"Рубрик деч посна", 2017 ий, Шыжа тылзын 13-шо кечыже

Йöратыме паша волгыдо илышым сöра

Статьян авторжо Елена Годунова

4 октябрьыште «Молодой предприниматель России-2017» конкурсын регионысо этапшым иктешленыт. Тушто 12 самырык тӱҥалше бизнесмен шке бизнес-проектшым арален. Тыге ныл номинацийыште сеҥыше-влакым палемденыт. Нуно Марий Эл Республикын чапшым Моско олаште Россий кӱкшытан конкурсышто аралаш тӱҥалыт.

8bRzfXQ9sRAТачысе лаштыкын унаже — «Социальный бизнес года» номинацийыште сеҥыше, «Пульс» творческий пространствын генеральный директоржо  Анастасия Одинцова.

Настя Йошкар-Олаште шочын-кушкын. Кум ийым темымеке, аваже тудым куштымо кружокыш наҥгаен. Ӱдырлан изинек эстрадный направлений келшен, сандене ончыкылыклан лач тудым ойырен налын. Ленин лӱмеш тӱвыра полатысе «Улыбка» ансамбльыште 14 ияш марте куштен. Кушмо семын ӱдырлан вес направленийыште шкем тергымыже шуын, тыге кызытсе куштымашым тунемаш тӱҥалын. Настя тыгак фортепиано классым музыкальный школышто тунем лектын. Кӱшыл шинчымашым ПГТУ-што информатик-экономист специальность дене налын. Но куштымашым öрдыжеш коден огыл. Вузышто кызытсе куштымашым туныктымо студийыште заниматлен. Тыге тушто тудлан «танцы» предметым туныкташ ӱшаненыт. Настя тидлан моткоч йывыртен. Молан манаш гын куштымаш тудын хоббиже. Туныкташлан тӱрлö олаште эртаралтше мастер-класслаште эреак лиеден. Нуным тӱҥямбалне кумдан чапланыше куштызо-влак эртареныт. Тушто практикым веле огыл, тыгак куштымаш, тудлан келшыше движений-влак нерген каласкаленыт. Тудын характержым почын пуэныт. Куштымашым йöратыше-влаклан тиде моткоч кӱлешан материал, манеш Настя.

Настя ончыч хип-хопым кушташ туныктен гын, жап эртыме семын тӱрлö направленийыште кушкашаш кӱлмым умылен, сандене эше икмыняр направленийым туныкташ тӱҥалын. Тидлан ончыч шке тунемын, вара моло-влакым туныктен.  Российысе куштызо-влак коклаште Настялан Екатерина Сметанинан творчествыже келша. Тудын эртарыме мастер-класслашкыже кертмыж семын эреак кошташ тырша. Тыгак кеҥежымсе кушташ туныктымо лагерьлаште чӱчкыдын лиеда. Шукыж годым тыгай лагерь-влак Москошто, Краснодар кундемыште эртаралтыт.

2015 ийыште травмылан кöра кушташ туныктымо пашам Настялан кодаш логалын. Ынде мом ышташ тӱҥалам манын, ятыр шонымаш вуйышто пöрдын. Но йöратыме паша шкеж деке шупшын, сандене ӱдыр йога дене заниматлаш коштын. Тыгак тудо жаплан ик палыме ӱдыржö тудлан «Ты предприниматель» проект нерген ойлен да тушко ушнаш темлен. Тыге Настя йодмашым колтен, ты проектыш логалын. Кок тылзе наре тушто нуным туныктеныт. Ты проект нерген ӱдыр тыге каласкала:

- «Ты-предприниматель» проект мыйын илышем тӱрыснек вашталта манын шоненат омыл. Икымше занятийыште лийме годымак мыйын пуйто шулдыр кушкын да шкем бизнес сферыште тергыме шуын. Тушто мыланна кузе шке бизнесым почаш, тыгодым законым пудырташ огыл туныктеныт. Тыгак мемнан дене пырля бизнесмен-влакым чӱчкыдын тургыжландарыше тӱрлö экономический, законодательный, правовой йодыш-влакым лончыленыт. Тылеч посна конкурент-влак шотышто, сми дене пашам ыштыме годым мастер-классым эртареныт. Кажне занятий тренинг семын эртаралтын. Тушто кажне йодышлан вашмутым кычалме да бизнес-тренер-влак дене пырля лончылымо. Тунамак бизнесым моделироватлаш лӱмын программе пашам ыштен. Тушто ме шке бизнес-проектнам тӱрлö орган-влак ончылно араленна. А орган-влак шке сферыштышт тыршыше мемнан бизнес-тренерна-влак лийыныт. Тунам мый такшым могай бизнес пашам ышташ тӱҥалам манын шоненат омыл. Тренер-влак идейым шонен муаш да тудым вораҥдарен колташ задачым, цельым  шындаш вич минут жапым пуэныт. Мый кушташ йöратем, шкежат хореограф улам. Сандене вуйыштем лач тиде шонымаш лийын. Тыге куштымо студийым почаш, тушто  могай тӱҥ направлений лийыт, да тидын деч могай пайдам ончаш толшо-влак налын кертыт, каласкаленам. Мыйын шонымашем тренер-влаклан келшен. Тыге умбакыже лач тиде сфере дене бизнесым тӱҥалаш шоненам. Тидлан бизнес-планым ямдыленам, проектым возенам. «Ты- предприниматель» проект почеш бизнес-проект дене грантым сеҥен налаш йöн лийын. Сандене мый шке бизнес-проектем аралаш луктынам. Тыге 43 участник коклаште куд еҥ грантым сеҥен. Сеҥыше-влак коклаште мыят лийынам.  2015 ий пытышаш лишан грантым налынам.

«Пульс» лӱман творческий пространствым 2016 ий мартыште партнёр дене пырля почмо.  Шке бизнесым тӱҥалаш куштылгыжак огыл улмаш. Мыланна верым муаш ятыр жап каен. Законым пудыртымо шуын огыл, сандене закон дене келшыше лийже манын тыршыме. 100 метр квадратан кумдыкышто ончыч йога дене кок направленийым, икмыняр куштымаш да фитнес направлений дене пашам ышташ тӱҥалме.  Тренер-влак шке сферыштышт профессионал улыт. Тыгак кугу олала гыч мастер-классым эртараш профессионал-влакым чӱчкыдын ӱжына. Нунын дене пырля ме шке, тыгак клиентна-влак шукылан тунемына.

«Пульс» пространстве почылтмо годым, тушко 50 наре еҥ коштын. Ынде тышке коштшо-влак кум пачаш шукемыныт. Ятыр еҥ тышке йолташын темлымыж почеш толын, да кызытат куанен коштыт. Вет тыште тӱҥ шотышто тазалыкым пеҥгыдемдаш занятий-влак келыштаралтыныт. Занятий-влак тазалыклан нимогай эҥгекым ынышт кондо, мöҥгешла, пайдам ыштышт манын ямдылат. Тидлан тӱрлö тренинглаште туныктат. Кажне направленийын шке шöрынжö уло. Сандене тыште кугу опытан, кӱшыл шинчымашым налше тренер-влак тыршат.  Тылеч посна ты творческий пространстве кундемыште эртаралтше тӱрлö кугу пайремлаште мастер-классым кумылын эртара. Мастер-класс-влак таза кап-кылан лияш манын шонымаш дене лиедат.  Санденак тенийысе  «Молодой предприниматель России-2017» Россий конкурсын регионысо этапыштыже вийыштым тергыше-влак коклаште А.Одинцован бизнес-проектшым «Социальный бизнес года» направленийыште эн сайлан шотленыт да тудлан сеҥыше лӱмым пуэныт. Такшым ӱмаштат тудын проектше кӱкшын аклалтын. «Открытие года» номинацийыште сеҥышыш лектын ыле. Но жап чӱдылан кöра Моско олаш республикын чапшым аралаш каен кертын огыл, но тений тушко каяш Настя кыртмен ямдылалтеш.

Ты пространствын лектышыже умбакыжат эшеат тӱвыргö да лектышан лиеш манын ӱшаныме шуэш. Такшым бизнес сферыште чылалан ямде лийман, маныт. «Пульс» творческий пространстве таче йол ӱмбалне пеҥгыдын шога, умбакыжат шуаралташ шона. Шукерте огыл Медведево посёлкышто филиалже почылтын. Кызыт тыште йоча, самырык да кугыеҥ-влак заниматлат. Тыгак илалше-влаклан посна группым чумыраш шонат.

 Анастасия Одинцован тӱҥалше бизнесмен-влаклан ой-каҥашыже:

1) Эн ончыч шкан цельым шындыза. Тыгодым цельыш шумекыда, тудым умбакыже кузе вораҥдараш тӱҥалыда, ончылгоч лончылен ямдылыза.

2) Вучыдымо тат-влак дене кажне бизнесмен тӱкнен кертеш. Сандене тидлан эре ямде лийза.

3) Шкем эре вияҥдыза. Тидлан тӱрлö йöным кучылтса. Мутлан, литературым лудса, чапланыше еҥ-влак дене вашлийза.

4) Бизнесым вӱдаш куштылго паша огыл. Сандене тазалык нерген мондашат лиеш.  Тыге ынже лий манын, спортлан кеч изиш да жапым ойырыза. Тыге уш сайын пашам ышта, моло чер-влакат кораҥыт.

5) Кеч могай неле ситуаций гыч лекташ корным муаш лиеш, тидлан шканда кандаш тӱрлö факторым палемдыза. Ончыктымо деч ончыч кажне фактор нерген сайын шоналтыза.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: