"Ме марий улына" рубрик, 2017 ий, Кылме тылзын 24-ше кечыже

Озаҥыште – кугу пайрем

Статьян авторжо Эльвира Терентьева

 

18 ноябрьыште Озаҥысе Келшымаш пӧртыштӧ кугу пайрем лийын. Татарстаныште илыше марий-влакын национально-культурный автономийыштын (умбакыже – НКА) черетан V погынышт эртен. Тушто эртыше кум идалыкысе пашам иктешленыт да вуйлатыше-влакым сайленыт.

Ты кечынак Озаҥ оласе НКА-н (ончыч ушем маналтын) 25 ияш лӱмгечыжым пайремленыт.

Погынышко Татарстан Республикыште марий-влакын илыме чыла вер гыч толын кертын огытыл гынат, тидыже пашалан чаракым ыштен огыл. Уна-влак коклаште Россий ФНКА-м вуйлатыше Лариса Яковлева, Оньыжа Эдуард Александров, Татарстанысе президентын национальный политике шотышто управленийым вуйлатыше Данил Мустафин, Марий Элысе тӱвыра, печать да калык-влакын пашашт шотышто министрын алмаштышыже Галина Ширяева, Удмуртийысе марий-влакын НКА-штым вуйлатыше Анатолий Радыгин лийыныт.

Озапҥыште

Татарстаныште марий-влакын вич мер организацийышт уло: Озаҥ, Набережный Челна олалаште, Менделеевск, Агрыз да Балтаси районлаште. Кажныштыже паша марий тӱвырам вияҥдыме шотышто ышталтын, тыгак шочмо йылмым марий калыклан туныктымо йодыш нергенат ойленыт. Балтаси район ик марий селаште корно укелык тургыжландарыме йодышымат нӧлталме.

Вара делегат-влак Татарстанысе марий-влакын НКА-штым вуйлатышым сайлышашлан уставым ончен лектыныт да икмыняр вашталтышым пуртеныт. Автономийым ончычсо семынак О.А.Третьяковлан вуйлаташ ӱшаненыт. Тидлан ӧраш нимолан: вет тудым чумырымаште да Олег Александрович пашам ышта. Тудын алмаштышыжлан чолга ӱдырамаш Л.И.Мусихинамак кодымо.

Выставке залыште Российын сулло художникше Иван Ямбердовын кумло наре пашажым ончыктымо. Тудым Озаҥысе уста сӱретче Фиринат Халиков почын. Ончаш толшо калыклан марий художникын портретше-влак поснак ойыртемалтшыла чучыныт, кеч тушко автор национальный чиям ешарен огыл гынат, еҥ-влак радына гыч илыше семын онченыт. Озаҥ велне илыше-влаклан выставке дене палыме лияш кок арня жап уло.

Mj6QTks_1vk

Кидмастар-влакынат пашаштым ужаш йӧн лийын. Тушко сылне вургемыштым да кидпашаштым Звениговысо калык кидмастар пӧртын пашаеҥже-влак ончыктеныт. Тыгак Галина Кудрявцева вуйлатышышт дене пырля мастер-классым эртареныт, калыклан тидыже путырак келшен. Набережный Челна олаште илыше Леонид Шабалинын да Озаҥыште илыше Елена Хафизован тӱрлымӧ пашаштым акленыт.

Варапогынын делегатше-влак уна-влак дене пырля Архангельский шӱгарлаште лийыныт. Тушто 30-шо ийлаште репрессийыш логалше марий-влак лӱмеш шарнымаш сортам чӱктымӧ да памятникышт воктеке пеледышым пыштыме.

Озаҥ олаште илыше марий-влакын автономийыштлан (тудым Людмила Мусихина вуйлата) 25 ий темме лӱмеш концерт «Корстон» клубышто эртен. Тудым поэзий кумылан Татьяна Ибатиева вӱден. Концертым моткоч ойыртемалтшын почмо: залыште пеле пычкемыш лийын, да пуйто кугезына-влак пайремыш шӱвыр да тӱмыр дене ӱжыныт. Вара сценышке «Лай мардеж» (вуйлатышыже — С.Шарабуева) ден «Озаҥ мари» (вуйлатышыже – С.Ефремов) ансамбль-влак лектыныт. Концертым мучашлыме шотыштат азапланеныт да лӱмынак мурым возен ямдыленыт.

Мероприятийым марий дискотеке дене пытарыме. Тушто марий эстраде артист-влак дене пырля марла шӱм-чон канен кушталтеныт да муралтеныт.

Икманаш, Озаҥысе да пӱтынь Татарстан кундемыште чолга марий-влакын илымышт эше ик гана пеҥгыдемдалте.

Эльвира Терентьева.

2010 ийысе перепись почеш Татарстаныште 18848 марий еҥ ила. Марий-влак чот почеш кудымшо верыште улыт.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: