"Мыланна латкудыт" рубрик, 2017 ий, Кылме тылзын 24-ше кечыже

Неле гынат, шыргыж

Статьян авторжо Анастасия Эманова

Очыни, кажне школышто, классыштеуло тыгай йоча, кӧн семын моло ӱдыр але рвезе кояш, чияш, эсогыл ойлаш толаша. Таче тыйым пагалат, йӧратат, но иктаж сай огыл ситуаций лиеш гын, тиде чыла йомын кертеш. Садлан шкем шот дене кучыман. Чылан йӧратымашыжым  сулаш манын, чот тыршыман.

популярность Чолга лий

Лачак чолгалык йочам ойыртемалтшым ышта. Тыгай йоча-влакым тӱрлӧ мероприятийыш, уналыкеш эре ӱжыт. Чолгалыкым ончыкташ нелыжак огыл. Школысо тӱрлӧ пайремыш ушнаш, художественный самодеятельность кружокыш кошташ лиеш. Тӱҥжӧ подросткын пеҥгыде илыш умылымашыже, вийже да цельыш шуаш куатше лийшаш улыт. Эре ончылно лияш тыршыман. Тунам пырля тунемше да моло йоча-влакат тудын гай кояш тыршаш тӱҥалыт. Йоча-влак, лидер койышдам ончыкташ ида лӱд. Компанийыште мыскарам ыштыза, оҥай темылан мутланыза. Кызытсе саманыште социальный сетьымат кучылтса. Шукын шке соцстраницыштышт кажне кечын тӱрлӧ фотографийым вераҥдат, илышыште лийше событийышт, шке шонымашышт, идейышт дене подписчик-влакым палдарат.

Но эре шке популярность нерген веле огыл, йолташда-влак нергенат шоныза, нунылан полшаш ида мондо.

Уым кычал му

Йырым йыр улшо еҥ-влак тендам шекланышт манын, тӱжвал сын келшыше лийшаш, но эн тӱнжӧ кӧргӧ чон поянлыкда лийшаш. Садлан мастарлыкым нӧлтыман, эре уым кычалман. Тидлан полшат:

  • Книга. Шинчымашым келгемдаш манын, тӱрлӧ тематикан литературым лудман. Книга илыш опытым, урокым пуа, тыгак тӱрлӧ произведенийым лудын, грамотность кушкеш.
  • Спорт. Таза илыш-йӱлам кучен, шке вийлан ӱшан лектеш.
  • Куштымаш. Спорт семынак тудо кугу пайдам конда. Тылеч посна сылне костюм, сем, сцене – тиде моткоч оҥай. Те эре калык ончылно лийыда.
  • Изосымыктыш. Чонлан келшыше кидпашам ыштыза. Пашада-влакым школысо выставкылаш лукса, конкурслаш колтыза. Тендан мастарлыкдам ужын, моло йоча-влакат творчествылан шӱмаҥыт.
  • Музык. Тӱрлӧ семӱзгар дене шоктен моштышо еҥ-влакым ожнысек пагалат да йӧратат. Садлан иктаж-могай семӱзагр дене шоктен моштеда гын, моткоч сай лиеш.
  • Йот йылме-влакым палымаш. Тиде модно да пайдале. Йылмым тунемын, тӱрлӧ калык, эл нерген пален налын кертыда.

Шыргыж

Весела, шыргыжше еҥ дене мутланаш куштылго. Чонланда неле гынат, йыр улшо еҥ-влаклан тидым ида ончыкто. Йолташым але палыме еҥым вашлийында гын, шыргыжын саламлалтса. Чеверласыме годымат шыргыжса. Тиде йолташдан поро кумылым луктеш. У еҥ-влак дене палыме лийме годым шыма шинчаончалтыш лийшаш. Тыге те шкендан нерген сай шонымашым шочыктеда. Школ коридорышто иктаж-кӧ йоҥылыш йолдам тошкалын гын, мутлан, ида сыре, а шыргыжалза.

макароваПедагог-психолог Ольга Николаевна Макарова умылтара:

- Эн ончыч мо тугай популярность да молан тудо кӱлеш умылыман. Подросткылан йӧратымаш ден пагалымашым сулаш, пырля тунемше ӱдыр-рвезе да йолташ-влак кокласе конкуренцийыште ончылно лия ш ик эн тӱҥ задаче.

Оҥай, шӱмеш пижше тӱжвал сынан, ушан да уста йоча шукыж годым популярный лиеш. Садлан подросткылан келшыше аланым ойырен налман да тушто шке мастарлыкшым нӧлтыман, оҥай темылан мутланыме годым шке шонымашым тичмашын почын пуэн моштыман. Йоча-влак, мом ышташ эн чот йӧратеда да могай направленийыште тале улыда? Шкаланда нине йодышлан вашмутым пуыза.

Спорт секцийлаш коштын кертыда. Тидыже ончыкшым тӱрлӧ таҥасымаште сеҥаш йӧным пуа. Англичан йылмым тунемза. Тудым пален, англичан фильм ден сериал-влакым ончен, книгам лудын, соцсеть гоч тӱрлӧ элыште илыше еҥ-влак дене мутланен кертыда. Программирований, фотографий, психологий, икманаш тӱрлӧ аланыште шкендам терген ончыза. Чыла тиде иктаҥаш ӱдыр-рвезе-влакын тендан деке пагалымашым да йӧратымашым луктеш, тыгак ончыкылык профессийлан негызым пышта.   

 

 

 

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: