"Саман" рубрик, 2017 ий, Шыжа тылзын 20-шо кечыже

Уста, чолга улыт

Статьян авторжо Анастасия Эманова

18 октябрьыште Йошкар-Ола воктенсе Савино селасе школ-интернатыште сокыр да начарын ужшо йоча-влакын «Творчество не имеет границ» икымше фестивальышт эртен.

«Тыгай сынан фестиваль республикыштына лийын огыл ыле. Ме проектым возенна да тудын дене «Православная инициатива» грантым налме конкурсышто участвоватленна. Ты мероприятийым эртараш манын, соцсетьлаште «Начинания» площадкыште тидлан оксам погенна. Кумылан чыла еҥ мыняр-гынат оксам колтен кертын. Тыге погымо окса дене фестивальым эртаренна. Ӱшанена, тудым кажне ийын ышташ тӱҥалына. Мероприятийыште Марий Элыште илыше начарын ужшо йоча-влак мастарлыкыштым эн шукын ончыктеныт. Пермь край гыч толшо ӱдыр яндар йӱкшӧ дене куандарен. Чуваший гыч участник-влак толын кертын огытыл, но кидпашаштым конкурсышкына колтеныт. Конкурс вокал, хореографий, декоративно-прикладной творчество, сылнын лудмаш номинацийлаште эртен. Кажне йочалан пӧлекым да дипломым кучыктенна», — каласкалыш «Сокыр-влак обществе»марий мер организацийын Йошкар-Оласе пӧлкажын тӱвыра, спорт да реабилитаций рӱдерын художественный вуйлатышыже Марина Замкова.

Савино школын директоржо, марий пӧръеҥ Константин Аскарович Ахмадишин, ты фестивальын кӱлешлыкше нерген ойлыш: «Сокыр йоча-влак пӱртӱсын моторлыкшым огыт уж гынат, тидым чонышт дене шижын моштат да творчествышт гоч тудым ончыктат. Тыгай икшыве-влак моткоч талантан да поро улыт. «Творчество не имеет границ» фестиваль – икшыве-влаклан кугу пайрем. Тушто нуно мастарлыкыштым веле огыл ончыктат, а вашла палыме лийыт».

Пайремыш Марий Элын тӱвыра, печать да калык-влакын пашашт шотышто министрын алмаштышыже Александр Николаевич Луничкин толын. Тудо мероприятийыште таҥасымаш огыл, а йӧратымаш шӱлыш шижалтеш манын палемден.

Чыла участник чолга улыт. Теве Йошкар-Ола гыч Андрей Куклин фестивальыште гитарым шоктен, мурым мурен. Тудо Савино школышто 10-шо классыште тунемеш. Гитар да баян дене мастарын шоктен мошта. Рвезе деч посна школысо ик мероприятият огеш эрте. Андрей тыгак футбол дене Марий Элын паралимпийский сборныйыштыжо модеш. Тӱрлӧ олалаште эртыше турнирлаште писылыкшым ончыкта. «Шукерте огыл Угарманыште сокыр-влаклан мини-футбол дене турнир лийын. Тушто икымше верым налынна. Россий первенствыште кокымшо лийынна», — ойла Андрей.

20171018_150254Конкурсыш Пермь край Лысьва ола гыч Анастасия Коровина аваж дене пырля толын. Тудо кок мурым мурен да «Вокал» номинацийыште икымше верым налын. «Ӱдырем шочмеке, врач-влак икшывет ужаш огеш тӱҥал манын ойленыт. Тудын глаукома чер лийын. Но ме вуйнам сакен огынал. Екатеринбургышто Настялан операцийым ыштеныт, шинча давленийым волтеныт. Глаукомалан кӧра ӱдыремын вуйжо эре корштен. Кызыт уке, адакшым сайын огыл гынат, изишыже ужеш. Оласе сокыр-влаклан школ-интернатыште 9-ше классыште тунемеш. Мураш йӧрата. Яра жапыштыже сӱретла, шун гыч панном ненча», - манеш Настян аваже Светлана Юрьевна.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: