"Рубрик деч посна", 2017 ий, Шыжа тылзын 13-шо кечыже

Йодышлан вашештеныт

Статьян авторжо Светлана Кушакова

7-ше №-ан исправительный колонийыште шинчыше ӱдырамаш-влак наказанийым шуктымо федеральный службын республикысе управленийжын, республикысе прокуратурын пашаеҥже-влак, Общественный палатын еҥышт дене вашлийыныт.

Вашлиймаш годым шинчыше-влаклан уголовный ден уголовно-процессуальный, уголовно-исполнительный кодекслашке вашталтышым пуртымо нерген ойленыт.

Тӱҥ шотышто административный надзорыш логалше еҥ-влакын спискышт кумдаҥын. Йоча-влак дене ешартыш свиданийым пуымо шотышто ятыр йодыш лийын. Но тыште кажне случайым посна ончаш тӱҥалыт.

Ушештарена, тений июль гыч судитлыме ӱдырамаш ден пӧръеҥ-влаклан, кудын 14 ияш марте ийготан йочашт уло гын, каныш да пайрем кечылаште йоча дене вашлияш ешартыш свиданий исправительный тӧнеж деч ӧрдыжтӧ пуалтеш.Тыгай свиданий ӱдырамаш-влаклан идалыкыште кок гана пуалтын кертеш, но лу сутка деч шукылан огыл.

Республикысе Общественный палатын еҥже О.Заболотских йоча-инвалид-влакын образованийым налме дене кылдалтше вашталтыш-влак дене палдарен. Тылеч посна телефон дене мутланыме, аҥысыр манме специальностян врач-влак деке приёмыш кайыме, моло медицине йодышым тарватеныт.

Вашлиймаш деч вара специалист-влак дене личный приём эртен.

Прокуратур умылтара (тышкак рамке дене пуртен колташ лиеш)

2017 ий 9 июньышто Россий Уголовно-исполнительный кодексын 173.1 статьяжын 1-ше ужашышкыже пуртымо вашталтыш вийым налын. Тушто эрык деч посна кодымо верла гыч лекмеке, административный надзорыш логалше еҥ-влак шотышто возымо.

Административный надзорыш наказанийым тыгай осал пашам ыштымылан шинчыше-влак логалыт:

- айдемым пуштмылан, тазалыклан неле эҥгекым лӱмын ыштымылан, индырымылан;

- правосудийым шуктышо, следствийым наҥгайыше еҥ, полиций пашаеҥ-влакын илышыштлан эҥгекым ышташ тӧчымылан;

- политический, религиозный, идеологический, расовый, национальный ужмышудымашым лукмылан. Келшыдымашым тарватыше осал пашалан, тыгай осал пашаш ийготыш шудымо йоча-влакым ушымылан;

- наркотик дене кылдалтше осал пашам икмыняр гана ыштымылан.

Административный надзорышто улшо еҥлан илыме вер, жаплан лийме вер почеш элгӧргӧ паша органлаште тылзылан ик-ныл гана палемдалтман, южо неле осал пашам ыштымылан непогашеный але неснятый судимостян еҥ, тыгак илыме вердыме, регистрацийдыме еҥ-влак палемдыме вер деч ӧрдыжкӧ каен огыт керт.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: