"Рубрик деч посна", 2017 ий, Шыжа тылзын 31-ше кечыже

Мультфильм поро лийшаш

Статьян авторжо Анастасия Эманова

28 октябрьыште тӱняште Анимаций кече палемдалтеш. Лач ты кечын 1892 ийыште Францийыште сӱретче да изобретатель Эмиль Рейно ик тоштерыште калыклан «тарванылше» сӱретым, але вес семынже мультфильмым, ончыктен. У технологийлан кӧра компьютер анимаций вияҥаш тӱҥалын. Йолташ-влак, а те мультфильмым ончаш йӧратеда? Йоча годсо дене таҥастарымаште, кызытсе мультфильм могайрак?

ибатиева Татьяна Ибатиева:

- Мультфильмым южгунам ончем. Руш патыр-влак Алёша Попович, Добрыня Никитич нерген мультфильм-влакым утларак йӧратем. Нуным умылаш куштылго, кугыеҥлан келыштарыме, воштылтарыше улыт.

Изиэм годым мультфильмым шуэн ончыктеныт. Шарнем, кажне рушарнян, эрден эрак кынелын, ача-ава деч телевизорым чӱкташ йодына ыле. Совет жапысе мультфильмым ом шарне, но диснеевскийже шукак ыле: «Чип и Дейл», «Алладин», «Скрудж Макдак». Нуным арня мучко вученна. Кызыт тӱрлӧ мультфильмым кок ияш ӱдырем дене пырля ончем. Кызытсе саманысе ден ожнысым таҥастараш йӧсӧ. Мультфильм-влак моткоч мотор, сайын сӱретлыме лияш тӱҥалыныт Поснак ушым пойдарыме мультфильм-влакым ончаш тыршена. Тыгайжылан «Фиксиким» шотлем. Тыгак мурым мурыман мультфильм-влакым йӧратен ончена, пырля мурена, куштена, у мут-влакым тунемына.

апталиковВиктор Апталиков:

- Йӧратыме мультфильмем – «Моя любовь». Тудым Иван Шумелёвын «История любовная» романже почеш сӱретлыме. Анимаций фильмын режиссёржо – Александр Петров. Тудын творчествыжым моткоч йӧратем. Пашаже-влак оҥай, порылан туныктышо улыт. Художник-мультипликаторын «Старик и море» мультфильмже сымыстара. Изиэм годым совет мультфильм-влакым куанен онченам. Кызыт утларакшым йотэлласе анимаций кумылым нӧлта. «Вверх» да «Корпорация монстров» мультфильм-влакым йӧратен ончем.

Татьяна Петрова:петрова

- «Унесённые призраками» аниме-фильм келша. Шукылан туныктышо, шонаш таратыше аниме. Кӧ тудым ужын огыл гын, ончаш темлем. «Винни Пух ден Пяточок» мультфильмым йӧратем. Мыйын шонымаште, кызытсе мультфильм-влак ондакысе дене таҥастарымаште оҥайжак огытыл, персонаж-влак койыш-шоктышышт дене пешыжак огыт куандаре, эмоцийым огыт лук. Но кызытсе йоча-влак тыгай мультфильм-влакым йӧратат.

андрееваЛидия Андреева:

- Ава улам, но изи йоча гай тачат мультфильмым ончаш йӧратем. Йоча годсо «Король Лев» мультик ӱмырешлан шарнымашеш кодын. Тыгак «Бемби», «Леди и бродяга», «Золушка», «Валли» мультфильм-влакым куанен ончем. Сай мультфильм кумылым нӧлтышаш веле огыл, тудо тыгак поро пашам ышташ туныктышаш, шонем.

Надежда Кондратьева:кондратьева

- Ешем дене уло кумылын сылне да оҥай «Маша ден Медведь» мультфильмым ончена. Йоча годым «Ну, погоди!», «Дюймовочка», «Приключения кота Леопольда» мультфильм-влакым ончаш йоратенам. Совет мульфильм-шамыч проста да умылаш йӧршӧ лийыныт, йоча-влакым сайлан: кугыеҥ-влакым пагалаш, янлык-влакым чаманаш да аралаш, йолташ-влакым аклаш – туныктеныт.  А кызытсе мультфильм-влак лӱдыктат. Южо мультикыште кучедалмым, туманлымым ужаш, тыгак персонаж-влакын осал мут дене мутланымыштым колаш лиеш. Тыгайым ончен, йоча-влак сайлан тунемын кертыт мо?

ивановаНаталья Иванова:

- Мый кум икшыван ава улам, сандене йоча каналым ончаш логалеш. Чыным каласаш гын, шуко мультфильм мыланем огыт келше. Нуно «короткометражный» улыт. Лач нуно йоча-влакын чытамсыр койышыштым помыжалтат. Конешне, сай мультфильм-влакат улыт, мутлан, «Фиксики». Тушто турло ӱзгар-влак нерген каласкалат, «Лунтик да йолташыже-влак» мультик сай койыш-шоктышлан туныкта.
Ме йоча пагытыште герой-влак верч тургыжланыме, образ-влакым шымлыме. Мый «Летучий корабль», «Бременские музыканты», «Крокодил Гена и Чебурашка», «Ну,погоди!», Диснейысе мультфильм-влакым ончаш йоратенам. А «Красная шапочка», «Буратино», «Гостья из будущего» йоча фильм-влакын самырык тукымым куштымаште шагал огыл надырыш уло.

 

Денис Рыбаков:рыбаков

- Конешне, мыйын йӧратыме мультфильм-шамыч улыт. Но эн-энжым ойырен ом керт. Школыш коштмем годым кажне рушарня кастен Уолт Диснейын мультфильмже-шамычым вученам. Студент пагытыште «Смешарики» мультфильм келшен. А кызыт талукаш йӧратыме Ванюкем дене «Свинка Пеппам» кажне кастене манаш лиеш ончем.

венинаНадежда Венина:

- Изи годым диснеевский мультфильм-шамыч келшеныт. Эн чот Микки Маус нерген мультик-влакым ончаш йӧратенам. А кызыт отечественный мультфильм-шамыч чонемлан лишыл улыт.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: