"Рубрик деч посна", 2017 ий, Шыжа тылзын 13-шо кечыже

Мӧҥгыштат петырымаште шинчат

Статьян авторжо Светлана Кушакова

Следствий кайыме годым домашний арест манме мерым шукерте огыл кучылташ тӱҥалыныт. Суд практикат тидым пеҥгыдемда. Марий Элыште тений кандаш тылзыште мӧҥгысӧ арестыште шинчыше 57 еҥ лийын. Тидыже ӱмашсе дене таҥастарымаште 20 процентлан шукырак. Кызыт уголовно-исполнительный инспекцийыште тӱрлӧ осал пашам ыштымылан домашний арестыште кучымо 24 еҥ учётышто шога.

общийланМо тыгай домашний арест? Тидым Россий Уголовно-процессуальный кодексын 107-ше статьяштыже умылтарыме.

Домашний арест суд решений почеш палемдалтеш. Тыгодым арестыште кучымо вер, жап да эрыкым шыгыремдымаш ден чарымаш-влак ончыкталтыт. Тыгодым титаканлан шотлымо але титакан еҥым, обществе деч тичмаш але тичмаш огыл ойырен, илыме верыштыже петырымаште кучат. Тидым уголовно-исполнительный инспекцийын пашаеҥже-влак терген шогат. Домашний арест годым ятыр шотышто эрыкым шыгыремдымаш ден чарымаш-влак кучылталтыт. Мутлан, илыме вер деч ӧрдыжкӧ лекташ, почто гоч серышым, молымат налаш да колташ, телефон ден Интернетым кучылташ огеш лий, еҥ-влак дене вашлияш да мутланаш чарыме.

Титаклымын нелытшым шотыш налын, суд кӱшнӧ каласыме чыла чарымым иканаште кучылташ пунчалын кертеш. Южгунам титаканлан шотлымо але титакан еҥын але тудым аралышын, законный представительжын, тыгак уголовный пашам наҥгайыше следовательын але дознавательын ходатайствышт почеш южо чарымашым кораҥдаш лиеш. Телефоным кучылтмо шотышто ешарен каласыман. «Вашке полышым», аварийно-утарыме службым ӱжаш, полицийыш йыҥгырташ, тергыше орган, дознаватель але следователь дене кылдалташ телефон дене пайдаланаш чарен огыт керт. Наказанийым пудыртымым тергаш аудиовизуальный, электронный але вес технический средство-влак кучылталтыт.

Черланыме да стационарыш эмлалташ пыштыме годым мӧҥгысӧ арестыште лийме верлан тазалыкым аралыме тӧнеж-влак шотлалтыт.

Домашний арест кок тылзе марте палемдалтеш. Следствий ты жап деч шукырак шуйна гын, арестымат шуен кертыт.

Уголовно-исполнительный инспекцийын инициативыж почеш домашний арестым кучылтмо шотышто «йыргешке» ӱстел лийын. Тушто тыгай мерым кучылтмо годым тӱрлӧ ведомствын икте-весе дене вашкылже йодышым ончен лектыныт. Мероприятийыш республикысе следствий органла гыч, республикысе прокурорын кугурак полышкалышыже Сергей Завойских толыныт.

Ты йодыш шотышто пашам иктешлен, инспекцийым вуйлатышын алмаштышыже Д.Лежнин домашний арестым кучылтмо механизм тичмашынек шотыш кондалтын огыл манын палемден. Мутлан, ятыр случайыште, следствийыште улшо еҥлан пашам ышташ але тунемаш кошташ чарыме огыл гын, почтым налаш але колташ, телефоным але интернетым кучылташ чарымым терген шукташ огеш лий. Тыгай годым следствий орган-влаклан почто корреспонденцийлан арестым, телефон дене але интернет гоч мутланымым тергыме да возымо мерым кучылташ сайрак ыле манын ойленыт. Арестант-влакат тыгай шыгыремдымашым шукыж годым огыт шукто. Пел ий жапыште электронный технический устройство-влак полшымылан кӧра инспектор-влак 14 нарушенийым пален налыныт. Тидын шотышто предварительный следствийыш 20 наре уведомленийым колтымо, пресечений мерым вашталтыме шотышто вич представленийым колтымо тылеч вара нуным ынде мӧҥгыштӧ огыл, а вес вере петырымаште кучаш тӱҥалыт. «Йыргешке ӱстел» деч вара «домашний арестант»-влакым тергыме пашам куштылемдаш манын, документ-влакым ямдылаш шонат. Тыге уголовно-исполнительный инспекцийыште улшо ты проблемым кораҥдат.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: