"Ӱшанем... Вучем..." рубрик, 2017 ий, Шыжа тылзын 13-шо кечыже

Пиал шыпым йӧрата

Статьян авторжо Татьяна Айтова

Шукерте огыл лийше событий шонкалаш да серышым возаш таратыш.

Кызыт интернет кумдан шарлен. Шуко еҥ тӱрлӧ социальный сетьлаште шинча. Ик могырым шоналташ гын, пеш йӧнан: мӧҥгыштак   тӱрлӧ уверым пален налаш, йолташ дене мутланаш йӧнан. Вес могырым, интернет шуко жапым налеш, южгунамже еш илышымат пужа. Интернетыште шке нерген уверым вераҥдыме шотышто тореш улам. Икшыве, пелаш, пачер, эсогыл мом чийыме да кочмо фотом вераҥдымым ом йӧрате. Еш илыш еҥ шинчалан койдымо лийшаш, шонем. Теве ик палымем дене лийше событий чын улмем эше ик гана пеҥгыдемдыш.

Игнат ден Людмила школ гычак келшеныт. Эсогыл чурий тӱсыштат,  койышыштат икгай лийыныт. Шукынжо нуным кӧранен онченыт. Жап эртымек, самырык-влак мужыраҥыныт. Еш илыш икымше пагытыште ӱй да мӱй гай лийын. Вара  эргышт шочын.  Игнат кок пашаште тыршен, садлан пелаш ден икшывылан жап шагал кодын. А Людмилалан тыгодым моткоч йокрок лийын. Чонжым лыпландараш манын, тудо шуко жапым интернетыште эртарен.  Лишыл палыме-влак кузе илат, мом ыштат — тидым эре эскерен, южыштын фотоштым ончен, шыпак кӧранен. «Мариналан пелашыже эре пеледышым пӧлекла, Олеся теҥыз воктене кана, Юля у тувырым налын… — шонкален тудо. — Молын уло гын, молан мыйын уке?» Тыге паша гыч толшо марийжылан кажне гана вуйым шийын. Пелашыже изиш чыталташ, умылаш йодын. А тудлан чылажат кызыт да таче кӱлын. Ик жапыште йӧршеш орадыла лийын. Оксам вургемлан шотдымын кучылтын, тӱрлӧ кафеш, дискотекыш коштын. Вара  фото-влакым интернетыш луктын да вучен. Тек йолташем-влак кузе илымем ужыт манын шонен.

Икана Людмилалан школысо йолташ ӱдыржӧ серен, пелашыже ден икшывын фотоштым ончыкташ йодын. Люда изи йочала куанен, но арам. Инга Игнатым шукертак йӧратен улмаш. Тудо нуным ойыраш манын, Людалан тӱрлӧ манеш-манешым ойлыштын. Пуйто тудо Игнатым вес ӱдыр дене ужын. Ӱшандараш манын, могай машина дене кудалыштмыжым, могай вургемым чийымыжым ойлен.  Тидлан кӧра еш изиш гына шаланен огыл. А титаканже Людмила шкак улмаш. Тудо интернет лаштыкыш шке ешыж нерген утыждене шуко уверым луктын. А Инга тудын дене мастарын пайдаланен гына.

Тиде серышем дене теве мом ойлынем: ешдам, илышдам еҥ кӧранымаш деч аралыза. Кӧранымашын вийже моткоч уда. Арам огыл ойлат: пиал шыпым йӧрата.

Валентина Петровна.

Йошкар-Ола.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: