"Сылнылык тӱня" рубрик, 2017 ий, Кылме тылзын 10-шо кечыже

Оле Лукойе угыч унала ӱжеш

Статьян авторжо Анастасия Эманова

15-19 ноябрьыште Йошкар-Оласе Курчак театрыште Российысе курчак театр-влакын «В гостях у Оле Лукойе» кокымшо фестивальышт эртаралтеш. Тидын вашеш 7 ноябрьыште театрыште пресс-конференций лийын.

20171107_141406Икымше фестиваль (тудо 2015 ийыште эртен) писатель Г.-Х.Андерсенын творчествыжлан тичмашнек пӧлеклалтын ыле. Ты гана тӱрлӧ автор-влакын произведенийышт негызеш шындыме спектакль-влак ончыкталтыт.  

«Тений фестивальым шке кӱшеш эртарена. Вич курчак театрын артистше-влак толыт. Киров, Кстово, Ульяновск, Небережный Челна, Воркута олаласе театр-влак мастарлыкыштым ончыктат. Спектакль-влакым йоча-влак веле огыл, кугыеҥ-шамычат ончен кертыт. Мемнан театрын артистше-влак, мутлан, фестивальыште кугурак ийготан йоча-влаклан да нунын ача-аваштлан  «Жак и его слуга, или Как стать Людоедом» постановкым ончыктат», — ойла самырык режиссер, актёр-кукловод М.Ю.Белецкий.   

«Спектакль-влакым, актер-шамычын модмыштым кумдан палыме театральный режиссер, критик В.Л.Шрайман, Г.Камала лӱмеш татар кугыжаныш академический театрын литературно-драматический ужашыжлан вуйын шогышо Н.Р.Игламов, театровед, Башкортостан Республик искусствын сулло пашаеҥже Д.Г.Давлетшина да тӱвыра, печать да национальность паша шотышто министрын алмаштышыже В.И.Актанаев аклат. Фестиваль годым жюри артист-влаклан мастер-классым эртара. Каласен кодена, черетан вес фестивальна Марий Элын 100 ияш лӱмгечыжлан пӧлеклалтеш. Спектакль-влак фольклор негызеш лийыт», — манеш театрын маркетинг да рекламе шотышто специалистше И.Н.Тимонина.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: