"Шинчымаш кугорнышто" рубрик, 2017 ий, Кылме тылзын 10-шо кечыже

Оҥай этнос тӱня

Статьян авторжо Анастасия Эманова

3 ноябрьыште Россий мучко «Кугу этнографий диктант» акций лийын. Кумылан чыла  еҥ шинчымашыжым терген кертын. Кушто верланен «Кижи» тоштер-заповедник? Мо гыч ыштыме топшурам – алтай семӱзгарым?  Могай калыкым «Йӱдвел амур» манын ойлат? Тиде да моло йодыш-влаклан вашмутым пуэн.

koVvTBRhi0YЙошкар-Олаште икмыняр площадкыште акций эртен. Шукынжо С.Г.Чавайн лӱмеш Национальный библиотекыш толыныт. Участник-влак коклаште Марий Элын тӱвыра, печать да национальность паша шотышто министрже  М.З.Васютин, Марий Элысе Кугыжаныш Погынын председательжын алмаштышыже А.Н.Иванов, йоча да самырык тукымлан театр-рӱдерын художественный вуйлатышыже О.Г.Иркабаев, поэт-писатель-влак лийыныт. Библиотекыште акцийыш 59 еҥ ушнен. Шукынжо (47 еҥ) кӱшыл образованиян улыт.

45 минутышто 30 йодышлан вашмутым пуаш кӱлын. Йодыш-влак оҥай, шонаш таратыше лийыныт. Историй дене кылдалтше йодыш-влак мылам куштылгырак чучын. А теве поэзий шотышто неле лийын.

Тыгай акций моткоч кӱлешан. Ме шуко национальностян эл улына. Кажне калыкын шке тӱвыраже, йӱлаже, национальный тувыржо, кочкышыжо, илыш умылымашыже. Чыла тидым, конешне, палаш ок лий, но тидын шотышто шинчымашнам пойдараш тыршыман.

Акцийым РФ Конституцийын кечыштыже – 12 декабрьыште – иктешлат. Уверым минкультурын, библиотекын сайтлаште вераҥдат.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: