"Саман" рубрик, 2017 ий, Шыжа тылзын 20-шо кечыже

Нелылыкым сеҥен, ончыко ошкылеш

Статьян авторжо Анастасия Эманова

Сентябрьыште коштын кертдыме инвалид-влаклан «Пара-Крым-2017» всероссийский физкультурно-спортивный фестиваль эртаралтын. Тушто Марий Элын командыже визымше верым сеҥен налын. Элнан чапшым вич спортсмен арален. Нунын коклаште – Кужэҥер рвезе Антон Глушков.

глушков1Антон Кужэҥер посёлкышто шочын-кушкын, тысе 2-шо №-ан кыдалаш школыш коштын. МарГУ-со юридический факультетым тунем пытарен. Дипломым налмеке, шке посёлкышто верланыше Марий Эл Республикысе Советский районный судыш пашаш пурен. Кызыт тушто судопроизводствылан йӧным ыштыме шотышто тӱҥ специалистын пашажым шукта.   

Черлан кӧра рвезе йочаж годым пел йол деч посна кодын. Но нелылык икшывым торжам ыштен огыл, тудо, мӧҥгешла, илышын чевержым аклен мошташ тунемын. Поро, весела койыш-шоктышан, илышлан куаныше кушкын. «Лимфодема черан шочынам. Пурла йолем чот пуалын, чогашылыш вӱд погынен. Кӱлеш операцийым ыштеныт, но кум ияш улмем годым инфекций логалын да йолем шӱяш тӱҥалын. Тидлан кӧра пурла йолем пӱчкыныт. Кызыт, йӧра изиэм годым тиде лийын, манын шонем, кугурак ийготышто йол деч посна кодаш нелырак ыле, очыни. Тау, ачам ден авамлан. Нуно мыланем полшен шогеныт, нигунамат тидын шотышто чаманымашыштым ончыктен огытыл. Мый тыглай йоча кушкынам, ик ганат вес тӱрлӧ улмем шижын омыл. Таза рвезе-влак деч нимо дечат ӧрдыжеш кодын омыл. Нунын дене пырля костыль дене куржталыштынам, футбол дене модынам. Кугурак класслаште протез дене кошташ тӱҥалынам. Тунам баскетбол, ӱстембал теннис, волейбол денат модынам. Мый таҥасыме шӱлышым йӧратем», - манеш Антон.

А.Глушковын спортышто сеҥымашыже шагал огыл. Тудо инвалид-влаклан эртаралтше тӱрлӧ таҥасымаште шукертак вийжым ончыкта. Икымше курсышто тунеммыж годым иймаш дене республикысе конкурсышто призовой верым налын. Ӱстембал теннис, куштылго атлетике да спортын моло тӱрлӧ видше дене ончылно лияш тырша. Ӱмаште «Пара-Крым» фестивальыште иймаш дене кумшо верым сеҥен налын. «Спорт вий-куатым пуа, мыйын гай шонымашан, тыгаяк илыш ситуацийыш логалше еҥ-влак дене палыме лияш йӧным ышта. Таҥасыме годым чыла нелылык нерген шонымаш мондалтеш, тунам мый эшеат чот пиалан улмем шижам.

Чаманен каласыман, тренировкым кунам кертам, тунам веле ыштем. Кужэҥер посёлкышто бассейн уке, а Йошкар-Ола марте 72 меҥгым толман. Шуматкечын веле рӱдолаш толын коштын кертам. Тренерем – Дмитрий Альбетрович Кудрявцев. Тудо Марий Элысе паралимпийский резерв спортивно-адаптивный школын туныктышыжо», - ойла спортсмен.

Илышын куанже мо тугай? – йодмемлан Антон тыге вашештыш: «Кунам тый иктаж-кӧлан кӱлат да тылат иктаж-кӧ да иктаж-мо кӱлеш».

Кӧргӧ виян, чыла нелылыкым сеҥен моштышо самырык рвезе илыш корныштыжо пеҥгыде йолтошкалтышым ыштен, ончыко ошкылеш. Тудо кеч-кӧланат сай пример.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: