"Кузе илет, эрвел марий?" рубрик, 2017 ий, Идым тылзын 14-ше кечыже

Статьян авторжо Эльвира Терентьева

Телым шочшо еҥ ечым йӧрата

Таче 1963 ийыште У ий йӱдым Пошкырт вел Мишкан район Монар ялыште шочшо еҥ нерген каласкалена. Тудлан ынде витле вич ият шуэш. Лач тыгай лӱмгечым палемда шушаш 1 январьыште физкультурым туныктышо Валерий Шамратович Шамаев. А педагоглан тудо Благовещенскысе шуко профилян профессиональный колледжыште пашам ышта. Ты тунемме верыш толмыжлан тений 30 ий темын. Тылеч ончыч кок школышто тыгаяк сомылым шуктен да ик идалык Пӱрӧ горкомышто комсомол организацийын инструкторжылан пашам ыштен.

Тений 13 июльышто Башкортостан Республикым вуйлатыше Рустэм Хамитов В.Ш.Шамаевлан «Башкортостан Республикын сулло туныктышыжо» кугыжаныш наградым кучыктен.

054Шамаев

Благовещенскысе педколледжыште 1949 ий годсек физкультур дене туныктышо-влакым ямдыленыт. Валерий шкежат тыштак тунемын. Педколледжыште тӱжем дене ӱдыр-рвезе-влак специальностьым налыныт.

Кеч-могай туныктышо эн ончыч шке предметше дене сеҥымашышке шушаш. Валерий Шамратович вуйым огеш шупш да призан верлашке лектеш. Шкеже ечым йӧрата, теве вич ий ончыч ссузысо туныктышо-влак коклаште кокымшо верым налын, тений «Лыжня России» ӱчашымаште, 2013 ийыште лӱйкалымаш дене сеҥен. Тылеч посна В.Ш.Шамаев — Благовещенск олаште да районышто ече да полиатлон федерацийын председательже, физкультур дене туныктышо-влакын цикловой комиссийыштым куд ий вуйлатен. Сандене республикыште кузе спорт мероприятийым эртараш кӱлмым сайын пала. Пытартыш ийлаште многоборье дене «Патриоты Башкортостана» спартакиадым, инструктивно-методический лагерьым да «Зарница» военно-спортивный модышым эртараш полшен.

Кажне телым колледжыште спортын телымсе видше-влак дене таҥасымаш-влак лийыт. Тидыже тыглай тренировко деч ойыртемалтеш, студент-влаклан тренерланат пайремым ушештара. «Зарница» нергенже ойлыманат огыл. Тудыжо тазалыкым пеҥгыдемдыме йоча лагерьлаште путырак оҥайын эртаралтеш, сандене ӱдыр-рвезе-влак тышке кумылын ушнат.

Физкультурым туныктышым кажне выпускник шарна. Поснак спортышто шкем шуарыше-влак тудлан тауштат. Кумло ий жапыште шагал огыл чемпионым куштен: 16 спорт мастерым да икымше разрядан 100 утла спортсменым. Нунын коклаште – спорт мастер, Башкортостан Республик физический культурын сулло пашаеҥже, Туриныште эртаралтше паралимпийский модмашын чемпионжо Ростислав Павлов. Пытартыш жапыште тыгай лӱмым суленыт: Р.Шафиев (ече дене, 2013 ий), В.Николаев (полиатлон дене, 2012 ий). Районысо да республикысе «Лыжня России» таҥасымашлаште кажне гана студент-влак ончыл верыш лектыт. Теве туныктышын тыршымыжлан кӧра Благовещенск олан сборный командыже Ялысе спорт модмашлаште призан верлам сеҥен наледен: 2013 ийыште – 1 вер, 2016 ийыште – 3 вер.

Валерий Шамратович ден пелашыже кок ӱдырым туныктен луктыныт. Кум уныкашт уло. Нунымат коча кертмыж да йӧн лийме семын спортлан шӱмаҥда.

Эльвира Терентьева.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: