"Ме марий улына" рубрик, 2017 ий, Идым тылзын 22-шо кечыже

«Сарсаде» — Кокла Уралын пайремыштыже

Статьян авторжо Эльвира Терентьева

2 сентябрьыште Екатеринбургышто Кокла Уралысе калык-влакын кечышт эртен. Тыгай пайремым латвизымше гана палемденыт.Коллектив Сарсаде

Уралыште 160 утла национальностян калык ила. Нунын илыш-йӱлаштым, ыштыш-кучышыштым, вургемыштым, куштымашыштым, мурыштым кугу поянлыклан шотлен, Кокла Уралыште икмыняр ий ончыч кугу пайремым эртараш шонен пыштеныт, а Свердловск областьысе губернатор ты шотышто посна пунчалым луктын. Кажне ийын мероприятийыште ты кундемыште илыше да уна-влак, национально-культурный обществе ден автономий-влакын еҥышт чумыргат. А тений ты пайремым ямдылымашке самырык тукымым утларак ушеныт.

«Ятыр национальностян калык илыме верыште тынысле илышым да келшымашым арален коденна, тидым тукым гыч тукымыш шуйышаш улына. Ме тӱрлӧ улына гынат, пырля илена да икте-весынам пагалышаш улына. Тидым самырык тукым ужшаш да шижшаш», — каласен вице-губернатор Павел Креков.

Пайрем «Таганская слобода» еш дене каныме паркыште лийын. Кокла Уралыште ятыр тӱрлӧ калык коклаште марий-влак посна верым налыт. Ты ганат марий калык шкеж дене палдарен. Тыгай чап Красноуфимск район Сарсаде тӱвыра пӧрт пеленысе «Сарсаде» ансамбльлан пуалтын.

«Мый тыгай пайремыш икымше гана миенам, — каласыш «Сарсаде» ансамбльын чолга самырык еҥже Ольга Роюкова. — Паркыште икмыняр этноял верланен ыле. Тушто кажне толшо еҥлан тӱрлӧ калык-влакын йӱлашт да тӱвырашт дене палыме лияш йӧн лийын. Армян, узбек, грузин, осетин, ингуш, таджик, туркмен, азербайджан, кореец, татар, башкир, руш, чуваш, удмурт, коми-зырян, чыган да моло-влакат ыльыч. Ме «Марий кудым» намиенна. Тушто Сарсадын мастар ӱдырамашыже Нина Алексеевна Кимаеван кидпашаже-влакым погенна ыле.Тудо ырес денат тӱрла, бисер денат сӧрал картиным ыштылеш,. Варажым ме, ансамбльын участницыже-влак, марла муренна, вич номерым ончыктенна».

Вес калык дене пырля келшен илат

Таҥасымашат ятыр лийын. Теве казак-истец-влак вийым да тале улмым пален налше ятыр модышым темленыт.Кучедалмаште,арамам руымаште, куштен моштымаште, пластик ате-влакым пӱчкедымаште, имне дене таҥасымаште, дротикым кышкылтмаште, пикш дене лӱйкалымаште мастарлыкыштым самырык-влакпоснак шукын тергеныт да икте-весе дене ӱчашеныт.Ольга Роюкова

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: