"Ме марий улына" рубрик, 2017 ий, Кылме тылзын 24-ше кечыже

Карелийысе кава йымалне

Статьян авторжо Эльвира Терентьева

17-18 ноябрьыште Карелийыште «Марийцы под небом Карелии» фестиваль эртаралтын. Ты мероприятий «Содружество народов Карелии» мер организацийын «Десять в квадрате» проектше почеш лийын да «Акрет мари» ансамбльлан лу ий теммылан пӧлеклалтын. Фестивальын участникше-влак марий калыкын тӱвыраж дене хореографий ден фольклор мастер-класслаште, йӱла вургем нерген лекцийлаште да творческий коллектив-влакын концертлаштышт палыме лийыныт.

Тушко Марий Эл гыч «Мурсескем» фольклор ансамблят миен коштын. Нуно Петрозаводскышто Йоча да самырык-влакын усталык полатысе краеведений тоштерым онченыт. Тысе организатор-педагошо-влак Евгения Файзырхманова ден Анастасия Савельева Карелий да карел-влакын илышышт нерген интерактивный йӧн дене каласкаленыт. Тиде вашлиймаш годым уна ден пашаеҥ-влак икмыняр тӱрлӧ шудо чайым тамлен онченыт. «Эше тыгай тамле чайым нигуштат йӱктен огытыл», — ойленыт варажым «Мурсескем» ансамбльын участницыже Вера Каменщикова.

«Мурсескем» фольклор да этнографий ансамбльым вуйлатыше Евгений Каменщиков лач фестиваль годым марий лукым почмылан тауштен. Тушко мийыше еҥ-влак экспонат-влакым ончен да шымлен кертыныт.

Вес кечын участник-влак Сегеж олашке кудалыныт. Ола Карелийын йӱдвел ужашыштыже, Петрозаводск гыч 250 меҥге тораште верланен.

Эн ончыч Сегежысе тӱвыра да каныме рӱдерыште районышто илыше марий да мер ушем-влакын еҥышт дене вашлийыныт. Ты кечын Сегеж районысо рӱдӧ библиотекыште Национальный кыл рӱдерым почмо. Тушто «Марийцы Карелии» мер организаций дене пырля ворандарыме паша нерген каласкаленыт. Марий калыкын тӱвыраж, йӱлаж да илышыж нерген каласкалыше выставке ден тоштер сынан лукшымат тыгак лӱмдымӧ. «Марийцы Карелии» организацийым вуйлатыше М.Асессоровын шонымыж почеш, тиде лукым ончыкыжым выставке семын школлашке да пайремлашке кондыштараш тӱҥалыт. Организацийын исполнительный директоржо Алевтина Войтович рӱдерлан марий сылнымутчо-влакын книгаштым, а марий луклан Марий кундемысе кидмастар-влакын пашаштым пӧлеклен.

А варажым рӱдерын творческий коллективышт дене пырля Карелийыште илыше марий-влакын «Акрет мари» ансамбльышт, Петрозаводскысо кугыжаныш консерваторийын финн-угор музык кафедрын студентше-влак, «Мурсескем» ансамбль выступатленыт.

Ончаш толшо-влак калык куштымашым да 100 ияш акретле вургемым ужын, ӱдырамашын пӱрымашыж нерген ожнысо да кызытсе муро-влакым колыштын кертыныт. Еҥ-влак, поснак Финляндийын Петрозаводскысо консульствын еҥже, марий калыкын сӧрал вургемже да мурымо мастарлыкше нерген концерт деч вара участник-влак дене кужу жап мутланеныт.

А кастене фестивальын участникше-влак Сегеж олам мучко ошкыл эртеныт. Тыгодым марий мурым муреныт, марла мутланеныт. Корнышто вашлиялтше еҥ-влак шыргыжалыныт, кидыштым нӧлтеныт да «Марийцы, молодцы!» манын куанен кычкырленыт. Тыге уна-влакат Карелийыште марий калыкым шке шӱм-чонышт денак шижыныт.

Фестиваль 18 ноябрьыште мучашлалтын, а «Мурсескем» ансамбльын участникше-влак Кондопога районысо Кивач водопадым ончаш миен коштыныт, ты кумдыкысо тоштерыш, дендрарийыш пурен лектыныт. А вара 80 меҥгым кудалмеке, угыч нуным Петрозаводск вашлийын, олан рӱдыштыжӧ палыме да сӧрал верлаж дене палымым ыштен.

Карел мландыште верланыше марий-влакын верышт да пайремыштат уна-шамычлан путырак келшен. Сандене тусо поро кумылан родына-влакым шочмо Кужэҥер район Йывансола ялышке кумылын ӱжыныт. Тиде вашлиймаш весылан корным почеш манын, меат ӱшанена.

Эльвира Терентьева.

2002 ийысе перепись почеш Карелийыште 400 еҥ илен. А 2010 ийысе перепись годым национальность графаште марий улам манын 250 еҥ ончыктен. Но ты цифрлан тусо марий-влак огыт ӱшане. Теве Сегеж районышто гына шӱдӧ утла марий еҥ улыт маныт.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: