"Сылнылык тӱня" рубрик, 2017 ий, Шыжа тылзын 13-шо кечыже

Йочаже-влак модмыжым йӧратен ончат

Статьян авторжо Анастасия Эманова

Мо тыгай илышын моторлыкшо? Кушто пиалым муаш? Очыни, кажне еҥын тиде йодышлан шке вашмутшо уло. Иктылан пиал – тиде таза йоча, ача-ава, весылан – йӧратыме паша, весылан – окса. Кызытсе саманыште, чаманаш логалеш, шукынжо чон поянлыкым огыл ончат. Чылажымат окса дене висат. Тидлан кӧра торжа лийынна, вес еҥын ойгыжлан йӱштӧ шӱм-чонан кодына. А вет южгунам поро шомакат нелылык годым йолымбак шогалаш полша. Чыла тидын нерген ойлалтеш драматург Уильямс Теннессин «Предназначено на слом» пьесыштыже. Тудын негызеш шындыме постановко 19 октябрьыште «Театральный студенчество» IXмеждународный фестиваль-лабораторийыште ончыкталтеш.

Спектакльын режиссержо самырык ӱдыр, Йошкар-Оласе Курчак театрын актрисыже Анжела Тихонова. Тудо Шернур район Ларий ялыште шочын. И.С.Палантай лӱмеш тӱвыра да сымыктыш колледжым Курчак тетарын артистшылан тунем пытарен. Кызыт Маргу-што Калык культур да тӱвыра кокласе кыл институтышто любительский театрым вуйлатыше специальность дене визымше курсышто тунемеш.

- Анжела, молан лачак «Предназначено на слом» пьесым ойырен налында? Огеш лий ыле, мутлан, отечественный писатель-влакын произведенийже негызеш спектакльым шындаш?

IMG_7436- «Предназначено на слом» спектакль – диплом пашам. Ты постановкыш уло чон шокшем пыштенам. Пьесе виян, шонаш таратыше. Тудо тӱрлӧ шижмашым луктеш. Олег Геннадьевич Иркабаевын курсыштыжо тунемам. Тудо диплом пашалан шкалан келшыше материалым ойырен налаш темлен. Мый шуко писатель-влакын пашаштым лудынам. Уильям Теннессин тиде произведенийже вигак чонешем логалын. Пьесым 1946 ийыште возымо, но тушто ончыкталтше проблеме кызытсе саманлан моткоч келша. Йӱштӧ шӱм чонан, шкет улмаш, мемнан обществын морально-нравственный уровеньже. Чыла тиде кызытсе саманыште уло. «Предназначена на слом» — ондакак илышыч кочыжым тамлен ончышо, ойгым пален налше, лишыл еҥ-влак деч посна кодшо йоча-влак нерген.

- Спектакль почеш шуко пашам ыштенда?

- Произведенийым ойырен налмеке, актер-влакым кычалынам. Тӱҥ герой-влак Уилли да Том улыт. Ӱдырым пырля тунемше Надежда Назарова модеш, а рвезым – тӱвыра да сымыктыш колледжын студентше Матвей Андреев. Актёр-влак дене пырля тылзе утла пьесым веле лудынна, герой-влакын чон тургыжланымашыштым шижаш, тӱрлӧ ситуацийыште молан лачак тыге але вес семын ыштымыштым умылаш тыршенна. Декораций постановкышто уке. Тидыже, мыйын шонымаште, путырак сай. Чыла вниманий герой-влак  ӱмбак лиеш.

Репетицийым каныш кечылаштат ыштенна. Кызыт спектакльым калык ончыко лукташ ямдылалтына. «Театральный студенчество» фестивальыште ончыктена. Постановкым коллегем-влак чон вургыжын вучат. Театрнан режиссержо Алексей Анатольевич Ямаевлан кугу таум ойлем. Тудо изи залыште репетироватлаш йӧным ыштен. Туныктышем, наставникем Нина Ильинична Голованова каҥаш дене полшен.

- Актер да режиссёр пашамат ынде паледа. Мемнан театрлаште шуко режиссер пӧръеҥ-влак улыт. Неле мо ӱдырамашлан режиссер лияш?

- Вич ий Курчак театрыште пашам ыштем. Актер да режиссер-влак коклаште пеҥгыде кыл лийшаш. Режиссер паша неле, ответственныйрак. Режиссерын илшы умылымашыже кумда лийшаш, тудо тыгак психологийым сайын палышаш. Актёрын кумылжым шижын моштышаш. Илышыште вет тӱрлӧ ситуаций лиеда. Южгунамже актёр геройжым огеш умыло, але кумылжат уке. Режиссер тыгай годым йолташ семын каҥашым пуэн моштышаш, тидын дене пашам ышташ кумылаҥда. А неле мо ӱдырамашлан режиссер лияш? Тидым эше умылен шуктен омыл.

- Актёр-влак гастроль дене тора кундемыш чӱчкыдын лектын коштыт. Ешыштыда тидын шотышто пашада нерген мом ойлат?

- Пелашемат, икшывем-влакат мыйым умылат да полшен шогат. Студент годым театрыш пашаш ом тол шоненам. Тунем пытарымеке, марлан кайышым. Йоча дене шинчыме годым театр деч посна йокрокланенам. Тыге театрыш пашаш толынам. Кызыт театр деч посна иленжат ом керт. Кок шочшан ава улам. Икшывем-влак мыйын модмо спектакльлам йӧратен ончат. 25 октябрьыште «Колобок» спектакль дене  Екатеринбургыш гастроль дене каена. Тиде жапыште йочам-влакым ончаш авам Алевтина Кузьминична Конакова ончаш полша. Тудо ятыр ий школышто пашам ыштен, кызыт сулен налме канышыште.

Театр – тиде посна илыш. Тушто пашам ыштымемлан моткоч куанем.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: