"Шинчымаш кугорнышто" рубрик, 2017 ий, Идым тылзын 18-ше кечыже

У вий дене у школыш

Статьян авторжо Анастасия Эманова

Волжский район Купсола тӱҥ школышто тунемше да туныктышо-влаклан тений 1 сентябрь поснак кугу пайрем лийын. Тиде кечын школын у зданийже шке омсажым почын. Йоча да туныктышо-влакым саламлаш тунам Марий Элым вуйлатыше А.Евстифеев толын.

20170912_103621Селаште кок пачашан школ йошкаргын волгалт шинча. Тыгай школышто шинчымаш корно дене ошкылаш эшеат чот кумыл лектеш. Ме, журналист-влак, лӱмын тиде арнян ты школым ончалаш миен коштынна. Марий йылмым, музыкым туныктышо Наталья Вячеславовна Иванова мемнам вашлие. Школ илыш дене палдарыш. «Купсола школым 1895 ийыште чоҥымо. Кок пачашан пу пӧртыштӧ йоча-влак йӧратен тунемыныт гынат, уэмдыме, кызытсе саманлан келшыше чыла оборудований дене пойдаралтше школым чон вургыжын вученыт. Школын  у зданийжылан негызым кок ий ончыч пыштеныт. Тидлан келшыше проектым возымо ыле. Окса федеральный, республиканский бюджет гыч толын. Идалыкыште шинчаончылнына кугу школ шочо. 110 йоча тунемеш. Икымше классыш тений 17 йоча толын. Шкенан автобусна кызытеш уке, икшыве-влак велосипед дене, а телым ече дене коштыт. Йоча-влак Яльчик посёлко, Ялагин, Чолемсола ялла, Усола села гыч улыт. Тошто школышто библиотеке да кочмывер посна верлаште лийыныт. А ынде чылажат у зданийыште верланен. Школышто тылеч посна 80 веран актовый зал, спортзал, медицинский блок, волгыдо класс-влак, учительский, логопедын да психологын кабинетышт улыт», - каласкалыш самырык туныктышо.

Наталья Вячеславовна Оршанке район Чирки ялеш шочын-кушкын. Оршанке педколледжым тунем пытарен. Тӱҥалтыш класслам да марий йылмым туныктышо специальностьым налын. Пӱрымаш Купсола ялышке конден. Тыште Н.В.Иванова ик ий йочасадыште пашам ыштен, а вара тудым тӱҥ школыш пашаш ӱжыныт. Ынде 2011 ий годсек тыште тырша. Пашам ыштымыж годымак МарГУ-што тӱҥалтыш класслам туныктышылан тунемын. Наталья Вячеславовна – творческий шӱлышан ӱдырамаш. Тудо баян дене шокта, марла мураш-кушташ йӧрата, 5-9-ше класслаште тунемше йоча-влакымат тидлан туныкта. «Педагог-организатор улам. Школышто тӱрлӧ мероприятийым эртарена, районысо, республикысе конкурслаш ямдылалтына. «Самырык тукым» районысо йоча усталык конкурсышто мастарлыкнам ончыктенна. Тунемшына-влак уста, чолга улыт. Тӱрлӧ предмет дене олимпиадылаште эреак участвоватлат да район кӱкшытыштӧ эреак, манаш лиеш, призовой верым налыт. Школыштына марий йылмым шочмо йылме семын тунемына. Тидыже куандара. Икшыве-влакат марий йылмым йӧратен тунемыт», - манеш Н.В.Иванова.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: