"Кузе илет, эрвел марий?" рубрик, 2017 ий, Идым тылзын 11-ше кечыже

Пеш сай пайремым эртареныт!

Статьян авторжо Эльвира Терентьева

ТИДЫН НЕРГЕН ПОШКЫРТ КУНДЕМЫШТЕ ИЛЫШЕ ДА МАРИЙ ВУРГЕМЫМ УРГЫШО МАСТАР ӰДЫРАМАШ ОЛЬГА КИРИЛОВА УВЕРТАРЫШ,

Пошкырт велне Танып эҥер йоген эрта. Ты сылне пӱртӱс лоҥга курык да чодыра дене авыралтын. Лач тыгай моторлыкым ужын илат Балтач район Кавырга ялыште. Тений ты яллан (рушлаже Магашлы-Алмантаево маныт) 290 ий темын. Пайремым 19 августышто лийын.

Кабыргалан - 290

Тудым эртарыме шотышто верысе калык ончылгоч каҥашен да шкеак оксам поген. Тыгак кажне сурторалте моторын ончалтше манын, уремым эрыктеныт, у печым печеныт, палисадникеш сӧрал пеледышым шынденыт… Тидыже варажым «Эн мотор да чатка сурт-пече» конкурсышто сеҥыше-влакым рашемдаш полшен.

А тыгай радамышке Олег ден Альфина Алексеевмытын, Иван ден Екатерина Хайбуллинмытын, Эрик ден Минюра Гайнетдиновмыт, Радик ден Ирина Валиуллинмыт, Олег ден Алевтина Альмекаевмыт, Ольга Кирилован, Татьяна Кирилован, Мензада Валееван суртышт логалыныт.

Кавыргаште кызыт 81 суртышто илат. Марий яллан шотлалтеш гынат, кызыт руш, татар, узбек да одо-влакат улыт. Чыланат келшен илат. Самырык-влакат шагалын огытыл. Теве шукерте огыл 25 августышто сӱан лийын. Тений ялыште ик йоча веле шочын — Александровмыт ешыште эрге. Туге гынат ялыште кум-ныл шочшан еш шуко.

Ваш-ваш келшен, ӱмырым пырля эртарыше ятыр мужыр уло. Теве 50 ий да утларак илыше-влак коклаште Ислам ден Галина Каляншинмытым, Салих ден Менсапа Альмекаевмытым, Иван ден Меньямал Шайнуровмытым, Минулла ден Фая Минилбаевмытым, Амирьян ден Сакиян Тимиряевмытым палемдаш лиеш.

Кавырга калык ты ялеш шочшо да элнан тӱрлӧ верыштыже илыше лӱмлӧ еҥ-влак дене кугешна. Тиде – Пошкырт Республикын сулло ялозанлык пашаеҥже Зинаида Фатхуллина, отставкысе полковник, орденан да медалян Иван Ибулаев, отставкысе подполковник Феликс Алексеев, Афганистаныште служитлыше Радик Апкалиев. Озанлыкыште тыршыше-влак коклаште Паялче Алексеевалан, Бибиясма Сайпановалан, Ислам Калямшинлан, Минильян Хайбуллинлан да молыланат тау шомак йоҥгалтын.

КАБЫРГАШТЕ12

Пайремым уремыште эртареныт, шинчаш теҥгыл-влакым йӧнештареныт, пырдыжеш сӱрет-влакым пижыктеныт. Тыгак ялыш пурымаште, курыкышто, 290 цифрым ош кӱ дене возен сӧрастареныт, тудо торашке койын да пайремыш чумыргышо-влакын кумылыштым нӧлтен. А сценыште пайремым мотор ӱдыр-влак – Лиана Алексеева ден Даша Айдубаева – вӱденыт. кАБЫРГАШТЕ вудышо

Чумыр организатор пашам шке ӱмбакыже тӱвыра пӧртым 15 ий вуйлатыше Альфина Алексеева налын. Тудлан верысе депутат Радик Апкалиев ден тӱвыра пашаеҥ Лариса Кузьмина полышкаленыт. Калыкым тӱвыра пӧрт пеленысе «Ӱжара» фольклор ден «Рвезылык» куштышо ансамбль-влак куандареныт. Каласыман: вич ий ончыч «Ӱжара» ансамбль калык коллектив лӱмым сулен налын, а «Рвезылык» 2010 ийыште районысо «Озо бас» куштымаш конкурс гыч Гран-при дене пӧртылын.

Кеч-могай ялыште школ кугу пашам шукта. Пайрем годым уста да опытан туныктышо-влакым шарналтеныт. Ынде тӱҥалтыш школ веле кодын. Тушто йоча-влакым К.А.Айдубаев, И.Г.Валиулина да Г.Г.Шайхутдинова туныктат.

Саламлаш толшо еҥ-влакат шукын лийыныт. Кавырга вел артист-влаклан районысо тӱвыра пӧрт гыч Г.З.Шаисламова чап грамотым кучыктен. Верысе «Агрофил» ООО-м вуйлатыше А.В.Акберов дечат окса пӧлекым налмыланат калык куанен.

А кугу концертын ик унажеКабырга44 Калтаса кундем гыч мурызо да поэтессе Алевтина Баязитова лийын. Тудо сценыште «Олмапу пеледме годым» книгаж дене палымым ыштен да «Марий улмем дене кугешнем» почеламутшым лудын. А кастене клубышто Марий касым эртарен.

Торжественный ужаш деч вара пайремыш погынышо калык кужу ӱстел коклаште вераҥын. Тушто икте-весе дене чон почын мутланен, весела мурым муралтен, тоштым шарналтен, илышыште лийше оҥайым каласкален шинченыт…

Эльвира Терентьева.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: