемаш тӱҥалын. Тылеч ончыч рушла веле кутырен, а кызыт акцент дене гынат, марла мутлана. «Авам Галина Леонидовна – марий шӱлышан ӱдырамаш. Тудо Уржум олаште «Родо» кружок занятий-влакым вӱда. Авамын тыршымыжлан кӧра марий касым кундемыштына эртарена. Икымше тыгай кас 2012 ийыште лийын. Сценарийым, конкурс-влакым авам ямдылен. Мый да туныктышо Римма Аркадьевна Шабалина концертым вӱденна. Уржум районысо, поснак Уржум ола, Кугу Рой, Собак ялласе марий ӱдырамаш-влак чолгалыкыштым ончыкташ тӱҥалыныт. 2012-2013 ийлаште кундемыштына куд тыгай марий касым эртаренна. Татарстанысе «Кна вел» ансамбльлан районыштына гастрольым эртараш полшенна. 2014 ийыште «Сай мотор, Уржум» смотр-конкурсым икымше гана эртаренна. Пытартыш ийлаште марий усталык коллектив-влак угыч кыртмен пашам ышташ тӱҥалыныт. Нуно репетицийыш чӱчкыдын коштыт, концертлаште мастарлыкыштым ончыктат, национальный вургем-влакым шкеак ургат. Тиде моткоч сай.  

Мый Марий самырык тукым Vслётышто участвоватленам. Тушто ятыр чолга еҥ дене вашлийынам, шукылан тунемынам. 2013 ий годсек Москошто пашам ыштем, садлан чылаж годым марий мероприятийлаште лийын ом керт. Туге гынат Марий кундемыште, мемнан районышто мо ышталтмым эре эскерем. Вконтакте соцсетьыште «Ме марий улына, Уржум кундем!» группым виктараш полшем», — палдарыш Иван.

Ванян марий йылме верч чонжо йӱла. Марий тӱвырам, йӱлам арален кодымаште чыла вийым пышташ кӱлеш манын ойла. «Ача-авам ялыште эре марла мутланеныт. Но мый ала-молан начар умыленам. Кугурак класслаште тунемме годым ВКонтакте соцсетьыште регистрироватлалтынам. Тушто марий муро-влакым чот колыштынам. Катя ковам марий такмак-влакым шуко пала, муралта гын, кумыл нӧлталтеш. Чаманен каласыман, школлаште марий йылмым огыт туныкто, туныктат гынат, ты предметлан шагал шагатым ойырат. Йылме эркын дене йомеш. Икмыняр ий ончыч Кировышто Марий культур кече лийын. Оҥайын эртен, но пайдаже шагал. Мыйын шонымаште, областьыште марий тӱвыра шотышто куратор-влак кыртмен пашам огыт ыште. Кикнур ялын эргыже Павел Михалёв чолга, но тудат кызыт Москошто пашам ышта. Автономный да нефтьлан поян Татарстан огынал. Шуко самырык еҥ пашам кугу олалаште кычалеш, вахте йӧн дене коштеш. Мыят шке районемын тӱвыра, мер илышыштыже участвоватлен, марий культурнам вияҥдаш полшынем, но тора олаште илен, тидым ышташ ок лий. Кертмем семын тӱрлӧ мероприятийыш эреак ушнем. Ӱмаште, мутлан, Моско кечын Болотный площадьыште «Народы Москвы» концертыште ме, кандаш марий, мастарлыкнам ончыктенна. Кажне ийын Москошто да Йошкар-Олаште Пеледыш пайремыште участвоватлем, ял пайремлаш коштам. Авам ӱжеш гын, эреак шкенан районышто концертлаште выступатлем. Мый гитар дене шокташ, кушташ йӧратем, гармоньым изишак шоктен моштем. Ӱшанем: марий йылмына, йӱлана нигунам огыт йом. А Уржумышто марла газет лектеш гын, моткоч сай ыле», — каласыш Ваня.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: